ରିୟାଦ,୧୬।୧୨: ସୌଦି ଆରବରେ ବହୁପରିମାଣରେ ଖାଦ୍ୟ ନଷ୍ଟ ହେଉଥିବା ଦେଖାଯାଏ। ଏହାର କାରଣ ହେଉଛି ଏମାନେ ଖାଇବା ସମୟରେ ବଡ ବଡ ଥାଳି ବ୍ୟବହାର କରିବା ସହ ଆଭିଜାତ୍ୟର ପ୍ରତୀକ ସ୍ବରୂପ ଏଥିରେ ବହୁ ପରିମାଣରେ ଖାଦ୍ୟ ପରସନ୍ତି। ଯାହା ଜଣେ ବ୍ୟକ୍ତିଙ୍କ ପାଇଁ ବହୁତ ଅଧିକ ହୋଇଥାଏ। ଫଳରେ ଅଧିକ ପରିମାଣର ଖାଦ୍ୟ ନଷ୍ଟ ହୋଇଥାଏ। ଏହାକୁ ନଜରରେ ରଖି ଏବେ ଅଦ୍ଦାମୀ ମଶାଲ ଅଲକାହରଶୀ ଏମିତି ଏକ ଥାଳି ତିଆରି କରିଛନ୍ତି ଯାହା ଫଳରେ ଲୋକେ ଆଉ ଅଧିକ ପରିମାଣର ଖାଦ୍ୟ ନଷ୍ଟ କରିପାରିବେ ନାହିଁ। କାରଣ ଥାଳିର ମଧ୍ୟ ଭାଗକୁ ଉଚ୍ଚା କରି ଦିଆଯାଇଛି। ଫଳରେ ପରସିବା ସମୟରେ ଏଥିରେ କମ୍ ଖାଦ୍ୟ ପରସା ଯିବ। ତେଣୁ ଜଣେ ବ୍ୟକ୍ତି ନ ଖାଇ ପାରିଲେ ବି ଅଧିକ ଖାଦ୍ୟ ବଳକା ରହି ଯିବ ନାହିଁ। ଏହି ଥାଳି ବ୍ୟବହାର କଲେ ୩୦ ପ୍ରତିଶତ ଖାଦ୍ୟ ନଷ୍ଟ ହେବାରୁ ବଞ୍ଚିଯିବ ବୋଲି ସେ କହିଛନ୍ତି। କୁହାଯାଏ ସୌଦି ଆରବରେ ପ୍ରତି ଘରେ ବର୍ଷକୁ ପାଖାପାଖି ୨୬୦ କିଲୋଗ୍ରାମ ଖାଦ୍ୟ ନଷ୍ଟ ହୋଇଥାଏ। ହେଲେ ଏବେ ଘରେ ଓ ବିଭିନ୍ନ ହୋଟେଲରେ ଏହି ସ୍ବତନ୍ତ୍ର ଥାଳି ବ୍ୟବହାର କରିବା ଫଳରେ ଆଭିଜାତ୍ୟରେ କୌଣସି ଅସୁବିଧା ସୃଷ୍ଟି ହୋଇ ନ ଥିବା ବେଳେ ପ୍ରାୟ ୩ ହଜାର ଟନ୍ ଚାଉଳ ବଞ୍ଚାଇ ହୋଇଛି।
