ଝୁମ୍ପୁରା, ୧୭।୭ (ଡି.ଏନ.ଏ.)-କେନ୍ଦୁଝର ଜିଲା ଝୁମ୍ପୁରା ବ୍ଲକ ଅନ୍ତର୍ଗତ ଖଣି କ୍ଷତିଗ୍ରସ୍ତ ଅଞ୍ଚଳ ଭାବେ ପ୍ରଥମ ଭାଗରେ ଚିହ୍ନଟ ହୋଇଥିବା ୫ଟି ପଞ୍ଚାୟତ (ବସନ୍ତପୁର, ମଲଦା, ନୟାଗଡ, କୁଟୁଗାଁ, ନିଶ୍ଚିନ୍ତପୁର) ବାସିନ୍ଦାଙ୍କୁ ପାନୀୟ ଜଳ ଯୋଗାଇ ଦେବା ପାଇଁ ଗଭୀର ନଳକୂପ ଖୋଳାଯାଇ ସୋଲାର ସିଷ୍ଟମ ଜରିଆରେ ଓଭରହେଡ ଟାଙ୍କିକୁ ପାଣି ଉଠାଯାଇ ପାନୀୟ ଜଳ ଯୋଗାଇ ଦେବାର ଯୋଜନା ୨ବର୍ଷ ପୂର୍ବରୁ କରାଯାଇଥିଲା।
ଖଣି କ୍ଷତିଗ୍ରସ୍ତ ଉକ୍ତ ପଞ୍ଚାୟତଗୁଡିକର ପ୍ରତ୍ୟେକ ସୋଲାର ସିଷ୍ଟମ ପାଇଁ ୧୦ଲକ୍ଷ ଟଙ୍କା ଜିଲା ଖଣିଜ ପାଣ୍ଠିରୁ ବ୍ୟୟ ବରାଦ କରାଯାଇଛି। ଭୁବନେଶ୍ୱରସି୍ଥତ ଓରେଡା କମ୍ପାନୀକୁ ଟେଣ୍ଡର ମଧ୍ୟ ଦିଆଗଲା। ସମୁଦାୟ ଅଞ୍ଚଳରେ ୨୦୦ରୁ ଊର୍ଦ୍ଧ୍ୱ ସୋଲାର ନଳକୂପ ପାଇଁ ଯୋଜନା ହେଲା, ହେଲେ ସୋଲାର ସିଷ୍ଟମ ଯୋଗେ ପାନୀୟ ଜଳ ଯୋଗାଇ ଦେବାପାଇଁ ହୋଇଥିବା ଯୋଜନା ଏବେ ଫେଲ ମାରିବାକୁ ବସିଛି। ବହୁ ସ୍ଥାନରେ ସୋଲାର ସିଷ୍ଟମ ନଳକୂପରୁ ପାଣି ବାହାରୁ ନାହିଁ। ସଜଡା ଗଲେ ୨ଦିନ ପାଣି ବାହାରୁଛି, ପୁଣି ବନ୍ଦ ହୋଇଯାଉଛି। ନିମ୍ନମାନର ଓଭରହେଡ ସିନଟେକ୍ସ ଟାଙ୍କି ଯୋଗୁ କେତେକ ସ୍ଥାନରେ ଟାଙ୍କି ପାଣି ଭର୍ତ୍ତି ରହିଲେ ଫାଟି ଯାଉଛି। କମ ପବନରେ ମଧ୍ୟ ସୋଲାର ପ୍ଲେଟ ଉଡିଯାଉଛି। ଅଭିଯୋଗ ପରେ ମଧ୍ୟ ସଜଡା ଯାଉ ନ ଥିବାରୁ ପଞ୍ଚାୟତ ବାସିନ୍ଦା ଅସନ୍ତୁଷ୍ଟ ହେଉଛନ୍ତି। ପାଣି ନ ମିଳିଲେ ପୂର୍ବପରି ଚୁଆ ପାଣିକୁ ଆଦରି ପାନୀୟ ଜଳ ଚାହିଦା ମେଣ୍ଟାଇବା ପାଇଁ ବାଧ୍ୟ ହେଉଛନ୍ତି ବସ୍ତି ବାସିନ୍ଦା। ବସନ୍ତପୁର ପଞ୍ଚାୟତର ଜଡପଦା, ପେଣ୍ଠେଇ ସାହି, ଜରଡି ସାହି, କାଇଯୋଡା ଗ୍ରାମର ସୋଲାର ସିଷ୍ଟମ ଅଚଳ ହୋଇ ପଡିଥିବାବେଳେ ପୂର୍ବରୁ ଥିବା ନଳକୂପ ଗୁଡିକ ମଧ୍ୟ ଅଚଳ ହୋଇ ପଡିଥିବା ଅଭିଯୋଗ ହୋଇଛି।
ଏ ସମ୍ପର୍କରେ ଝୁମ୍ପୁରାସ୍ଥିତ ଗ୍ରାମ୍ୟ ପାନୀୟଜଳ ଯୋଗାଣ ବିଭାଗର ଯନ୍ତ୍ରୀ ମୋହନ ସିଂଙ୍କୁ ପଚାରିବାରୁ ସୋଲାର ସିଷ୍ଟମ ସଜାଡିବା ପାଇଁ ସମ୍ପୃକ୍ତ କମ୍ପାନୀକୁ କୁହାଯାଇଛି ବୋଲି କହିଛନ୍ତି।
