ଲେକ୍ସିଂଟନ,୧୪।୮(ଏପି): ଆମେରିକୀୟ ମହିଳା ଟେନିସ ତାରକା ତଥା ଦୁଇ ଭଉଣୀ ସେରେନା ଓ ଭେନସ ଓ୍ବିଲିୟମ୍ସଙ୍କ ମଧ୍ୟରେ ପ୍ରତିଦ୍ୱନ୍ଦ୍ୱୀତା ନେଇ ପୁଣି ଚର୍ଚ୍ଚା ଆରମ୍ଭ ହୋଇଛି। ଏହି ପ୍ରତିଦ୍ୱନ୍ଦ୍ୱୀତା ବେଶ୍ ରୋମାଞ୍ଚକ ହୋଇଥାଏ। ଏଥିରେ ସାନ ଭଉଣୀ ସେରେନାଙ୍କ ପଲା ସବୁବେଳେ ଭାରି ରହି ଆସିଛି। ଏଠାରେ ଚାଲିଥିବା ଡବ୍ଲ୍ୟୁଟିଏ ଟପ୍ ସିଡ୍ ଓପନ୍ରେ ସେରେନା ଗୁରୁବାର ସେକେଣ୍ଡ ରାଉଣ୍ଡ ମ୍ୟାଚ ଅପ୍ରେ ଭେନସଙ୍କୁ ୩-୬, ୬-୩, ୬-୪ ସେଟରେ ପରାସ୍ତ କରିଛନ୍ତି। ଉଭୟ ପେସାଦାର ଟେନିସ୍ରେ ପରସ୍ପରକୁ ୩୧ତମ ମୁକାବିଲରେ ଭେଟିଥିଲେ। ଏହି ବିଜୟ ସହ ସେରେନା କ୍ୱାର୍ଟର ଫାଇନାଲରେ ପ୍ରବେଶ କରିଛନ୍ତି। ଏହି ବିଜୟ ସହ ସେରେନା ୟୁଏସ୍ ଓପନ୍ ପାଇଁ ତାଙ୍କ ପ୍ରସ୍ତୁତି ଜୋରଦାର କରିଛନ୍ତି। ଟପ୍ସିଡ୍ ସେରେନା ଏବେ ନିଜ ଦେଶର ଓ୍ବାଇଲ୍ଡ କାର୍ଡ ଏଣ୍ଟ୍ରି ପାଇଥିବା ଶେଲବି ରୋଜର୍ସଙ୍କୁ ଭେଟିବେ।
ଦୀର୍ଘ ୨୨ବର୍ଷ ପୂର୍ବେ ଦୁଇ ଭଉଣୀ ପ୍ରଥମଥର ପାଇଁ ମୁହଁମୁହିଁ ହୋଇଥିଲେ। ଏପର୍ଯ୍ୟନ୍ତ ଉଭୟ ୩୧ଥର ପରସ୍ପରକୁ ଭେଟିଛନ୍ତି। ଏଥିରେ ସେରେନା ୧୯ଥର ବିଜୟୀ ହୋଇଥିବା ବେଳେ ଭେନସ ୧୨ଥର ବାଜି ମାରିଛନ୍ତି। ପ୍ରତିଦ୍ୱନ୍ଦ୍ୱୀତାରେ ଭେନସଙ୍କଠାରୁ ସେରେନା ଆଗରେ ରହିଛନ୍ତି। ସେରେନା ଏପର୍ଯ୍ୟନ୍ତ ୨୩ଟି ଗ୍ରାଣ୍ଡସ୍ଲାମ ଟାଇଟଲ ହାସଲ କରିଛନ୍ତି। ଆଉ ଗୋଟିଏ ଟାଇଟଲ ଜିତିଲେ ସେ ଅଷ୍ଟ୍ରେଲିଆର କିମ୍ବଦନ୍ତୀ ମହିଳା ଖେଳାଳି ମାର୍ଗରେଟ କୋର୍ଟଙ୍କର ୨୪ଟି ଗ୍ରାଣ୍ଡସ୍ଲାମ୍ ଟାଇଟଲ ହାସଲ ବିଶ୍ୱରେକର୍ଡର ସମକକ୍ଷ ହେବେ। ଅନ୍ୟପଟେ ଭେନସ ମାତ୍ର ୭ଟି ଗ୍ରାଣ୍ଡସ୍ଲାମ ଟାଇଟଲ ହାସଲ କରି ବହୁ ପଛରେ ରହିଛନ୍ତି। ଭେନସଙ୍କୁ ୪୦ ବର୍ଷ ହୋଇଥିବା ବେଳେ ସେରେନା ଆସନ୍ତାମାସରେ ୩୯ ବର୍ଷରେ ପଦାର୍ପଣ କରିବେ।
