ବାରିପଦା ଅଫିସ,୬।୧୦- ମୟୂରଭଞ୍ଜ ଜିଲାରେ ଏଥର ୧୭୮ ମଣ୍ଡପରେ ଜଗଜ୍ଜନନୀ ମା’ ଦୁର୍ଗାଙ୍କ ଶାରଦୀୟ ପୂଜା ଅନୁଷ୍ଠିତ ହେଉଛି। କେବଳ ବାରିପଦା ସହରରେ ୨୬ ଟି ସ୍ଥାନରେ ସୁସଜ୍ଜିତ ପୂଜାମଣ୍ଡପରେ ଶନିବାର ମହାସପ୍ତମୀ ପୂଜାରେ ଶ୍ରଦ୍ଧାଳୁଙ୍କ ବେଶ୍ ଗହଳ ଚହଳ ଦେଖିବାକୁ ମିଳିଛି। ସୁସଜ୍ଜିତ ତୋରଣ, ରଙ୍ଗିନ ଆଲୋକମାଳା ଓ ମିନା ବଜାର ପରିବେଶକୁ ଉତ୍ସବମୁଖର କରିଛି। ବାରିପଦା ସହରର ପଲବଣି ଗୋଳେଇ, ତୁଳସୀଚୌରା, ମୁର୍ଗବାଡି ଗୋଳେଇ ସମେତ ବିଭିନ୍ନ ପୂଜା ମଣ୍ଡପରେ ଏଥର ସ୍ବତନ୍ତ୍ର ତଥା ଆକର୍ଷଣୀୟ ତୋରଣମାନ ନିର୍ମାଣ କରାଯାଇଛି। ଶଙ୍ଖ, ଘଣ୍ଟ ଓ ମନ୍ତ୍ର ଧ୍ୱନିରେ ପ୍ରକମ୍ପିତ ହେଉଛି ପୂଜା ମଣ୍ଡପ ପରିବେଶ । ଏଥିସହ ଜିଲାର ବିଭିନ୍ନ ଶକ୍ତିପୀଠରେ ଶନିବାର ମହାଷ୍ଟମୀ ପୂଜା ସମ୍ପନ୍ନ ହୋଇଛି। ଖିଚିଂର ମା’ କିଚକେଶ୍ୱରୀ, ବାଙ୍ଗରିପୋଷିର ମା’ ଦ୍ୱାରଶୁଣି , ବାରିପଦାର ମା’ ଅମ୍ବିକା ଙ୍କ ମନ୍ଦିରରେ ଭକ୍ତଙ୍କ ଭିଡ ପରିଲକ୍ଷିତ ହୋଇଛି। ଏସବୁ ପୀଠରେ ମା’ ବିଭିନ୍ନ ବେଶରେ ଭକ୍ତଙ୍କୁ ଦର୍ଶନ ଦେଇଛନ୍ତି। ଅସ୍ଥାୟୀ ପୂଜାମଣ୍ଡପରେ ମହାଷ୍ଟମୀଠାରୁ ମହାଦଶମୀ ଯାଏ ପ୍ରବଳ ଭିଡ ହେବାର ସମ୍ଭାବନା ଥିବାରୁ ଜିଲା ପୋଲିସ ପକ୍ଷରୁ ସୁରକ୍ଷା ବ୍ୟବସ୍ଥାକୁ କଡାକଡ଼ି କରାଯାଇଛି । ଆଇନ ଏଥିପାଇଁ ସ୍ବତନ୍ତ୍ର ସ୍କ୍ବାର୍ଡ ଗଠନ କରାଯାଇଛି । ବାରିପଦା ସହରରେ ୧୦ ପ୍ଲାଟୁନ ଫୋର୍ସ ମୂତୟନ ରହିଛନ୍ତି। ସେହିପରି କରଞ୍ଜିଆ, ରାଇରଙ୍ଗପୁର, ଉଦଳା ଓ ବେତନଟୀ ପୋଲିସ ଉପଖଣ୍ଡରେ ୧୦ ପ୍ଲାଟୁନ ଫୋର୍ସ ମୂତୟନ ଥିବା ଜଣାପଡିଛି। ବାରିପଦା ସହରରେ ବିଭିନ୍ନ ସ୍ଥାନରେ ଯାନବାହନ ଚଳାଚଳ ଉପରେ କଟକଣା କରାଯାଇଛି।
