ଟିକିରି,୨୨ା୫:ପ୍ରତ୍ୟେକ ପଞ୍ଚାୟତରେ କରୋନା ସଂକ୍ରମଣକୁ ରୋକିବା ଏବଂ ସରପଞ୍ଚମାନଙ୍କୁ ଉତ୍ସାହିତ କରିବା ପାଇଁ ମୁଖ୍ୟମନ୍ତ୍ରୀ ରାଜ୍ୟର ସମସ୍ତ ସରପଞ୍ଚଙ୍କୁ ଜିଲାପାଳଙ୍କ କ୍ଷମତା ପ୍ରଦାନ କରିଛନ୍ତି। ଏହି କ୍ଷମତାର ଉପଯୋଗକରି ଅନେକ ସରପଞ୍ଚ ଚର୍ଚ୍ଚାର ପରିସରକୁ ମଧ୍ୟ ଆସିଛନ୍ତି। ତେବେ ରାୟଗଡ଼ା ଜିଲା କାଶୀପୁର ବ୍ଲକ୍ ଟିକିରି ପଞ୍ଚାୟତରେ ଦେଖିବାକୁ ମିଳିଛି ଭିନ୍ନ ପରିସ୍ଥିତି। ସୂଚନା ପ୍ରକାରେ, ଲକ୍ଡାଉନ୍ ଘୋଷଣା ପରଠାରୁ ଟିକିରି ସାପ୍ତାହିକ ହାଟ ବନ୍ଦ ରହିଥିଲା। ଏବେ ହାଟ ଖୋଲିବା ନିଷ୍ପତ୍ତି ହେବାପରେ ଜନସାଧାରଣଙ୍କ ଗହଳି ବଢ଼ିବାରେ ଲାଗିଛି। ସେହିପରି ରାଜ୍ୟ ବାହାରୁ ଶ୍ରମିକମାନଙ୍କ ଫେରିବା ପ୍ରକ୍ରିୟା ମଧ୍ୟ ଚାଲିଛି। ତେଣୁ ପଞ୍ଚାୟତରେ ସଂକ୍ରମଣ ଏଡ଼ାଇବା ପାଇଁ ଟିକିରି ସରପଞ୍ଚ କୁମାରୀ ପିଡିକା ଶୁକ୍ରବାର ହାଟକୁ ବନ୍ଦ କରିବା ସହ ଟିକିରିକୁ ଶଟ୍ଡାଉନ୍ କରିବା ପାଇଁ ନିଷ୍ପତ୍ତି ନେଇଥିଲେ। ଏ ନେଇ ସେ ଗୁରୁବାର ବ୍ଲକ୍ ପ୍ରଶାସନ ଏବଂ ଜିଲା ପ୍ରଶାସନର କେତେଜଣ ଅଧିକାରୀଙ୍କ ସହ ଆଲୋଚନା କରିବା ସହ ଲିଖିତ ଆକାରରେ ଜଣାଇଥିଲେ। ପରେ ଡାକବାଜି ଯନ୍ତ୍ର ମାଧ୍ୟମରେ ଏ ନେଇ ପଞ୍ଚାୟତରେ ପ୍ରଚାର ମଧ୍ୟ କରାଯାଇଥିଲା। ହେଲେ ଶେଷରେ ସରପଞ୍ଚଙ୍କୁ ନିରାଶ ହେବାକୁ ପଡ଼ିଛି। ଏ ନେଇ ଜିଲାପାଳଙ୍କ ସହ ଆଲୋଚନା କରାଯିବା ପରେ ସୂଚନା ଦିଆଯିବ ବୋଲି ସରପଞ୍ଚଙ୍କୁ ପ୍ରତିଶ୍ରୁତି ଦିଆଯାଇଥିଲେ ମଧ୍ୟ ପ୍ରଚାର ଶେଷ ପରେ ଉପଜିଲାପାଳ ପ୍ରତାପ ଚନ୍ଦ୍ର ପ୍ରଧାନ ଶଟ୍ଡାଉନ କାର୍ଯ୍ୟକାରୀ ପାଇଁ ଅନୁମତି ଦେଇ ନ ଥିବା ସରପଞ୍ଚ ପିଡିକା କହିଛନ୍ତି। ଗୁରୁତ୍ୱପୂର୍ଣ୍ଣ ବିଷୟ ହେଲା ଶଟ୍ଡାଉନ୍ ନେଇ ଗୁରୁବାର ପଞ୍ଚାୟତରେ ପ୍ରଚାର କରାଯାଇଥିବାରୁ ଶୁକ୍ରବାର ସାପ୍ତାହିକ ହାଟ ସମେତ ସମସ୍ତ ଦୋକାନ, ବଜାର ବନ୍ଦ ରହିଥିଲା। ଏହା ଏବେ ପଞ୍ଚାୟତରେ ଚର୍ଚ୍ଚାର ବିଷୟ ହୋଇଛି। ଅନ୍ୟପକ୍ଷରେ ପ୍ରଶାସନ ଅନୁମତି ନ ଦେବା ବିଷୟକୁ ନେଇ ସରପଞ୍ଚ ପିଡିକା ଦୁଃଖପ୍ରକାଶ କରିବା ସହ ମୁଖ୍ୟମନ୍ତ୍ରୀ ଜିଲାପାଳ କ୍ଷମତା ଫେରାଇ ନିଅନ୍ତୁ ବୋଲି କହିଛନ୍ତି।
