ଜାମଟିକ୍ରା, ୩୦।୬ (ଡି.ଏନ.ଏ): ବରଗଡ଼ ଜିଲା ଅତାବିରା ସରକାରୀ ବାଳିକା ହାଇସ୍କୁଲ ଏହେଦେ ନାନା ସମସିଆ ଘେରରେ ରହିଛେ। ଇଠାନେ ୧ମରୁ ୧୦ମ ଶ୍ରେଣୀ ତକ୍ ଶିକ୍ଷାଦାନ୍ର ବେବସ୍ତା ରହିଥିଲାବେଲେ ୨୮୦ ଛାତ୍ରୀଛାତ୍ର ପାଠ୍ପଢ଼ୁଛନ୍। ସେନ୍ତା ଛାତ୍ରୀଛାତ୍ରକୁଁ ଶିକ୍ଷାଦାନ ଲାଗି ସ୍କୁଲରେ ୧୬ ଝନ୍ ଶିକ୍ଷୟିତ୍ରୀ, ଶିକ୍ଷକ ରହିଛନ୍। ୧୯୬୫ ସାଲେ ଥାପନା ହେଇଥିବାର ଇ ସ୍କୁଲରେ ସେ ସମିଆରେ ପଢ଼ାକୁଠିମାନ ଟିନ୍ ଚଦର ଛାଉନି କରାଯାଇଥିଲା। ବହୁତ୍ ବଛର ହେବାର ଲାଗି ଏହେଦେ ଟିନ୍ ଚଦରମାନ୍ ମୁରଚା ଖାଇ କଣା ହେଇଗଲାନ। ଇଆଡ଼େ ଖରାହେଲେ ଟିନ୍ ଚଦର ଛାଉନିରେ ଛାତ୍ରୀଛାତ୍ର ସିଝି ଯାଉଥିଲାବେଲେ ବରଷା ହେଲେ କୁଠିମାନକେ ଦରୋଦରୋ ପାଏନ୍ ଗଲୁଛେ। ଏନ୍ତାଥି ପାଠ୍ପଢ଼ାରେ ବହୁତ୍ ଖଏଁଚା ହେଉଛେ। ଇଆଡ଼େ ଘରମାନେ ବହୁତ ପୁରନା ହେବାର ଲାଗି ସବୁ ବିପଦ୍ ଅବସ୍ତାରେ ରହିଛେ। ସେନ୍ତା ସ୍କୁଲରେ ତିଆର ହେଉଥିବାର ଗୁଟେ ସଭାକୁଠି ଦରଖଁଡ଼ିଆ ଅବସ୍ତାରେ ପଡ଼ିଛେ। ଛାତ୍ରୀଛାତ୍ରକଁର ସଂଖ୍ୟାକେ ଦେଖ୍ଲେ ସେ ହିସାବେ ଶୌଚାଲୟର ବେବସ୍ତା ନଁାଇଁନ। ସ୍କୁଲରେ ଅନେକ ଦିନୁ ୩ ଝନ୍ ଶିକ୍ଷକ, ରାଏତ୍ ଜୁଗାଲି ଆର ଜନେ ପୁରୁଷ ପିଅନ୍ ପଦବୀ ଖାଲି ପଡ଼ିଛେ। ଇ ସମସିଆ ବାବ୍ଦେ ସ୍କୁଲ କମିଟି ଅଧ୍ୟକ୍ଷ ବୈକୁଣ୍ଠ ସେଠକଁର ସମେତ ଉନିଅଁା ମେମରମାନେ ଜିଲା ଶିକ୍ଷା ଅଧ୍କାରୀକୁଁ କହିଥିଲେ ବି କିଛି ଲାଭ ନାଇଁ ହେବାର। ଇ ବାବ୍ଦେ ସ୍କୁଲର ପ୍ରଧାନଶିକ୍ଷକ ସୁରେନ୍ଦ୍ର ବେହେରାକୁଁ ପଚରାଲାରୁ ଆମେ ଖରାରେ ସିଝି ଯାଉଛୁଁ ଆର ବରଷାରେ ଭିଜୁଛୁଁ। ସମସିଆ ବାବ୍ଦେ ଡିଇଓକୁଁ ବି ଜନେଇଛୁଁ ବଲି ସେ କହିଥିଲେ।
