ପୁରୀ ଅଫିସ,୨୭।୧୨: ଶ୍ରୀମନ୍ଦିର ସୁରକ୍ଷା ଓ ସୌନ୍ଦର୍ଯ୍ୟକରଣ ସକାଶେ ମେଘନାଦ ପାଚେରିକୁ ଲାଗି ୭୫ ମିଟର ପରିଧି ମଧ୍ୟରେ ସବୁ ନିର୍ମାଣ ଉଚ୍ଛେଦ ପାଇଁ ନିଷ୍ପତ୍ତି ହୋଇଛି। ଏହାର କାମ ମଧ୍ୟ ଆରମ୍ଭ ହୋଇଯାଇଛି। ୫ଟି ମଠ, କେତେକ ଘରୋଇ ଓ ବ୍ୟବସାୟିକ କୋଠା ଏବଂ ଭିତର ସେବାୟତ ନିଯୋଗ କାର୍ଯ୍ୟାଳୟ ଭଙ୍ଗାଯାଇଛି। କିନ୍ତୁ ନୂଆବର୍ଷକୁ ଦୃଷ୍ଟିରେ ରଖି ପ୍ରଶାସନ ପକ୍ଷରୁ ବର୍ତ୍ତମାନ ଉଚ୍ଛେଦ କାର୍ଯ୍ୟ ବନ୍ଦ ରଖାଯାଇଛି। ନୂଆବର୍ଷରେ ଲକ୍ଷ ଲକ୍ଷ ଭକ୍ତ ଓ ପର୍ଯ୍ୟଟକ ପୁରୀକୁ ଆସିବେ । ତେଣୁ ଭକ୍ତଙ୍କ ଲାଗି ସୁବିଧା ଏବଂ ସୌନ୍ଦର୍ଯ୍ୟକରଣ ଉପରେ ଏବେ ଫୋକସ ଦେଇଛି ପ୍ରଶାସନ। ଏଥିପାଇଁ ଏକାଧିକ କାମ ମଧ୍ୟ ଜାରି ରହିଛି। ନୂଆବର୍ଷ ପରେ ପୁଣି ସୁରକ୍ଷା ଜୋନରେ ଉଚ୍ଛେଦ ଅଭିଯାନ ଜୋର୍ ଧରିବ।
ସୁରକ୍ଷା ଜୋନରେ ଗତ ୨୧ତାରିଖଠାରୁ ଉଚ୍ଛେଦ ବନ୍ଦ ରହିଛି। ତେବେ ସୌନ୍ଦର୍ଯ୍ୟକରଣ କାମ ଚାଲିଛି। ଶ୍ରୀମନ୍ଦିର ଚତୁଃପାର୍ଶ୍ୱକୁ ସବୁଜିମା ରୂପ ଦେବା ଲାଗି କୁଣ୍ଡ ସମେତ ରାଜମହେନ୍ଦ୍ରୀ, ବାଙ୍ଗାଲୋରରୁ ଗଛ ଅଣାଯାଇଛି। ବିଶେଷକରି ସିଂହଦ୍ୱାର ସମ୍ମୁଖ ଭାଗକୁ ଅଧିକ ଆକର୍ଷଣୀୟ କରାଯାଉଛି। ଏମାର ମଠ ଉଚ୍ଛେଦ ସ୍ଥଳଠୁ ଆରମ୍ଭ କରି ମଙ୍ଗୁ ମଠ, ଲଙ୍ଗୁଳି ମଠ ଫାଙ୍କା ଜାଗାରେ ଗଛଗୁଡ଼ିକୁ ସଜାଇ ରଖାଯାଇଛି। ସେହିପରି ସିଂହଦ୍ୱାର ଚକଡ଼ା ଦୁଇପାର୍ଶ୍ୱ, ଛାଉଣୀ ମଠଠାରୁ କାକୁଡିଖାଇ ମନ୍ଦିର ପର୍ଯ୍ୟନ୍ତ ମେଘନାଦ ପାଚେରି କଡ଼ରେ ଗଛଗୁଡ଼ିକ ରଖାଯାଇଛି। ଏମାର ମଠ ଚକଡ଼ାରେ ବି ଫୁଲ କୁଣ୍ଡ ଶୋଭା ପାଉଥିବାବେଳେ ନୂଆ ବ୍ୟାରିକେଡ କଡରେ ବଡ ବଡ ଗଛ ରଖାଯାଇଛି। ଏମାର ମଠ ଜାଗାରେ ଦୁଇଚକିଆ ଗାଡ଼ିି ପାର୍କିଂ ବ୍ୟବସ୍ଥା ହୋଇଛି। ମଙ୍ଗୁ ମଠ ଉଚ୍ଛେଦ ସ୍ଥଳକୁ ସମତଳ କରାଯାଇ ଟାଇଲ ବିଛାଯାଇଛି। ସାନଛତା ମଠ ଉଚ୍ଛେଦ ସ୍ଥଳରେ ସ୍ଥାୟୀ ଜୋତା ଷ୍ଟାଣ୍ଡ ପାଇଁ କାମ ଚାଲିଛି। ଶୁକ୍ରବାର ସୁଦ୍ଧା ଏହା ସରିବାର ସମ୍ଭାବନା ଅଛି। ପାନୀୟଜଳ, ଶୌଚାଳୟ, ମୋବାଇଲ ରଖିବା ବ୍ୟବସ୍ଥା ବି କରାଯାଇଛି। ନୂତନ ବ୍ୟାରିକେଡ କାମ ସରି ଶେଡ୍ କାମ ଚାଲିଛି। ଶେଡ୍ ପ୍ରସ୍ତୁତ ହେବା ପରେ ବ୍ୟାରିକେଡ ଖଞ୍ଜାଯିବ ଏବଂ ତଳେ କାର୍ପେଟ ପଡ଼ିବ। ବରିଷ୍ଠ ନାଗରିକ, ମହିଳା ଏବଂ ପୁରୁଷଙ୍କ ପାଇଁ ସ୍ବତନ୍ତ୍ର ଧାଡ଼ି ରହିବ। ନୂତନ ବ୍ୟାରିକେଡକୁ ଲାଗି ମନ୍ଦିର ଆଡକୁ ପ୍ରାୟ ୫୨ ଫୁଟ ଚଉଡା ଏବଂ ୨୭୦ ଫୁଟ ଲମ୍ବର ଝୋଟି ଚିତା ଅଙ୍କାଯାଉଛି। ବକୁଳ ଫାଉଣ୍ଡେଶନର ଚିତ୍ର ଶିଳ୍ପୀମାନେ ଏହି ପାରମ୍ପରିକ ଝୋଟିଚିତା ଆଙ୍କୁଛନ୍ତି। ଏ ସମ୍ପର୍କରେ ଉପଜିଲାପାଳ ଭବତାରଣ ସାହୁ କହିଛନ୍ତି, ସୁରକ୍ଷା ଜୋନରେ ବର୍ତ୍ତମାନ ଉଚ୍ଛେଦ ସାମୟିକ ବନ୍ଦ ରଖାଯାଇଛି। ନୂଆବର୍ଷ ପରେ ପୁନଶ୍ଚ ଏହା ଆରମ୍ଭ କରାଯିବ। ନୂଆବର୍ଷରେ ପୁରୀକୁ ଆସୁଥିବା ଶ୍ରଦ୍ଧାଳୁ ଏବଂ ପର୍ଯ୍ୟଟକଙ୍କୁ ନୂଆ ଅନୁଭୂତି ଦେବା ପାଇଁ ସୌନ୍ଦର୍ଯ୍ୟକରଣ ଏବଂ ଅନ୍ୟାନ୍ୟ ଆନୁଷଙ୍ଗିକ ସୁବିଧା କରାଯାଉଛି।
