ବାରିପଦା ଅଫିସ,୧୨ା୮- ପରିବେଶ ସୁରକ୍ଷା ପାଇଁ ସଂକଳ୍ପବଦ୍ଧ ସଂଗଠନ ତଥା ପ୍ରକୃତିମିତ୍ର ପୁରସ୍କାରରେ ପୁରସ୍କୃତ ସବୁଜ ମୟୂରଭଞ୍ଜ ଓ ଲଳିତ କଳା ଏକାଡେମୀ ଏବଂ ସୁର ଭାରତୀ ସଂଗୀତ ପରିଷଦ ପକ୍ଷରୁ ଚିତ୍ରକଳା ଅନୁଷ୍ଠାନ ସ୍କୁଲ ଅଫ ଆର୍ଟ ଆଣ୍ଡ କ୍ରାଫ୍ଟ ସହଯୋଗରେ ପରିବେଶ ସୁରକ୍ଷାର ବାର୍ତ୍ତା ନେଇ ଏକ ଚିତ୍ରକଳା ପ୍ରତିଯୋଗତା ଅନୁଷ୍ଠିତ ହୋଇଯାଇଛି। ୫୨୨ ଜଣ ଶିଶୁ ଚିତ୍ର ଶିଳ୍ପୀମାନଙ୍କୁ ନେଇ ଆୟୋଜିତ ଏହି କାର୍ଯ୍ୟକ୍ରମରେ ସମସ୍ତ ଚିତ୍ର ଶିଳ୍ପୀ ପରିବେଶ ସୁରକ୍ଷାର ଶପଥ ପାଠ କରିଥିଲେ। କ୍ୟାନଭାସ୍ରେ ଶିଶୁ ଚିତ୍ର ଶିଳ୍ପୀମାନେ ବୃକ୍ଷରୋପଣ, ବୃକ୍ଷ ସୁରକ୍ଷା ତଥା ପଲିଥିନ ବର୍ଜନ ଲାଗି ବାର୍ତ୍ତା ଦେଇଥିଲେ। ସ୍କୁଲର ସମ୍ପାଦିକା ପ୍ରଣତୀ ପଟ୍ଟନାୟକଙ୍କ ସଭାପତିତ୍ୱରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ସବୁଜ ମୟୂରଭଞ୍ଜର ସଭାପତି ଦେବାଶିଷ ମହାନ୍ତିି ମୁଖ୍ୟଅତିଥି ଭାବେ ଯୋଗଦେଇ ପରିବେଶ ସୁରକ୍ଷା ସମସ୍ତଙ୍କର ଦାୟିତ୍ୱ ବୋଲି ସୂଚନା ଦେଇ ଶିମିଳିପାଳର ସୁରକ୍ଷା ପାଇଁ ସମସ୍ତେ ସଙ୍କଳ୍ପବଦ୍ଧ ବୋଲି କହିଥିଲେ। ସ୍କୁଲର ନିର୍ଦ୍ଦେଶକ ତଥା ଚିତ୍ରଶିଳ୍ପୀ ଶ୍ୟାମା ପ୍ରସାଦ ପଟ୍ଟନାୟକ ସମ୍ମାନିତ ଅତିଥି ଭାବେ ଯୋଗଦେଇ ଛାତ୍ରୀଛାତ୍ରଙ୍କୁ ଉତ୍ସାହିତ କରିଥିଲେ। ଛାତ୍ର ନେତା ସେଖ ଅବଦୁଲ ହବିବ, ସଚିନ ମହାପାତ୍ର, ଆଶୀର୍ବାଦ ଦାସ, ଜ୍ୟୋତିରଞ୍ଜନ ମହାପାତ୍ର, ସଞ୍ଜୟ ମାରାଣ୍ଡି, ମାନସ ରାଉତ, ସନମ କାୟନାତ, ମଧୁସ୍ମିତା ବାରିକ, ସୁମନ ଗିରି, ଅଙ୍କିତ ଚକଲଦାର ପ୍ରମୁଖ ଉପସ୍ଥିତ ରହି ସହଯୋଗ କରିଥିଲେ।
