ଶିଶୁମାନଙ୍କ ସୁରକ୍ଷା, ସେମାନଙ୍କ ଉଜ୍ଜ୍ୱଳ ଭବିଷ୍ୟତ ପାଇଁ କେନ୍ଦ୍ର ଓ ରାଜ୍ୟ ସରକାର ବହୁ ଅର୍ଥ ଖର୍ଚ୍ଚ କରୁଛନ୍ତି। ମାତ୍ର କେତେକ କ୍ଷେତ୍ରରେ ଶିଶୁମାନଙ୍କ ଭବିଷ୍ୟତ ବାଟବଣା ହୋଇଯାଉଛି । ଅଧିକାଂଶ ଶିଶୁ ଅଧାରୁ ପାଠ ଛାଡୁଥିବା ଦେଖିବାକୁ ମିଳୁଛି। ମାଲକାନଗିରି ଜିଲାରେ ଶିଶୁ ସୁରକ୍ଷା ବିଭାଗର ସର୍ଭେ ଅନୁଯାୟୀ ଜିଲାରେ ୮ ହଜାର ଅନାଥ ଶିଶୁ ଅଛନ୍ତି। ସେମାନଙ୍କ ମଧ୍ୟରୁ ୧୩୫୪ ଜଣ ସମ୍ପୂର୍ଣ୍ଣ ମା’ବାପା ଛେଉଣ୍ଡ । ଅନ୍ୟ ଶିଶୁମାନଙ୍କ ମଧ୍ୟରୁ କାହାର ବାପା ଅଛନ୍ତି ତ କାହାର ମା’ ନାହାନ୍ତି। ମା’ କିମ୍ବା ବାପା ଅଥବା ସମ୍ପର୍କୀୟଙ୍କ ନିକଟରେ ରହୁଥିବା ଶିଶୁମାନେ ସେମାନଙ୍କ ସମ୍ପର୍କୀୟଙ୍କ ସହ ଜିଲା ଏବଂ ରାଜ୍ୟ ବାହାରକୁ ଦାଦନ ଖଟିବା ପାଇଁ ଯାଉଛନ୍ତି। ହେଲେ ସେମାନଙ୍କୁ ନାନା ନିର୍ଯାତନା ସହିବାକୁ ପଡୁଛି । ବିଶେଷ କରି ରାଜ୍ୟ ବାହାରକୁ ଯାଉଥିବା ଶିଶୁଶ୍ରମିକମାନେ ଅର୍ଥ ବଦଳରେ ମାଡ଼ଗାଳି ଖାଇ ଫେରୁଛନ୍ତି ।
ଅନ୍ୟପକ୍ଷେ ରାଜ୍ୟ ବାହାରକୁ ଦାଦନ ଖଟିବାକୁ ଯାଉଥିବା ଶିଶୁମାନଙ୍କ ପାଠପଢା ଅଧାରୁ ବନ୍ଦ ହୋଇଯାଉଛି । ବିଶେଷ କରି ବିଭିନ୍ନ ସ୍କୁଲରେ ପାଠ ପଢୁଥିବା ଗ୍ରାମାଞ୍ଚଳର ଶିଶୁଙ୍କ ପରିବାର ଧାନ ଅମଳ ପରେ ରାଜ୍ୟ ବାହାରକୁ ଦାଦନ ଖଟିବାକୁ ଯାଇଥାନ୍ତି। ଜିଲାରେ ଚାଇଲ୍ଡ ଲାଇନ୍ ଦ୍ୱାରା ୨୦୧୭ରୁ ୨୦୧୯ ମସିହା ମଧ୍ୟରେ ୯୪୯ ଶିଶୁଶ୍ରମିକ ଉଦ୍ଧାର ହୋଇଛନ୍ତି। ସେମାନଙ୍କ ମଧ୍ୟରୁ ୭୭୬ ଶିଶୁଙ୍କୁ ଶିଶୁ ମଙ୍ଗଳ ସମିତିକୁ ହସ୍ତାନ୍ତର କରାଯାଇଥିଲା। ଶିଶୁ ମଙ୍ଗଳ ସମିତି ଏହି ଶିଶୁମାନଙ୍କ ସମ୍ପର୍କରେ ତଥ୍ୟ ସଂଗ୍ରହ କରି ସେମାନଙ୍କ ଥଇଥାନ ଓ ଶିକ୍ଷା ପାଇଁ ଶିଶୁ ସୁରକ୍ଷା ବିଭାଗକୁ ହସ୍ତାନ୍ତର କରିଛି। ଊଦ୍ଧାର ଶିଶୁମାନଙ୍କ ଶିକ୍ଷା ଗ୍ରହଣ ଲାଗି ବିଭିନ୍ନ ବିଦ୍ୟାଳୟରେ ବ୍ୟବସ୍ଥା କରାଯାଇଛି। ଜିଲାରେ ପରିବର୍ତ୍ତନ ଶିଶୁ ଗୃହରେ ୫୫ ଜଣ, କୋରୁକୋଣ୍ଡା ନୀଳାଚଳ ଶିଶୁ ଗୃହରେ ୩୫ଜଣ, ଟାଗୋର ସୋସାଇଟି ମାର୍କେଲଗୁଡା ଶିଶୁ ଗୃହରେ ୫୦ ଜଣ ଏବଂ ନାୟକ ଗୁଡାସ୍ଥିତ ଇର୍ମାବାକା ଅନ୍ଧ ମୂକ ବିଦ୍ୟାଳୟରେ ୭୦ ଜଣ ଶିଶୁ ଅଛନ୍ତି। ଯେଉଁ ଶିଶୁମାନେ ସେମାନଙ୍କ ମା’ କିମ୍ବା ବାପା ଅଥବା ସମ୍ପର୍କୀୟଙ୍କ ନିକଟରେ ଅଛନ୍ତି ସେମାନଙ୍କ ଶିକ୍ଷାଗ୍ରହଣ ଏବଂ ଭବିଷ୍ୟତ ନିରାପଦ ପାଇଁ ପ୍ରଶାସନ ପକ୍ଷରୁ ପଦକ୍ଷେପ ଗ୍ରହଣ କରାଯିବା ଉପରେ ଗୁରୁତ୍ୱ ଦେବାକୁ ଦାବି ହୋଇଛି । ଏହି ଶିଶୁମାନଙ୍କ ଭବିଷ୍ୟତ ପ୍ରତି ଜିଲା ପ୍ରଶାସନ ଗୁରୁତ୍ୱ ଦେଲେ ସେମାନେ ‘ଶ୍ରମିକ’ ହେବାରୁ ରକ୍ଷା ପାଇପାରନ୍ତେ ବୋଲି ବୁଦ୍ଧିଜୀବୀମାନେ ମତ ଦେଇଛନ୍ତି। କେବଳ ଜିଲା ପ୍ରଶାସନ ନୁହେଁ ସବୁ କ୍ଷେତ୍ରରେ ଏଥିପାଇଁ ଉଦ୍ୟମ ହେବା ଉଚିତ ବୋଲି ସେମାନେ କହିଛନ୍ତି।
