ନୂଆଦିଲ୍ଲୀ,୩୦।୫: ଦ୍ୱିତୀୟ ଥର ଲାଗି ଦେଶର ଶାସନ ଭାର ସମ୍ଭାଳିବାକୁ ଯାଉଛନ୍ତି ନରେନ୍ଦ୍ର ଦାମୋଦର ଦାସ ମୋଦି। ଗୁରୁବାର ସନ୍ଧ୍ୟାରେ ଶପଥ ଗ୍ରହଣ ସମାରୋହ ଅନୁଷ୍ଠିତ ହେବାକୁ ଥିବା ବେଳେ ସକାଳୁ ମୋଦି ମହାତ୍ମା ଗାନ୍ଧୀ ଓ ଅଟଳ ବିହାରୀ ବାଜପେୟୀଙ୍କୁ ଶ୍ରଦ୍ଧାଞ୍ଜଳି ଜ୍ଞାପନ କରିଛନ୍ତି। ଏହାପରେ ସେ ଟୁଇଟରରେ କିଛି ଫଟୋ ଶେୟାର କରି ବାଜପେୟୀଙ୍କୁ ମନେ ପକାଇଛନ୍ତି। ମୋଦି ଲେଖିଛନ୍ତି ଆଜି ଯଦି ବାଜପେୟୀ ଥାଆନ୍ତେ ତେବେ ବହୁତ ଖୁସି ହୋଇ ଥାଆନ୍ତେ। ତେବେ ବାଜପେୟୀଙ୍କ ଆଦର୍ଶ ଆମକୁ ଗରିବ ତଥା ଅବହେଳିତ ଲୋକମାନଙ୍କ ଜୀବନରେ ପରିବର୍ତ୍ତନ ଆଣିବା ଭଳି ଶାସନ ବ୍ୟବସ୍ଥା ଲାଗୁ କରିବାକୁ ପ୍ରେରଣା ଦେବ ବୋଲି ସେ କହିଛନ୍ତି। ଟୁଇଟରରେ ସେ ଆହୁରି ମଧ୍ୟ ଲେଖିଛନ୍ତି କି ଚଳିତ ବର୍ଷ ଆମେ ବାପୁଙ୍କର ୧୫୦ ତମ ଜୟନ୍ତୀ ପାଳନ କରିବାକୁ ଯାଉଛେ। ତେଣୁ ତାଙ୍କରି ଆଦର୍ଶରେ ଆମେ ଅନୁପ୍ରାଣିତ ହୋଇ ଦେଶ ଶାସନ କରିବାକୁ ଶକ୍ତି ମିଳିବ।
