ନୂଆଦିଲ୍ଲୀ: ଭାରତର ପ୍ରଥମ ଉପପ୍ରଧାନମନ୍ତ୍ରୀ ତଥା ଗୃହମନ୍ତ୍ରୀ ସର୍ଦ୍ଦାର ବଲ୍ଲଭ ଭାଇ ପଟେଲଙ୍କ ସ୍ମୃତିରେ ଗୁଜରାଟଠାରେ ତିଆରି ହୋଇଛି ଷ୍ଟାଚ୍ୟୁ ଅଫ୍ ୟୁନିଟି। ଏହା ଦୁନିଆର ସବୁଠୁ ଉଚ୍ଚ ପ୍ରତିମୂର୍ତ୍ତି। ୧୮୨ ମିଟର ଉଚ୍ଚତା ବିଶିଷ୍ଟ ଏହି ମୂର୍ତ୍ତିକୁ ଦେଖିବା ପାଇଁ ପ୍ରତିଦିନ ଦେଶବିଦେଶରୁ ପର୍ଯ୍ୟଟକଙ୍କ ଭିଡ଼ ଜମୁଛି। ବର୍ଷକ ପୂର୍ବେ ଅନାବରଣ କରାଯାଇଥିବା ଏହି ମୂର୍ତ୍ତି ଆମେରିକାର ୧୩୩ ବର୍ଷ ପୁରୁଣା ଷ୍ଟାଚ୍ୟୁ ଅଫ୍ ଲିବର୍ଟିଠାରୁ ଅଧିକ ଲୋକପ୍ରିୟ ହେବାରେ ଲାଗିଛି। ଦୈନିକ ଏଠାକୁ ପାଖାପାଖି ୧୫ ହଜାର ପର୍ଯ୍ୟଟକ ଆସୁଛନ୍ତି। ୧ ନଭେମ୍ବର ୨୦୧୮ରୁ ୩୧ ଅକ୍ଟୋବର ୨୦୧୯ ମଧ୍ୟରେ ପର୍ଯ୍ୟଟକଙ୍କ ସଂଖ୍ୟା ୭୪ ପ୍ରତିଶତ ବୃଦ୍ଧି ପାଇଥିଲା। ଏବେ ପ୍ରତିଦିନ ପ୍ରାୟ ୧୫,୦୩୬ ଜଣ ପର୍ଯ୍ୟଟକ ଷ୍ଟାଚ୍ୟୁ ଅଫ୍ ୟୁନିଟି ଦେଖିବାକୁ ଆସୁଛନ୍ତି ବୋଲି ସର୍ଦ୍ଦାର ସରୋବର ନର୍ମଦା ନିଗମ ଲିମିଟେଡ ପକ୍ଷରୁ କୁହାଯାଇଛି। ଏଥିସହ ସପ୍ତାହ ଶେଷ ବେଳକୁ ପର୍ଯ୍ୟଟକଙ୍କ ସଂଖ୍ୟା ୨୨,୪୩୦ରେ ପହଞ୍ଚୁଛି। ନ୍ୟୁୟର୍କର ଷ୍ଟାଚ୍ୟୁ ଅଫ୍ ଲିବର୍ଟି ଦେଖିବା ପାଇଁ ପ୍ରତିଦିନ ପ୍ରାୟ ୧୦ହଜାର ପର୍ଯ୍ୟଟକ ଆସିଥାନ୍ତି।
