ବ୍ରହ୍ମପୁର ଅଫିସ,୧୮ା୧୨- ଗଞ୍ଜାମ ଜିଲାରେ ଲମ୍ବିବାରେ ଲାଗିଛି ନକଲି ଶିକ୍ଷକଙ୍କ ତାଲିକା। ନିଯୁକ୍ତି ବେଳେ ନକଲି ଶିକ୍ଷାଗତ ସାର୍ଟିଫିକେଟ୍ ଦାଖଲ କରିଥିବା ଶିକ୍ଷୟିତ୍ରୀ ଶିକ୍ଷକ ଏବେ ଶିକ୍ଷା ବିଭାଗ ପକ୍ଷରୁ ଯାଞ୍ଚ ବେଳେ ଧରାପଡୁଛନ୍ତି। ଗତ ଏକ ମାସ ମଧ୍ୟରେ ୧୬ ଶିକ୍ଷୟିତ୍ରୀ ଶିକ୍ଷକ ଧରା ପଡ଼ିଥିବା ବେଳେ ମଙ୍ଗଳବାର ପୁଣି ଆଉ ୫ ଧରାପଡିଛନ୍ତି। ଫଳରେ ଏହି ସଂଖ୍ୟା ଏବେ ୨୧ରେ ପହଞ୍ଚିଛି। ସେମାନଙ୍କ ବିରୋଧରେ ଥାନାରେ ଏତଲା ଦିଆଯିବାକୁ ମଙ୍ଗଳବାର ଜିଲା ଶିକ୍ଷା ଅଧିକାରୀଙ୍କ କାର୍ଯ୍ୟାଳୟ ପକ୍ଷରୁ ବ୍ଲ୍ଳକ ଶିକ୍ଷା ଅଧିକାରୀମାନଙ୍କୁ ନିର୍ଦ୍ଦେଶ ଦିଆଯାଇଥିବା ସୂଚନା ମିଳିଛି। ସୂଚନା ପ୍ରକାରେ, ଗତ ୧ ମାସ ଧରି ଜିଲାର ଶିକ୍ଷକଙ୍କ ଶିକ୍ଷାଗତ ପ୍ରମାଣ ପତ୍ର ଯାଞ୍ଚ ନେଇ ପ୍ରକ୍ରିୟା ଚାଲୁରହିଛି। ବେଗୁନିଆପଡା, କବିସୂର୍ଯ୍ୟନଗର, ଶେରଗଡ ବ୍ଲକ ଶିକ୍ଷୟିତ୍ରୀ, ଶିକ୍ଷକଙ୍କ ସିଟି ସାର୍ଟିଫିକେଟଗୁଡିକୁ କଟକସ୍ଥିତ ବୋର୍ଡ ଅଫ ସେକେଣ୍ଡାରୀ ଏଜୁକେଶନ କାର୍ଯ୍ୟାଳୟକୁ ଯାଞ୍ଚ ପାଇଁ ପଠାଯାଇଥିଲା। ଯାଞ୍ଚ ବେଳେ କେତେକ ଶିକ୍ଷୟିତ୍ରୀ ଶିକ୍ଷକଙ୍କ ସାର୍ଟିଫିକେଟ ଜାଲ ଥିବା ଜଣାପଡିଥିଲା। ଉପରୋକ୍ତ ବ୍ଲକର ୫ ଶିକ୍ଷୟିତ୍ରୀ ଶିକ୍ଷକଙ୍କ ସିଟି ସାର୍ଟିଫିକେଟ ବୋର୍ଡ ସାର୍ଟିଫିକେଟ ତାଲିକା ମଧ୍ୟରେ ସାମିଲ ନ ଥିବା ବୋର୍ଡ ସଚିବଙ୍କ ପକ୍ଷରୁ ସୂଚନା ମିଳିଥିଲା। ସଚିବଙ୍କ ସୂଚନା ପରେ ଉପରୋକ୍ତ ବ୍ଲକର ୫ ସହକାରୀ ଶିକ୍ଷୟିତ୍ରୀ ଶିକ୍ଷକ ନକଲି ଶିକ୍ଷକତା ପ୍ରମାଣପତ୍ର ପ୍ରଦାନ କରିଥିବା ଜଣାପଡିଥିଲା। ସେମାନେ ହେଲେ ବେଗୁନିଆପଡା ବ୍ଲକ ଲାଠୁଳି ରଘୁନାଥପୁର ପ୍ରାଥମିକ ବିଦ୍ୟାଳୟର ସହକାରୀ ଶିକ୍ଷୟିତ୍ରୀ ସୁଜାତା ପଣ୍ଡା ଓ ମଙ୍ଗଳପୁର ପ୍ରାଥମିକ ବିଦ୍ୟାଳୟର ସହକାରୀ ଶିକ୍ଷକ ପରମାନନ୍ଦ ସାହୁ, କବିସୂର୍ଯ୍ୟନଗର ରିସିପୁର ଉନ୍ନିତ ବାଳିକା ଉଚ୍ଚ ବିଦ୍ୟାଳୟର ସହକାରୀ ଶିକ୍ଷକ ଭିକାରି ଚରଣ ସାହୁ, ଶେରଗଡ ବ୍ଲ୍ଳକ ପି. ଖରିଡା ନୋଡାଲ ଉଚ୍ଚ ପ୍ରାଥମିକ ବିଦ୍ୟାଳୟର ସଞ୍ଜୟ କୁମାର ଖଟାଇ ଓ କେଏମ୍ ପ୍ରାଥମିକ ବିଦ୍ୟାଳୟ ବନ୍ଧଗୁଡାର ସହକାରୀ ଶିକ୍ଷକ ଭଗବାନ ମହାନ୍ତି। ଏହି ନକଲି ଶିକ୍ଷୟତ୍ରୀ ଶିକ୍ଷକଙ୍କ ବିରୋଧରେ ଥାନାରେ ଏତଲା ଦେବା ପାଇଁ ଜିଲା ଶିକ୍ଷାଧିକାରୀଙ୍କ କାର୍ଯ୍ୟାଳୟ ପକ୍ଷରୁ ବ୍ଲକ ଶିକ୍ଷା ଅଧିକାରୀମାନଙ୍କୁ ନିର୍ଦ୍ଦେଶ ଦିଆଯାଇଥିବା ଡିଇଓ ଡ. ସନାତନ ପଣ୍ଡା ସୂଚାଇଛନ୍ତି। ସୂଚନାଯୋଗ୍ୟ, ପୂର୍ବରୁ ଧରାକୋଟ ବ୍ଲକର ୭ ଶିକ୍ଷୟିତ୍ରୀ ଶିକ୍ଷକଙ୍କ ସମେତ ବିିଭିନ୍ନ ବ୍ଲ୍ଳକର ୯ ଜଣ ନକଲି ଶିକ୍ଷକ ଗତ ନଭେମ୍ବର ମାସରେ ମୋଟ ୧୬ ଜଣ ଧରାପଡ଼ିଥିଲେ। ସେମାନଙ୍କ ବିରୋଧରେ ସମ୍ପୃକ୍ତ ଥାନାରେ ଏତଲା ଦିଆଯାଇଥିଲେ ସୁଦ୍ଧା ଏପର୍ଯ୍ୟନ୍ତ କେହି ଗିରଫ ହୋଇନାହାନ୍ତି। ପୁଣି ମଙ୍ଗଳବାର ଆଉ ୫ ଜଣ ଶିକ୍ଷକଙ୍କ ବିରୋଧରେ ଏତଲା ପାଇଁ ନିର୍ଦ୍ଦେଶ ଦିଆଯାଇଛି। ଇତିମଧ୍ୟରେ ୧୩ ଜଣ ଶିକ୍ଷକ ଇସ୍ତଫା ଦେଇଥିବା ମଧ୍ୟ ସୂଚନା ମିଳିଛି।
