ଗୋପାଳପୁର,୨୯ା୧୨-ଦିନକୁ ଦିନ ସାଇବରର ଠକେଇ ବଢୁଛି। ବିଭିନ୍ନ ସମୟରେ ମିଥ୍ୟା ଫୋନ୍ କଲ ପାଇ ଲୋକଙ୍କର ଲକ୍ଷଲକ୍ଷ ଟଙ୍କା ଚାଲିଯାଉଛି। ଏଭଳି ଏକ ଘଟଣା ଘଟିଛି ଗଞ୍ଜାମ ଜିଲାରେ। ଲଟେରୀରେ କାର ଜିତିବା ଆଶାରେ ଜଣେ ବ୍ୟକ୍ତି ଲକ୍ଷାଧିକ ଟଙ୍କା ଦେଇ ଠକେଇର ଶିକାର ହୋଇଥିବା ଶନିବାର ଥାନାରେ ଅଭିଯୋଗ ହୋଇଛି। ସେ ହେଲେ ଗଞ୍ଜାମ ଜିଲା ଗୋଳନ୍ଥରା ଥାନା ଅନ୍ତର୍ଗତ ଷୋଳବିନ୍ଧା ଗ୍ରାମର ରବୀନ୍ଦ୍ର ମହାନ୍ତି। ରବୀନ୍ଦ୍ରଙ୍କ ଏତଲା କ୍ରମେ ନଂ. ୩୨୯/୧୯ରେ ମାମଲା ରୁଜୁ କରି ପୋଲିସ ତଦନ୍ତ ଚଳାଇଛି।
ପ୍ରକାଶ ଯେ, ଗତ ୨୪ ତାରିଖରେ ରବୀନ୍ଦ୍ରଙ୍କ ମୋବାଇଲ ଫୋନକୁ ଏକ କଲ ଆସିଥିଲା। ବ୍ୟକ୍ତି ଜଣକ ନିଜକୁ ସ୍ନାପ୍ଡିଲ୍ ସଂସ୍ଥାର କର୍ମଚାରୀ ବୋଲି ପରିଚୟ ଦେଇ ଖ୍ରୀଷ୍ଟମାସ୍ରେ ଆପଣଙ୍କ ଫୋନ ନମ୍ବରକୁ ବମ୍ପର ଲଟେରୀ ବିଜେତା ଘୋଷଣା କରାଯାଇଛି। ଆପଣ ଏକ କାର ଜିତିଛନ୍ତି । ଏ ବାବଦରେ ଟଙ୍କା ମଧ୍ୟ ନେଇପାରିବେ ବୋଲି ରବୀନ୍ଦ୍ରଙ୍କୁ କହିଥିଲେ। ସେ ଟଙ୍କା ନେବାକୁ ରାଜି ହୋଇ ତାଙ୍କୁ ଆଧାର କାର୍ଡ, ପାନ କାର୍ଡ ଓ ବ୍ୟାଙ୍କ ଆକାଉଣ୍ଟ ନମ୍ବର ଦେଇଥିଲେ। ସମ୍ପୃକ୍ତ ବ୍ୟକ୍ତି ଏହାର ପ୍ରୋସେସିଂ ବାବଦରେ ୬,୫୦୦ ଟଙ୍କା ଗୁଗୁଲ୍ ପେରେ ଡିପୋଜିଟ କରିବାକୁ କହିଥିଲେ। ପରେ ରବୀନ୍ଦ୍ର ଉକ୍ତ ଆକାଉଣ୍ଟରେ ଟଙ୍କା ପଠାଇଥିଲେ। ୨୫ ତାରିଖରେ ଆପଣ ପଠାଇଥିବା ଟଙ୍କା ଆକାଉଣ୍ଟକୁ ଆସିନାହିଁ। ଜିଏସ୍ଟି ବାବଦରେ ୧୬,୮୦୦ ଟଙ୍କା ଦେବାକୁ ଉକ୍ତ କର୍ମଚାରୀ ରବୀନ୍ଦ୍ରଙ୍କୁ କହିଥିଲେ। ପରେ କର୍ମଚାରୀ ବ୍ୟାଙ୍କ ଆକାଉଣ୍ଟର ସବିଶେଷ ତଥ୍ୟ ଦେଇ ଟଙ୍କା ପଠାଇବାକୁ କହିଥିଲେ। ରବୀନ୍ଦ୍ର ପୁଣି ସେହି ନମ୍ବରରେ ଟଙ୍କା ପୈଠ କରିଥିଲେ। ପର୍ଯ୍ୟାୟକ୍ରମେ ୧୦ ଥର ୧ ଲକ୍ଷ ୩୬ ହଜାର ୪୫୦ ଟଙ୍କା ସେହି ଆକାଉଣ୍ଟ ନମ୍ବରରେ ପଠାଇଥିଲେ। ପରେ ତାଙ୍କର ସନ୍ଦେହ ହେବାରୁ ସେ ଗୁଗୁଲ୍ରେ ସର୍ଚ୍ଚ କରି ସ୍ନାପଡିଲ୍ର ଏକ ହେଲପ୍ ଲାଇନ ନମ୍ବରକୁ ଫୋନ କରିଥିଲେ। ଆପଣଙ୍କ ଟଙ୍କା ଆସିଛି ଶୀଘ୍ର କାର ବାବଦ ଟଙ୍କା ଆପଣଙ୍କ ପାଖକୁ ପଠାଯିବ ବୋଲି ଫୋନ୍ ଉଠାଇଥିବା ବ୍ୟକ୍ତି କହିଥିଲେ। ଶୁକ୍ରବାର ପୂର୍ବାହ୍ନରେ ପୁଣି ସେହି କର୍ମଚାରୀ ଜଣକ ଲେଟ୍ ହୋଇଗଲା ୭ ହଜାର ଟଙ୍କା ପୁନର୍ବାର ପୈଠ କରିବାକୁ କହିଥିଲେ। ଏ ନେଇ ରବୀନ୍ଦ୍ର ଗ୍ରାମର କେତେକ ଲୋକଙ୍କୁ ପଚାରିବାରୁ ସେ ଠକେଇର ଶିକାର ହୋଇଥିବା ଜାଣି ଶନିବାର ଗୋଳନ୍ଥରା ଥାନାରେ ଲିଖିତ ଅଭିଯୋଗ କରିଥିଲେ। ଶନିବାର ମଧ୍ୟ ଟଙ୍କା ବାନ୍ଧିବାକୁ କଲ ଆସିଥିବା ରବୀନ୍ଦ୍ର କହିଛନ୍ତି। ତେବେ ଠକେଇ କରିଥିବା ବ୍ୟକ୍ତି ବିହାର ଅଞ୍ଚଳର ବୋଲି ଜାଣାପଡ଼ିଥିବା ଥାନାଧିକାରୀ ବାବୁଲି ନାୟକ କହିଛନ୍ତି।
