ଲକ୍‌ଡାଉନ ବେଳେ ଚୋରା ମଦ କାରବାର: ୪ ଗିରଫ
8:00 pmApril 30, 2020April 30, 2020

ବଡ଼ବିଲ, ୩୦ା୪(ସ୍ବ.ପ୍ର.)-ଲକ୍‌ଡାଉନ ପାଇଁ ବିଭିନ୍ନ ଦୋକାନ ଖୋଲିବା ନେଇ କଟକଣା ଲାଗିଥିବାବେଳେ ମଦ ବିକ୍ରି ଉପରେ ନିଷେଧାଦେଶ ଲାଗିଛି। ହେଲେ ଲୁଚାଛପାରେ ବିକ୍ରି ହେଉଛି ମହୁଲି ଓ ବିଦେଶୀ ମଦ। ବଡ଼ବିଲ ପୋଲିସ ଚଢ଼ାଉ କରି ୨ଦିନରେ ମୋଟ ୧୨ ବୋତଲ ବିଦେଶୀ ମଦ ଓ ୨୦ ଲିଟର ମହୁଲି ମଦ ଜବତ କରିଛି। ଏହି ଘଟଣାରେ ସମ୍ପୃକ୍ତ ୪ଜଣ ଅଭିଯୁକ୍ତଙ୍କୁ ବୁଧବାର ଓ ଗୁରୁବାର ଗିରଫ କରି କୋର୍ଟଚାଲାଣ କରିଛି। ଗିରଫ ଅଭିଯୁକ୍ତମାନେ ହେଲେ ବଡ଼ବିଲ ମୁଖ୍ୟ ବଜାରସ୍ଥିତ ଟୁରିଷ୍ଟ ଲଜ ମ୍ୟାନେଜର ଚନ୍ଦ୍ରସେନ ମହାନ୍ତ, ସହଯୋଗୀ ଛୋଟୁ ଗୁପ୍ତା, ଗାଢ଼ା ହଟିଂ ଅଞ୍ଚଳର କୈଳାଶ ପୂର୍ତ୍ତି ଏବଂ ଦଲକି ବସ୍ତିର ସୁରେଶ ମୁଣ୍ଡା। ବୁଧବାର ପୋଲିସ କୈଳାଶ ଓ ସୁରେଶଙ୍କ ନିକଟରୁ ମୋଟ ୨୦ ଲିଟର ମହୁଲି ମଦ ଜବତ କରିଛି। ସେହିପରି ଗୁରୁବାର ପୋଲିସ ଚନ୍ଦ୍ରସେନ ଓ ତାଙ୍କ ସହଯୋଗୀ ଛୋଟୁଙ୍କ ନିକଟରୁ ୧୨ ବୋତଲ ବିଦେଶୀ ମଦ ଜବତ କରିଛି। ସେମାନଙ୍କୁ ଯୋଗାଉଥିବା ଯୁବକଜଣକ ଫେରାର ହୋଇଯାଇଥିବା ଜଣାପଡିଛି।