ମୁମ୍ବାଇ: କରୋନା ଭାଇରସ ସଂକ୍ରମଣକୁ ଦେଖି ସାରା ଦେଶରେ ମେ’ ୧୭ ପର୍ଯ୍ୟନ୍ତ ଲକ୍ଡାଉନ ଘୋଷଣା କରାଯାଇଛି। ଏହି ସମୟରେ ବଲିଉଡ୍ର ପ୍ରାୟ ସବୁ ସେଲିବ୍ରିଟି ଘରେ ରହି ପରିବାର ସହ ସମୟ କାଟୁଛନ୍ତି। ବଲିଉଡ୍ ମୁଭି ‘ବୀର’ରେ ନଜର ଆସିଥିବା ନାୟିକା ଜରିନ ଖାଁ ମଧ୍ୟ ଏବେ ଘରେ ନିଜ ପରିବାର ସହ ସମୟ କାଟୁଛନ୍ତି। ହେଲେ ସେ ଏବେ ଅପେକ୍ଷା ରଖିଛନ୍ତି କେବେ ଖୋଲିବ ଏହି ଲକ୍ଡାଉନ। ନିକଟରେ ଏକ ସାକ୍ଷାତ୍କାରରେ ଜରିନ କହିଛନ୍ତି ମାସରୁ ଊର୍ଦ୍ଧ୍ୱ ସମୟ ହେବ ସେ ଘରେ ରହି ରହି ବୋର୍ ହୋଇଗଲେଣି। ଏବେ ସେ ଅପେକ୍ଷା କରିଛନ୍ତି କେବେ ଖୋଲିବ ଏହି ଲକ୍ଡାଉନ୍। ଆଉ ଏହାପରେ ସେ ତୁରନ୍ତ ଦୁବାଇ ଗସ୍ତ କରିବେ ବୋଲି କହିଛନ୍ତି। ଏବେଠାରୁ ସେ ବିମାନବନ୍ଦରର ସ୍ବପ୍ନ ଦେଖିଲେଣି। କାରଣ ଏତେ ସମୟ ଘରେ ରହିବା ପରେ ସେ ପୁଣିଥରେ ବିମାନ ଯାତ୍ରା କରିବାକୁ ଉତ୍କଣ୍ଠାର ସହ ଅପେକ୍ଷା ରଖିଥିବା କହିଛନ୍ତି। ତେବେ ତାଙ୍କ ଦୁବାଇ ଗସ୍ତ ପଛର କାରଣ ହେଉଛି ସେଠାରେ ତାଙ୍କର ଜଣେ ଅତିପ୍ରିୟ ବନ୍ଧୁ ରହୁଛନ୍ତି। ଆଉ ବନ୍ଧୁଙ୍କର ଏକ ୪ ବର୍ଷର କନ୍ୟା ସନ୍ତାନ ଥିବା ବେଳ ତା’ର ଜନ୍ମଦିନ ଅଗଷ୍ଟ ମାସରେ ପଡୁଥିବାରୁ ସେ ଏହି ପାର୍ଟିରେ ଯୋଗ ଦେବାକୁ ଆଶାବାନ୍ଧି ବସିଥିବା କହିଛନ୍ତି। କାରଣ ସେତେବେଳକୁ ନିଶ୍ଚୟ ଲକ୍ଡାଉନ ଖୋଲି ଯାଇଥିବ ଓ ସବୁ ସ୍ଥିତି ସାମାନ୍ୟ ହୋଇଯାଇଥିବ ବୋଲି ସେ ଆଶା ରଖିଥିବା କହିଛନ୍ତି।
