ମୁମ୍ବାଇ: ଗୋଟିଏ ପଟେ କରୋନା ଭାଇରସ ସଂକ୍ରମଣ ଅନ୍ୟପଟେ ଲକ୍ଡାଉନ। ଏହା ଏବେ ଅନେକଙ୍କ ଜୀବନରେ ନାନା ପ୍ରକାର ଅସୁବିଧା ସୃଷ୍ଟି କରିଛି। ଆଉ ଏହି ସମୟରେ ବଲିଉଡ୍ ସେଲିବ୍ରିଟିମାନେ ସହଯୋଗର ହାତ ବଢାଇଥିବା ଦେଖିବାକୁ ମିଳିଛି। ହେଲେ ଲକ୍ଡାଉନ୍ ପିରିୟଡରେ ଅସଲ ହିରୋ ପାଲଟିଛନ୍ତି ବଲିଉଡ୍ ଫିଲ୍ମରେ ଖଳନାୟକ ଚରିତ୍ରରେ ନଜର ଆସିଥିବା ସୋନୁ ସୁଦ। ମୁମ୍ବାଇରେ ମେଡିକାଲ ଷ୍ଟାଫଙ୍କ ପାଇଁ ନିଜ ହୋଟେଲ ଦେଇଦେବା କଥା କୁହନ୍ତୁ ଅବା ଭୋକିଲା ପେଟକୁ ଖାଦ୍ୟ ଯୋଗାଇବା କୁହନ୍ତୁ ପୁଣି ପଞ୍ଜାବରେ ଡାକ୍ତରମାନଙ୍କୁ ୧,୫୦୦ରୁ ଊଦ୍ଧ୍ୱର୍ର୍ ପିପିଇ କିଟ୍ ପ୍ରଦାନ କରିଛନ୍ତି ସୋନୁ। ଆଉ ଏବେ ସେ ପ୍ରବାସୀ ଶ୍ରମିକଙ୍କୁ ସାହାଯ୍ୟ କରିବାକୁ ଆଗେଇ ଆସିଛନ୍ତି। ସେମାନଙ୍କୁ ନିଜ ନିଜ ରାଜ୍ୟରେ ପହଞ୍ଚାଇବାରେ ସାହାଯ୍ୟ କରୁଛନ୍ତି ଏହି ବଲିଉଡ୍ ଖଳନାୟକ। ନିକଟରେ ସେ ଏକ ସାକ୍ଷାତ୍କାରରେ କହିଛନ୍ତି, ଲକ୍ଡାଉନ ସମୟରେ ପ୍ରବାସୀ ଶ୍ରମିକମାନେ ରାଜ ରାସ୍ତାରେ ଯେମିତି ଚାଲି ଚାଲି ଯାଉଛନ୍ତି ତାକୁ ଦେଖିବା ପରେ ସେ ଗ୍ରାଉଣ୍ଡ ଲେବଲକୁ ଆସି କାମ କରିବାକୁ ଇଚ୍ଛା ପ୍ରକାଶ କରିଥିଲେ। ଅବଶ୍ୟ ଗ୍ରାଉଣ୍ଡ ଲେବଲକୁ ଯାଇ କାମ କରିବାର ଆଗ୍ରହ ତାଙ୍କର ବହୁ ପୂର୍ବରୁ ଥିଲା। ଏବେ ଏମିତି ଏକ ସୁଯୋଗ ମିଳିଥିବାରୁ ସେ ପ୍ରବାସୀଙ୍କୁ ସାହାଯ୍ୟ କରିବାକୁ ଚାଲିଆସିଥିବା କହିଛନ୍ତି। ଇନଷ୍ଟ୍ରାଗ୍ରାମ ମାଧ୍ୟମରେ ଯିଏ ତାଙ୍କୁ ସାହାଯ୍ୟ ମାଗୁଛି ସେ ତା’ର ସାହାଯ୍ୟ କରୁଛନ୍ତି। ଏମିତିକି ଲୋକଙ୍କ ଡିଟେଲ୍ସ ମାଗି ଫୋନ ନମ୍ବର ମାଗି ସେ ତାଙ୍କୁ ସେମାନଙ୍କ ଘରେ ପହଞ୍ଚାଉଛନ୍ତି। ବିହାରର ମୂଳ ବାସିନ୍ଦା ସୋନୁ ନିକଟରେ ଜଣେ ବିହାରୀ ପ୍ରବାସୀଙ୍କୁ ଇନଷ୍ଟାଗ୍ରାମରେ ନିଜର ଡିଟେଲ୍ସ ଦେବାକୁ କହିଥିବା ଦେଖାଯାଇଛି। ତା’ହେଲେ ଯାଇ ସେ ତାଙ୍କୁ ଘରେ ପହଞ୍ଚାଇବାର ବ୍ୟବସ୍ଥା କରିବେ। ଏଥିପାଇଁ ସୋନୁ ଆବଶ୍ୟକ ଥିବା ସମସ୍ତ ଅନୁମତି ନେଇଥିବା ପ୍ରକାଶ କରିଛନ୍ତି।
