ଭୁବନେଶ୍ୱର, ୨୬।୯(ବ୍ୟୁରୋ): ଦିନ ଆସିବ ଭୁବନେଶ୍ୱରର ସରକାରୀ ଜମି ଆଉ ସରକାରଙ୍କ ହାତରେ ନ ଥିବ। ସରକାରଙ୍କ ନାଁରେ ରେକର୍ଡ ଥିବ, ହେଲେ ଉପଭୋଗ କରୁଥିବେ ଜମି ମାଫିଆ ଓ ପ୍ରଭାବଶାଳୀ ବ୍ୟକ୍ତି। ସହରରେ ବଢ଼ି ଚାଲିଥିବା ଜବରଦଖଲ ଓ ଲୋକଦେଖାଣିଆ ଉଚ୍ଛେଦରୁ ଏଭଳି ଏକ ଆଶଙ୍କା ସହରବାସୀଙ୍କ ମନରେ ସୃଷ୍ଟି ହୋଇଛି। କାରଣ ଏବେ ଭୁବନେଶ୍ୱର ମହାନଗର ନିଗମ (ବିଏମ୍ସି) ଓ ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷ (ବିଡିଏ)ର ମିଳିତ ଏନ୍ଫୋର୍ସମେଣ୍ଟ ଟିମ୍ ଜବରଦଖଲ ଉଚ୍ଛେଦ କରୁଛି। ହେଲେ ଉଚ୍ଛେଦର କେଇଘଣ୍ଟା ନ ଯାଉଣୁ ଉକ୍ତ ସ୍ଥାନକୁ ସର୍ବସମ୍ମୁଖରେ ପୁନଃ ଦଖଲ କରାଯାଇ ବସତି ଓ ବ୍ୟବସାୟ କରାଯାଉଛି। ପୁଣି ଅଭିଯୋଗ ବା ନିର୍ଦ୍ଦେଶ ନ ଆସିବା ପର୍ଯ୍ୟନ୍ତ ଏନ୍ଫୋର୍ସମେଣ୍ଟ ଟିମ୍ ଦେଖୁଥିଲେ ମଧ୍ୟ ହାତ ମାରୁନି। ଏପଟେ ବର୍ଷବର୍ଷ ଧରି ଏଭଳି ଭେଳିକି ଭିତରେ ଜବରଦଖଲକାରୀମାନେ ଆଇନର ଗଳାବାଟ ଦେଇ ତାହାକୁ ନିଜ ନାମରେ ହେଉ ଅବା ସ୍ଥାୟୀ ଭାବେ ଅକ୍ତିଆର କରି ରଖୁଛନ୍ତି। ତେବେ ସବୁଠାରୁ ସମ୍ବେଦନଶୀଳ ଘଟଣା ହେଲା, ଜବରଦଖଲକାରୀଙ୍କୁ ଖୋଦ୍ ବିଭାଗୀୟ ଅଧିକାରୀମାନେ ହିଁ ଗଳାବାଟ ଦେଖାଉଥିବା ଜଣାପଡିଛି। କ’ଣ କଲେ ଆମେ ହାତମାରିପାରିବୁନି ତାହାକୁ ମଧ୍ୟ ଶିଖାଉଛନ୍ତି। ଉଚ୍ଛେଦ ପୂର୍ବରୁ ଏସବୁ ପାଇଁ ଡିଲ୍ ମଧ୍ୟ ହେଉଛି। ଟିମ୍ ପହଞ୍ଚତ୍ବା ପୂର୍ବରୁ ଜବରଦଖଲକାରୀମାନେ କୋର୍ଟ ଦସ୍ତାବିଜ ଦେଖାଇ ତଡ଼ି ଦେଉଛନ୍ତି। ବହୁ ସ୍ଥାନରେ ଉଚ୍ଛେଦ ଟିମ୍କୁ ଘେରାଉ କରୁଛନ୍ତି। ଏଭଳି ଘଟଣାର ଅନେକ ନଜିର ରହିଛି। ଏବେ ପରିସ୍ଥିତି ଏପରି ହୋଇଛି ସହରରେ ଚାଲିଥିବା ଉଚ୍ଛେଦକୁ ଜବରଦଖଲକାରୀମାନେ ଆଉ ଖାତିର କରୁନାହାନ୍ତି। ଅନ୍ୟପକ୍ଷରେ ସେଭଳି ଆଇନ ଅଭିଜ୍ଞତା ଅଧିକାରୀଙ୍କର ନ ଥିବାରୁ ସେମାନେ ପଦକ୍ଷେପ ନେବାକୁ ପଛଘୁଞ୍ଚା ଦେଉଛନ୍ତି। ବିଭାଗୀୟ ଆଇନ ସେଲ୍ ସତେ ଯେପରି ନିଷ୍କ୍ରିୟ ହୋଇଯାଇଛି। ଆଗାମୀ ଦିନରେ ଜବରଦଖଲ ହିଁ ସହରର ସୌନ୍ଦର୍ଯ୍ୟକରଣ ହେଉ ବିକାଶଧାରାର ବଡ଼ ବାଧକ ସାଜିବ ବୋଲି ବାରି ହୋଇପଡୁଛି।
