କୌଣସି ଗୁରୁତର ଅପରାଧ ପାଇଁ ମଣିଷକୁ ଫାଶୀ ଦିଆଯିବା କଥା ସମସ୍ତେ ଶୁଣିଥିବେ। ହେଲେ ହାତୀକୁ ଫାଶୀ ଦିଆଯିବା କଥା ଶୁଣିଲେ ଟିକେ ଅଡୁଆ ଲାଗେ। ଅବଶ୍ୟ ଏହା ଆଜିକାଲିର ଘଟଣା ନୁହେଁ। ୧୯୧୬, ସେପ୍ଟେମ୍ବର ୧୩ରେ ଆମେରିକାର ଟେନେସି ରାଜ୍ୟରେ ମେରି ନାମକ ଏକ ହାତୀକୁ ପ୍ରାୟ ୨ହାଜର ଲୋକଙ୍କ ସମ୍ମୁଖରେ ପାଶୀ ଦିଆଯାଇଥିବା କୁହାଯାଏ। ଏହା ପ୍ରାଣୀଙ୍କ ପ୍ରତି କ୍ରୁରତା କୁହାଯାଇପାରେ। ଏହା ପଛର କାରଣ ମଧ୍ୟ ଥିଲା ରୋଚକ। ଯାହା ଶୁଣିଲେ ଆଶ୍ଚର୍ଯ୍ୟ ଲାଗେ। କୁହାଯାଏ ଚାର୍ଲି ସ୍ପାର୍କ ନାମକ ଜଣେ ବ୍ୟକ୍ତି ‘ସ୍ପର୍କସ୍ ଓ୍ବାର୍ଲଡ ଫେମଶ ଶୋ’ ନାମରେ ଏକ ସର୍କସ ଗଢିଥିଲେ। ଯେଉଁଥିରେ ୫ଟନ୍ ଓଜନର ହାତୀ ମେରି ଦର୍ଶକଙ୍କ ମୁଖ୍ୟ ଆକର୍ଷଣ ଥିଲା। ହେଲେ କୌଣସି କାରଣ ବଶତଃ ଦିନେ ତା’ର ମାହୁନ୍ତ ସର୍କସ ଛାଡି ଦେବାରୁ ମେରି ପାଇଁ ସର୍କସ ମାଲିକ ଆଉ ଜଣେ ନୂଆ ମାହୁନ୍ତଙ୍କୁ ଆଣିଲେ। ହେଲେ ସେ ତାଙ୍କ ବୋଲ ମାନିବାକୁ ଯେମିତି ରାଜି ନ ଥିଲା। ଦିନେ ସର୍କସର ପ୍ରମୋଶନ ପାଇଁ ଏକ ଉତ୍ସବର ଆୟୋଜନ କରାଯାଇଥିବା ବେଳେ ସର୍କସରେ ଥିବା ସବୁ ହାତୀ ସେଠାରେ ପହଞ୍ଚିଥିଲେ। ହେଲେ ମେରି ପାଖରେ କିଛି ଖାଦ୍ୟ ଦେଖି ତା’ ଆଡକୁ ଅଗ୍ରସର ହେବାରୁ ନୂଆ ମାହୁନ୍ତ ଜଣଙ୍କ ତାକୁ ଅଟକାଇବାକୁ ଚେଷ୍ଟା କରିଥିଲେ ହେଲେ ସେ ନ ଅଟକି ଆଗକୁ ବଢିବାରୁ ମାହୁନ୍ତ ତା କାନରେ ଆଘାତ ଦେଇଥିଲେ। ଏଥିରେ ଉତ୍କ୍ଷିପ୍ତ ହୋଇ ହାତୀଟି ଘଟଣାସ୍ଥଳରେ ନୂଆ ମାହୁନ୍ତଙ୍କୁ ଗୋଡରେ ଦଳି ମାରି ଦେଇଥିଲା। ଏହାପରେ ସେଠାରେ ଉପସ୍ଥିତ ଥିବା ଜନତା ମେରିକୁ ମୃତ୍ୟୁଦଣ୍ଡ ଦେବାକୁ ସର୍କସ ମାଲିକଙ୍କ ନିକଟରେ ଦାବି କରିଥିଲେ। କିଏ କହିଥିଲେ ତାକୁ କରେଣ୍ଟ ଦେଇ ମାରି ଦିଆଯାଉ ତ ଆଉ କିଏ କହିଥିଲେ ତାକୁ ଟ୍ରେନ୍ରେ ଆଘାତ ଦେଇ ମାରି ଦିଆଯାଉ। ବହୁ ବାଦବିବାଦ ପରେ ଶେଷରେ ଜନତାଙ୍କ ନିକଟରେ ହାରି ଯାଇଥିଲେ ସର୍କସ ମାଲିକ ଓ ମେରିକୁ ପ୍ରାୟ ୨ହଜାର ଜନତାଙ୍କ ସାମ୍ନାରେ ଫାଶୀ ଦିଆଯାଇଥିବା କୁହାଯାଏ। ଏଥିପାଇଁ ମାଲିକ ୧୦୦ଟନ ଭାର ଉଠାଇ ପାରିବା ଭଳି କ୍ରେନ୍ର ବ୍ୟବସ୍ଥା କରି ମେରିକୁ ଫାଶୀ ଦେଇଥିବା କୁହାଯାଏ। ଇତିହାସରେ ଏହା ପ୍ରାଣୀଙ୍କ ପ୍ରତି ନିଷ୍ଠୁର କ୍ରୁରତା ଭାବେ ବର୍ଣ୍ଣନା କରାଯାଇଛି।
