ଭୁବନେଶ୍ୱର,୫ା୩ (ବ୍ୟୁରୋ): ଜଣେ ୨୯ ବର୍ଷୀୟ ଯୁବକଙ୍କ ଶରୀରରୁ ବାହାରିଛି ୧୨ କିଲୋ ଗ୍ରାମର ଏକ ବିରଳ ଜେନେଟିକ୍ ଟ୍ୟୁମର୍। ଦୀର୍ଘ ୩ ଘଣ୍ଟାର ଅସ୍ତ୍ରୋପଚାର ପରେ ଚନ୍ଦ୍ରକାନ୍ତ ଶର୍ମା ନାମକ ଜଣେ ରୋଗୀଙ୍କ ଦେହରୁ ନ୍ୟୁରୋଫାଇବ୍ରୋମାଟୋସିସ୍ ଟାଇପ୍-୧ (ଏନ୍ଏଫ୍୧) ଟ୍ୟୁମର୍ ବାହାର କରାଯାଇଛି। ୨୦ x ୨୫ ସେମି ବିଶିଷ୍ଟ ଏହି ଟ୍ୟୁମର୍ ଚନ୍ଦ୍ରକାନ୍ତଙ୍କ ଶରୀରରେ ପ୍ରାୟ ୧୫ବର୍ଷ ଧରି ରହିଥିଲା। ଏହା ପ୍ରଭାବରୁ କିଶୋରାବସ୍ଥାରୁ ବର୍ତ୍ତମାନ ପର୍ଯ୍ୟନ୍ତ ଚନ୍ଦ୍ରକାନ୍ତ ପ୍ରାୟ ଏକ ଦଶନ୍ଧି ହେଲା ଗୁରୁଣ୍ଡି ଗୁରୁଣ୍ଡି ଚାଲିବା ସହ ପ୍ରବଳ ଯନ୍ତ୍ରଣା ଭୋଗୁଥିଲେ। ଏନ୍ଏଫ୍-୧ ଶରୀରର ଗତିଶୀଳ କ୍ଷମତାକୁ ପ୍ରଭାବିତ କରିବା ଦ୍ୱାରା ତାଙ୍କ ଦେହରେ ବଢୁଥିବା ଏକାଧିକ ଟ୍ୟୁମର ତାଙ୍କର ମେରୁଦଣ୍ଡକୁ ପ୍ରଭାବିତ କରିଥିଲା। ଫଳରେ ସେ ସ୍କୋଲିଓସିସ୍ରେ ପୀଡିତ ହୋଇଥିଲେ ଓ ଟ୍ୟୁମର୍ ଧୀରେ ଧୀରେ ବଢି ଚାଲିଥିଲା। ଏହାଦ୍ୱାରା ଇଣ୍ଟ୍ରାଟ୍ୟୁମୋରାଲ ବ୍ଲିଡିଙ୍ଗ୍ ହୋଇ ପ୍ରାୟ ୨ଲିଟର ରକ୍ତ ସଞ୍ଚତ୍ତ ହୋଇଥିଲା, ଯାହାକି ପରେ ଆନେମିଆର କାରଣ ହୋଇଥିଲା। ତେବେ ବି.ଆର୍. ଲାଇଫ୍ କଳିଙ୍ଗ ହସ୍ପିଟାଲର ଲାପାରୋସ୍କୋପିକ୍ ସର୍ଜନ୍ ଡା. ରମ୍ୟରଞ୍ଜନ ବେହେରାଙ୍କ ଦ୍ୱାରା ବିପଦପୂର୍ଣ୍ଣ ତଥା ଜଟିଳ ଅସ୍ତ୍ରୋପଚାର କରାଯାଇ ଚନ୍ଦ୍ରକାନ୍ତଙ୍କ ଶରୀରରୁ ଉକ୍ତ ଟ୍ୟୁମରକୁ ବାହାର କରାଯାଇଛି। ଅତ୍ୟାଧୁନିକ ସର୍ଜିକାଲ ଟେକ୍ନୋଲୋଜିର ବ୍ୟବହାର ଦ୍ୱାରା ଟ୍ୟୁମର୍କୁ ସଫଳତାର ସହ ବାହାର କରାଯାଇଥିବା ଜଣାପଡ଼ିଛି।
ନ୍ୟୁରୋଫାଇବ୍ରୋମାଟୋସିସ୍ ଟାଇପ୍-୧ ହେଉଛି ଏକ ଜେନେଟିକ୍ ଅବସ୍ଥା ହୋଇଥିବାବେଳେ ଏହାଦ୍ୱାରା ରୋଗୀଙ୍କ ତ୍ୱଚାର ରଙ୍ଗରେ ପ୍ରଥମେ ପରିବର୍ତ୍ତନ ଦେଖାଯାଇଥାଏ। ତ୍ୱଚାର ସ୍ନାୟୁ, ମସ୍ତିଷ୍କ ଓ ଶରୀରର ଅନ୍ୟ ଅଂଶରେ ଏକାଧିକ କ୍ଷୁଦ୍ର ଓ ନରମ ଟ୍ୟୁମର ବଢିବା ଭଳି ଲକ୍ଷଣ ଦ୍ୱାରା ଏହାକୁ ଚିହ୍ନଟ କରାଯାଇଥାଏ। ୫୦ ପ୍ରତିଶତ ମାମଲାରେ ଏହା ପ୍ରଭାବିତ ପିତାମାତାଙ୍କ ଶରୀରରୁ ଜଣେ ବ୍ୟକ୍ତିଙ୍କ ଶରୀରକୁ ଯାଇଥାଏ। ଅନ୍ୟ କିଛି ମାମଲାରେ ଏକ ନୂଆ ପରିବର୍ତ୍ତନ କାରଣରୁ ଏହା ଲୋକଙ୍କଠାରେ ସୃଷ୍ଟି ହୋଇଥାଏ। ଏହି ରୋଗରେ ପୀଡିତ ଲୋକଙ୍କଠାରେ ଅଣ-କ୍ୟାନ୍ସରଯୁକ୍ତ ଓ କ୍ୟାନ୍ସରଯୁକ୍ତ ଟ୍ୟୁମର ହେବାର ଆଶଙ୍କା ରହିଥାଏ। ଶୀଘ୍ର ଚିହ୍ନଟ ଦ୍ୱାରା ଚିକିତ୍ସା ମାଧ୍ୟମରେ ଏହାକୁ ଭଲ କରାଯାଇପାରେ ବୋଲି ଡା. ରମ୍ୟରଞ୍ଜନ କହିଛନ୍ତିି।
