ବୈଶିଙ୍ଗା,୨୨ା୯(ଡି.ଏନ୍.ଏ.)-ମୟୂରଭଞ୍ଜ ଜିଲା ବୈଶିଙ୍ଗା ଥାନା ଅଧୀନ କେନ୍ଦୁଆ ପଞ୍ଚାୟତ ଚୁଆପଦା ଗ୍ରାମର ବର୍ଷକର ଶିଶୁକନ୍ୟା ଦୁର୍ଗା। ମୁଣ୍ଡର ଆକାର ଅସ୍ବାଭାବିକ ଭାବେ ବୃଦ୍ଧି ପାଉଛି। ମେରୁଦଣ୍ଡ ଓ ମୁଣ୍ଡରେ ବଥ ବାହାରି କ୍ରମେ ବଢି ଚାଲିଛି। ଏଥିଲାଗି ଅସହ୍ୟ ଯନ୍ତ୍ରଣା ଭୋଗ କରୁଛି ଦୁର୍ଗା। ବିଭିନ୍ନ ଡାକ୍ତରଖାନାକୁ ଚିକିତ୍ସା ପାଇଁ ନେଇ କୌଣସି ସୁଫଳ ନ ପାଇବାରୁ ଗରିବ ମା’ ବାପା ରଶ୍ମିରେଖା ଦାସ ଓ ହେମନ୍ତ କୁମାର ଦାସ ଏବେ ଅସହାୟ ହୋଇପଡିଛନ୍ତି। ଡାକ୍ତରମାନେ ରୋଗ ଚିହ୍ନଟ କରିପାରୁ ନ ଥିବା ସେମାନେ କହିଛନ୍ତି। ଝିଅର ଜୀବନ ରକ୍ଷା ଲାଗି ସେମାନେ ସ୍ବାସ୍ଥ୍ୟ ପ୍ରଶାସନକୁ ନିବେଦନ କରି ସହାୟତା ପାଇବା ଲାଗି ଅପେକ୍ଷା କରି ବସିଛନ୍ତି।
ରଶ୍ମିରେଖା ଓ ହେମନ୍ତ କହିଛନ୍ତି, ଗତବର୍ଷ ସେପ୍ଟେମ୍ବର ମାସ ପାର୍ବଣ ଋତୁରେ ଏହି ଶିଶୁକନ୍ୟା ଜନ୍ମ ନେଇଥିବାରୁ ସେମାନେ ଖୁସିରେ ତା’ର ନାଁଁ ଦେଇଥିଲେ ଦୁର୍ଗା। ଅଳ୍ପ କିଛି ଦିନ ମଧ୍ୟରେ ସେ ଅଦ୍ଭୂତ ରୋଗରେ ପୀଡ଼ିତ ହୋଇ ଏପର୍ଯ୍ୟନ୍ତ ବିଛଣାରେ ପଡ଼ି ରହି ଯନ୍ତ୍ରଣାରେ ଛଟପଟ ହେଉଛି। ସେମାନେ ପ୍ରଥମେ ଝିଅକୁ ନେଇ ବାରିପଦାସ୍ଥିତ ଜିଲା ମୁଖ୍ୟ ଚିକିତ୍ସାଳୟଠାରେ ଥିବା ରାଷ୍ଟ୍ରୀୟ ବାଲ୍ ସ୍ବାସ୍ଥ୍ୟ କାର୍ଯ୍ୟକ୍ରମ ଅଧୀନ ଶିଶୁ ଚିକିତ୍ସା ବିଭାଗରେ ଭର୍ତ୍ତି କରିଥିଲେ। ପରେ ସେଠାକାର ଡାକ୍ତର ଶିଶୁକୁ କଟକ ଶିଶୁ ଭବନକୁ ନେଇଯାଅ କହି ଡିସ୍ଚାର୍ଜ କରି ଦେଇଥିଲେ। ସେମାନେ ୧୦୮ ଆମ୍ବୁଲାନ୍ସ ଯୋଗେ ଦୁର୍ଗାକୁ କଟକସ୍ଥିତ ଶିଶୁଭବନକୁ ନେଇଥିଲେ। ସେଠାରେ ଡାକ୍ତର ନିରାଶାବାଣୀ ଶୁଣାଇବାରୁ ଏହି ଗରିବ ମା’ବାପା ଆମ୍ବୁଲାନ୍ସକୁ ଟଙ୍କା ଦେଇ ଦୁର୍ଗାଙ୍କୁ ଘରକୁ ନେଇ ଆସିଥିଲେ। ଆମ୍ବୁଲାନ୍ସରେ ନେବା ଆଣିବା ଲାଗି ସେମାନଙ୍କୁ ପ୍ରାୟ ୩ ହଜାର ଟଙ୍କା ଖର୍ଚ୍ଚ କରିବାକୁ ପଡିଥିଲା। ବର୍ତ୍ତମାନ ଏହି ଶିଶୁକନ୍ୟାଙ୍କ ଓଜନ ସାଢେ ୯ କିଲୋ । ମୁଣ୍ଡର ଆକାର ସାଧାରଣ ଆକୃତିର ଦୁଇଗୁଣା ହେଲାଣି। ଚଳିତ ମାସ ୧୨ ତାରିଖରେ ପରିବାର ଲୋକେ ଝିଅକୁ ନେଇ ଭୁବନେଶ୍ୱରର ଏମ୍ସ ହସ୍ପିଟାଲକୁ ଯାଇଥିଲେ। ସେଠାରେ କରାଯାଇଥିବା ପରୀକ୍ଷା ରିପୋର୍ଟ ଏଯାଏ ମିଳିନାହିଁ। ଏହି ପରିପ୍ରେକ୍ଷୀରେ ସ୍ଥାନୀୟ ୩୬ ନଂ ଜୋନ୍ ଜିଲା ପରିଷଦ ସଭ୍ୟ ବ୍ରଜମୋହନ ବେହେରା ଓଡ଼ିଶା ରାଜ୍ୟ ଚିକିତ୍ସାପାଣ୍ଠିରୁ ଶିଶୁକନ୍ୟାଙ୍କ ଚିକିତ୍ସା ଲାଗି ସହାୟତା ଆଣିବାକୁ ବ୍ୟକ୍ତିଗତ ଭାବେ ଉଦ୍ୟମ କରିବେ ବୋଲି କହିଛନ୍ତି । ଏହି ଶିଶୁକନ୍ୟାର ଚିକିତ୍ସା ଲାଗି ଆବଶ୍ୟକ ସହାୟତା ଯୋଗାଇ ଦେବା ସକାଶେ ଗ୍ରାମବାସୀ ସ୍ବାସ୍ଥ୍ୟ ବିଭାଗ ଉଚ୍ଚକର୍ତ୍ତୃପକ୍ଷ ଦୃଷ୍ଟି ଆକର୍ଷଣ କରିିଛନ୍ତି।
