ଲଣ୍ଡନ,୨୭।୫(ପିଟି)- ୨୦୦୭ ବିଶ୍ୱକପ୍ରେ ଦକ୍ଷିଣ ଆଫ୍ରିକା ବିପକ୍ଷ ମ୍ୟାଚ୍ରେ ଶ୍ରୀଲଙ୍କା ପେସର ଲସିଥ ମାଲିଙ୍ଗା କ୍ରମାଗତ ୪ ଉଇକେଟ ନେଇଥିଲେ। ଚଳିତ ବିଶ୍ୱକପ୍ରେ ମଧ୍ୟ ହ୍ୟାଟ୍ରିକ ନେବାକୁ ଲକ୍ଷ୍ୟ ରଖିଛନ୍ତି। ମୁଁ କ’ଣ ପାଇଁ ଆଉ ଏକ ହ୍ୟାଟ୍ରିକ ନେଇପାରିବି ନାହିଁ। ମୁଁ ଏବେ ମଧ୍ୟ ଚେଷ୍ଟା କରୁଛି, ଯାହାକି ମୋତେ ସ୍ବତନ୍ତ୍ର କରି ରଖିବ। ଏଠାକାର ଅନୁକୂଳ ପାଣିପାଗ ଯୋଗୁ ମୋତେ ଇଂଲଣ୍ଡରେ ଖେଳିବାକୁ ଭଲ ଲାଗେ ବୋଲି ମାଲିଙ୍ଗା କହିଛନ୍ତି। ଡେଥ ଓଭର ସ୍ପେଶାଲିଷ୍ଟ ବୋଲର ଲସିଥ ମାଲିଙ୍ଗାଙ୍କୁ ପୂର୍ବତନ ଅଲରାଉଣ୍ଡର ସନଥ ଜୟସୁରିୟା(୩୨୨)ଙ୍କୁ ଅତିକ୍ରମ କରିବା ଲାଗି ଆଉ ମାତ୍ର ଗୋଟିଏ ଦିନିକିଆ ଉଇକେଟ ଦରକାର। ଏଥିସହ ସେ ଦିନିକିଆ ଫର୍ମାଟର ସର୍ବକାଳୀନ ଉଇକେଟ ନେଇଥିବା ଟପ୍ ୧୦ ବୋଲରଙ୍କ ମଧ୍ୟରେ ସାମିଲ ହେବେ। ୩୫ ବର୍ଷୀୟ ବୋଲର ଆଇପିଏଲ ଚାମ୍ପିୟନ ମୁମ୍ବାଇ ଇଣ୍ଡିଆନ୍ସ ପାଇଁ ମୋଟ ୧୬ ଉଇକେଟ ନେଇଥିଲେ। ଚେନ୍ନାଇ ସୁପର କିଙ୍ଗ୍ସ ବିପକ୍ଷ ଫାଇନାଲରେ ସେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ। ଆଇପିଏଲ ସଫଳତା ଯୋଗୁ ମୋର ଆତ୍ମବିଶ୍ୱାସ ବୃଦ୍ଧି ପାଇଛି। କିନ୍ତୁ ଏଠାରେ ପରିସ୍ଥିତି ଓ ଫର୍ମାଟ ଭିନ୍ନ। ଉଇକେଟ ନେବାର ଦକ୍ଷତା ସହିତ ମୋ ନିକଟରେ ଅଭିଜ୍ଞତା ମଧ୍ୟ ରହିଛି ବୋଲି ପୂର୍ବତନ ଅଧିନାୟକ ମାଲିଙ୍ଗା କହିଛନ୍ତି।
