ଅନୁଗୋଳ ଅଫିସ୍/ଅନୁଗୋଳ ସହର, ୨୫ା୧
ଶିଳ୍ପ ଓ କୋଇଲା ଖଣି ଦ୍ୱାରା ପ୍ରଦୂଷିତ ଅନୁଗୋଳ ଜିଲାବାସୀଙ୍କୁ ସର୍ବନିମ୍ନ ମାସକୁ ୨ ଶହ ୟୁନିଟ୍ ପର୍ଯ୍ୟନ୍ତ ମାଗଣା ବିଦ୍ୟୁତ୍ ଯୋଗାଇଦେବା, ବିଦ୍ୟୁତ୍ ସେବାର ଘରୋଇକରଣ ବନ୍ଦ କରିବା, ବିଲ୍ ଆଦାୟ ନଁାରେ ଶୋଷଣ ଓ ବିଦ୍ୟୁତ୍ କାଟ୍ ବନ୍ଦ କରିବା ପାଇଁ ଶୁକ୍ରବାର ସ୍ଥାନୀୟ ଗୋପବନ୍ଧୁ ପାର୍କ ଠାରେ ଆୟୋଜିତ ଏକ ଖବରଦାତା ସମ୍ମିଳନୀରେ ଅନୁଗୋଳ ଜିଲା ଜନଜୀବନ ସୁରକ୍ଷା କମିଟି ପକ୍ଷରୁ ଦାବି କରାଯାଇଛି।
କମିଟି ପକ୍ଷରୁ କୁହାଯାଇଛି ଯେ, ଜିଲାରେ ଚାରିଟି ବୃହତ୍ ତାପଜ ବିଦ୍ୟୁତ୍ ଶିଳ୍ପ ସହିତ ୧୭ଟି କୋଇଲା ଖଣି ରହିଛି। ଉକ୍ତ ବିଦ୍ୟୁତ୍ ପ୍ରକଳ୍ପଗୁଡ଼ିକରୁ ଦୈନିକ ପ୍ରାୟ ୭ ହଜାର ମେଗାୱାଟ୍ ବିଦ୍ୟୁତ୍ ଉପତ୍ାଦନ କରାଯାଇ ଓଡ଼ିଶା ସହ ଅନ୍ୟ ରାଜ୍ୟକୁ ପଠାଯାଉଛି। ମାତ୍ର ଦୀପତଳ ଅନ୍ଧାର ଭଳି ଜିଲାବାସୀ ୨୪ ଘଣ୍ଟିଆ ବିଦ୍ୟୁତ୍ ସେବା ପାଇପାରୁନାହାନ୍ତି। ଅନେକ ଶିଳ୍ପପତି ଓ ବିଭିନ୍ନ କମ୍ପାନୀକୁ ଶହ ଶହ କୋଟି ଟଙ୍କା ବିଦ୍ୟୁତ୍ ବିଲ୍ ଛାଡ କରାଯାଉଥିବାବେଳେ ସାମାନ୍ୟ କେତେ ଟଙ୍କା ପାଇଁ ସାଧାରଣ ଗ୍ରାହକଙ୍କ ବିଦ୍ୟୁତ୍ କାଟ୍ କରାଯାଉଛି। ବକେୟା ଦେବାକୁ ସରକାରୀ ସଂସ୍ଥାକୁ ୩୧ ମାର୍ଚ୍ଚ ପର୍ଯ୍ୟନ୍ତ ସମୟ ଦିଆଯାଇଥିବାବେଳେ ପିଲାଙ୍କ ପରୀକ୍ଷା ମୁଣ୍ଡ ଉପରେ ଥାଇ ବି ସାଧାରଣ ଗ୍ରାହକଙ୍କ ବିଦ୍ୟୁତ୍ ବିଚ୍ଛିନ୍ନ କରାଯିବାକୁ କମିଟି ପକ୍ଷରୁ ତୀବ୍ର ନିନ୍ଦା କରାଯାଉଛି। ଓଡ଼ିଶାରେ ପ୍ରତିଷ୍ଠିତ ରାଷ୍ଟ୍ରାୟତ୍ତ ତାପଜ ବିଦ୍ୟୁତ୍ ଶିଳ୍ପରୁ ରାଜ୍ୟ ପାଇଁ ୨୫ରୁ ୩୩ ପ୍ରତିଶତ ମାଗଣା ବିଦ୍ୟୁତ୍ ଯୋଗାଣ ପାଇଁ ଗତ ଅଗଷ୍ଟରେ ମୁଖ୍ୟମନ୍ତ୍ରୀ ଦାବି କରିଛନ୍ତି। ତେଣୁ ଧୂଳି, ଧୂଆଁ, ପାଉଁଶ ପ୍ରଦୂଷଣରେ ଜର୍ଜରିତ ଅନୁଗୋଳ ଜିଲାବାସୀଙ୍କୁ ୨ ଶହ ୟୁନିଟ୍ ପର୍ଯ୍ୟନ୍ତ ମାଗଣା ବିଦ୍ୟୁତ୍ ଯୋଗାଣ ଦାବିରେ ଯଥାର୍ଥତା ରହିଛି ବୋଲି କମିଟି ପକ୍ଷରୁ କୁହାଯାଇଛି। ଅନୁଗୋଳ ଓ ତାଳଚେର ଡିଭିଜନରେ ଥିବା ସେସୁର ଚାରି ଲକ୍ଷ ଗ୍ରାହକଙ୍କ ବିଦ୍ୟୁତ୍ ଦେୟ ରାଜ୍ୟ ସରକାର ଚାହିଁଲେ କମ୍ପାନୀମାନଙ୍କ ସିଏସ୍ଆର୍ ଫଣ୍ଡ ଓ ଜିଲା ଖଣିଜ ପାଣ୍ଠିର ସୁଧ ଟଙ୍କାରୁ ଭରଣା କରାଯାଇପାରିବ ବୋଲି କମିଟି ପ୍ରକାଶ କରିଛି। ଆସନ୍ତା ଫେବୃୟାରୀ ୩ରେ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଏକ ଦାବିପତ୍ର ଜିଲାପାଳଙ୍କୁ ପ୍ରଦାନ କରାଯିବ ବୋଲି କମିଟି ପକ୍ଷରୁ ଘୋଷଣା କରାଯାଇଛି। କମିଟି ଆବାହକ ପ୍ରମୋଦ କୁମାର ପ୍ରଧାନ, ଅଭିମନ୍ୟୁ ସ୍ବାଇଁ, ରବୀନ୍ଦ୍ର ପ୍ରସାଦ ପଟ୍ଟନାୟକ, ବ୍ରଜବନ୍ଧୁ ସାହୁ, ଦିଲୀପ କୁମାର ଦାସ, ତୀର୍ଥବାସୀ ଭୋଇ, ଦାମୋଦର ଦାସ, ମାନସ ପାଳ, ରମେଶ ଚନ୍ଦ୍ର ସାହୁ, ସୂର୍ଯ୍ୟକାନ୍ତ ଦାସ, ହେମନ୍ତ କୁମାର ଦାସ, ଅଶୋକ ପ୍ରଧାନ, ବଳରାମ ବେହେରା, ନିରୁପମା ପ୍ରଧାନ ପ୍ରମୁଖ ଖବରଦାତା ସମ୍ମିଳନୀରେ ଉପସ୍ଥିତ ଥିଲେ।
