ପାତ୍ରପୁର,୪ା୭(ଡି.ଏନ୍.ଏ.)- ରାଜ୍ୟରେ ଦଶମ ଶ୍ରେଣୀ ପାସ୍ କରିଥିବା ଛାତ୍ରୀଛାତ୍ରଙ୍କୁ ୨ଦିନ ହେଲା ସାର୍ଟିଫିକେଟ ପ୍ରଦାନ କରାଯାଉଛି। ସରକାର ବିନା ଅର୍ଥରେ ଏହି ସାର୍ଟିଫିକେଟ ଦେଉଥିବାବେଳେ ପାତ୍ରପୁର ଅଞ୍ଚଳର ଏକ ହାଇସ୍କୁଲରେ ଏନେଇ ଅର୍ଥ ଦାବି କରାଯାଉଥିବା ଅଭିଯୋଗ ହୋଇଛି। ବିନା ଟଙ୍କାରେ ସାର୍ଟିଫିକେଟ ଦେବାକୁ ସ୍କୁଲ ପକ୍ଷରୁ ରୋକଠୋକ୍ ମନା କରାଯାଉଛି। ଏନେଇ ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି। କେତେଜଣ ଛାତ୍ରୀଛାତ୍ର ଟଙ୍କା ଦେଇ ସାର୍ଟିଫିକେଟ ଆଣୁଥିବା ଦେଖିବାକୁ ମିଳୁଛି। ୨ଶହରୁ ୫ଶହ ଟଙ୍କା ଏଥିପାଇଁ ଦାବି କରାଯାଉଛି। ଏନେଇ ଶୁକ୍ରବାର ବ୍ଲକ ଶିକ୍ଷା ବିଭାଗ ନିକଟରେ ଅଭିଯୋଗ କରିବେ ବୋଲି କେତେଜଣ ଅଭିଭାବକ କହିଛନ୍ତି। ଏନେଇ ବ୍ଲକ ଶିକ୍ଷା ଅଧିକାରୀ କୁରେଶୁ ସେଠୀଙ୍କୁ ପଚାରିବାରୁ ସାର୍ଟିଫିକେଟ ଦେଲାବେଳେ ଅର୍ଥ ଆଦାୟ ଅପରାଧ। ବର୍ତ୍ତମାନ ସୁଦ୍ଧା ଏନେଇ କୌଣସି ଅଭିଯୋଗ ଆମର ହସ୍ତଗତ ହୋଇନାହିଁ। ଅଭିଯୋଗ ହେଲେ ତୁରନ୍ତ କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି।
