‘ମାଙ୍କଡ଼ା ପଥର ଖନନ ରୋକ’ ଦୃଢ଼ କାର୍ଯ୍ୟାନୁଷ୍ଠାନ ନେବାକୁ ଜିଲାପାଳ, ଏସ୍‌ପି, ପ୍ରଦୂଷଣ ନିୟନ୍ତ୍ରଣ ବୋର୍ଡକୁ ଏନ୍‌ଜିଟି ନୋଟିସ
6:20 amOctober 22, 2019October 21, 2019

କେନ୍ଦୁଝର, ୨୨ା୧୦ (ସ୍ବ.ପ୍ର.)- କେନ୍ଦୁଝର ଜିଲା ଘଷିପୁରା ତହସିଲ ଅନ୍ତର୍ଗତ ମଦନପୁର ଅଞ୍ଚଳରେ ବେଆଇନ ମାଙ୍କଡା ପଥର ଖନନ ନେଇ ପ୍ରଶାସନ ପକ୍ଷରୁ ନିଆଯାଇଥିବା ପଦକ୍ଷେପ ଯଥେଷ୍ଟ ନୁହେଁ, ଏଦିଗରେ କଡ଼ା କାର୍ଯ୍ୟାନୁଷ୍ଠାନ ସାଙ୍ଗକୁ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରିବା ଲାଗି ଜାତୀୟ ଗ୍ରୀନ ଟ୍ରିବ୍ୟୁନାଲ(ଏନ୍‌ଜିଟି) ନିର୍ଦ୍ଦେଶ ଦେଇଛନ୍ତି। ଏନ୍‌ଜିଟି ପକ୍ଷରୁ ଏନେଇ ଜିଲାପାଳ, ଏସପି, ପ୍ରଦୂଷଣ ନିୟନ୍ତ୍ରଣ ବୋର୍ଡକୁ ଗତ ୧୬ ତାରିଖରେ ନୋଟିସ ଜାରି କରାଯାଇଥିବା ଜଣାପଡ଼ିଛି। ବେଆଇନ ଭାବେ ଖନନ ହୋଇଥିବା ପଥରକୁ ଜବତ କରିବା, ଖଣି ଅଞ୍ଚଳକୁ ତାର ବାଡ ଦେଇ ସୁରକ୍ଷା ଦେବା, ବନୀକରଣ କରିବା ସହ ସ୍ଥାନୀୟ ଅଞ୍ଚଳର ଲୋକଙ୍କୁ ସାମିଲ କରି ଜଳ ଅମଳ ପ୍ରକଳ୍ପ ନିର୍ମାଣ କରିବାକୁ ମଧ୍ୟ ଆଦେଶ ଦିଆଯାଇଛି। ସେହିପରି ପରିବେଶ କ୍ଷୟକ୍ଷତିର ଆକଳନ କରି ସ୍ଥିରତା ଫେରାଇ ଆଣିବା ଏବଂ ସମ୍ପୃକ୍ତ ସ୍ଥାନରେ କଡା ସୁରକ୍ଷା ବ୍ୟବସ୍ଥା ସକାଶେ ସୁରକ୍ଷାକର୍ମୀ ନିୟୋଜିତ କରିବା ପାଇଁ କୁହାଯାଇଛି ା ଏସଂକ୍ରାନ୍ତରେ ମାମଲାର ପରବର୍ତ୍ତୀ ଶୁଣାଣି ପାଇଁ ଡିସେମ୍ବର ୧୮ତାରିଖକୁ ଦିନ ଧାର୍ଯ୍ୟ କରାଯାଇଛି।
ଉଲ୍ଲେଖନୀୟ ଯେ, ମଦନପୁର ଅଞ୍ଚଳରେ ବେଆଇନ ଖଣିରେ ସୁଧାଂଶୁ ଶେଖର ମଲ୍ଲିକ ଓ ଅନ୍ୟମାନେ ଏହି ବେଆଇନ ମାଙ୍କଡା ପଥର ଖନନ ଘଟଣା ନେଇ ସୁଧାଂଶୁ ଶେଖର କୁଅଁର ଓ ଅନ୍ୟ ଜଣେ ଟ୍ରିବ୍ୟୁନାଲର ଦ୍ୱାରସ୍ଥ ହୋଇଥିଲେ। ରାଜ୍ୟ ସରକାରଙ୍କ ଜଙ୍ଗଲ ଓ ପରିବେଶ ସଚିବ, ରାଜସ୍ବ ଓ ବିପର୍ଯ୍ୟୟ ସଚୀବ, ଆନନ୍ଦପୁର ବନ୍ୟପ୍ରାଣୀ ଡିଭିଜନ ସଚୀବ, ଘଷିପୁରା ତହସିଲଦାର, ଏସପି କେନ୍ଦୁଝର, ଓଡିଶା ପ୍ରଦୂଷଣ ନିୟନ୍ତ୍ରଣ ବୋର୍ଡର ସଦସ୍ୟ ସଚିବଙ୍କୁ ଏହି ମାମଲାରେ ପକ୍ଷଭୂତ କରାଯାଇଥିଲା। ଟ୍ରିବ୍ୟୁନାଲ ଏହାର ଶୁଣାଣି କରି ଜିଲାପାଳ ତଥା ଅନ୍ୟମାନଙ୍କୁ ବେଆଇନ ଖନନ ରୋକିବାକୁ କଣ ପଦକ୍ଷେପ ନିଆଯାଇଛି ତାହାର ରିପୋର୍ଟ ମାଗିଥିଲେ। ଏନେଇ ଜିଲାପାଳ ସ୍ଥାନୀୟ ପ୍ରଶାସନ ନେଇଥିବା ପଦକ୍ଷେପ ସମ୍ପର୍କରେ ଟ୍ରିବ୍ୟୁନାଲଙ୍କୁ ଜଣାଇଥିଲେ। ଆନନ୍ଦପୁର ଡିଏଫଓ ଏଦିଗରେ ପଦକ୍ଷେପ ନେଇ ୨୩ ଲକ୍ଷ ୫୩ ହଜାର ୩୬୪ ଟଙ୍କା ଜରିମାନା ଆଦାୟ କରାଯାଇଥିବା ଟ୍ରିବ୍ୟୁନାଲଙ୍କୁ ଅବଗତ କରାଯାଇଥିଲା। ତେବେ ଏଭଳି କାର୍ଯ୍ୟାନୁଷ୍ଠାନ ଯଥେଷ୍ଟ ନୁହେଁ ଦର୍ଶାଇ ଟ୍ରିବ୍ୟୁନାଲ ଏଦିଗରେ କଡ଼ା ପଦକ୍ଷେପ ନେବାକୁ ଉପରୋକ୍ତ ନୋଟିସ ଜାରି କରିଥିବା ସୂଚନା ମିଳିଛି।