ମାଲକାନଗିରି,୨୯ା୭(ଡି.ଏନ.ଏ.)- ଦୀର୍ଘ ୧୧ ବର୍ଷ ଧରି ମାଓବାଦୀ ଅଞ୍ଚଳରେ ଲୋକଙ୍କ ସେବାରେ ଲାଗିଛନ୍ତି ଜଣେ ମହିଳା ସ୍ବାସ୍ଥ୍ୟକର୍ମୀ। ଗତ ବର୍ଷେ ହେଲା ସେ ନିଜେ କ୍ୟାନସର ରୋଗରେ ପିଡିତ ହୋଇ ମଧ୍ୟ ସେବାକାର୍ଯ୍ୟରୁ ଓହରିଯାଇନାହାନ୍ତି। ତାଙ୍କ ସେବା କାର୍ଯ୍ୟ ପାଇଁ ଆଦିବାସୀ ଅଞ୍ଚଳରେ ଲୋକେ ତାଙ୍କୁ ଆଦିବାସୀଙ୍କ ମଦର ଟେରେସା ବୋଲି କହୁଛନ୍ତି। ତାଙ୍କ ନାମ ପୁଷ୍ପା ତିଗା। ପୁଷ୍ପା ବଣ ଜଙ୍ଗଲ ଘେରା ୧୬ କିଲୋମିଟର ଦୂରରେ ଥିବା ଅଞ୍ଚଳକୁ ସାଇକେଲରେ ଯାଆନ୍ତି। ଲୋକଙ୍କୁ ସ୍ବାସ୍ଥ୍ୟ ସେବା ଯୋଗାଇ ଦିଅନ୍ତି। ମାଲକାନଗିରି ସୀମାନ୍ତ ସୁକୁମା ଜିଲାର ମାଓବାଦୀ ଉପଦ୍ରୁତ କୁର୍ନା ଅଞ୍ଚଳରେ ସେ ସେବାକରିବା ପାଇଁ ଆଗେଇ ଆସିଛନ୍ତି। ୧୧ ବର୍ଷ ଧରି ଆଦିବାସୀଙ୍କୁ ସ୍ବାସ୍ଥ୍ୟସେବା ଯୋଗାଇ ଦେଉଥିବା ପୁଷ୍ପା ପେଷାରେ ଜଣେ ମହିଳା ସ୍ବାସ୍ଥ୍ୟ କର୍ମୀ। ବର୍ଷେ ହେଲା କ୍ୟାନ୍ସର ଭଳି ମାରାତ୍ମକ ରୋଗରେ ସେ ପିଡିତ। ତେବେ ଏହା ତାଙ୍କ ମନୋବଳକୁ କମାଇ ଦେଇନି। ରାସ୍ତାଘାଟ ନ ଥିବା,ଯାନବାହନ ଚଳାଚଳ ନଥିବା ଏହି ଅଞ୍ଚଳରେ ସେ ୧୬ କିଲୋମିଟର ଜଙ୍ଗଲିଆ ରାସ୍ତାରେ ସାଇକେଲ ଚଳାଇ ଯାତାୟାତ କରନ୍ତି। ଏଯାବତ୍ ସେ ୫୦ଟି ପ୍ରସୂତିଙ୍କ ଡେଲିଭରି ସଫଳତାର ସହ କରିଛନ୍ତ। ଲୋକଙ୍କ ସେବା ହିଁ ପରମ ଧର୍ମ ବୋଲି ମାନିଥିବା ପୁଷ୍ପା ତିଗା କୁହନ୍ତି ସେ ଡ୍ୟୁଟିରେ ଯୋଗ ଦେବା ବେଳେ ଅଞ୍ଚଳର ପରିସ୍ଥିତି ବହୁତ ଖରାପ ଥିଲା। ଟିକା ଡବା ଧରି ସେ ଚାଲି ଚାଲି ପାହାଡ, ନଦୀ, ନାଳ ପାର ହୋଇ ଲୋକଙ୍କ ନିକଟରେ ପହଞ୍ଚୁଥିଲେ। ଆଜି ଚାଲିବା ବଦଳରେ ସାଇକେଲ ତାଙ୍କ ଯାତ୍ରାପଥର ମାଧ୍ୟମ ସାଜିଛି। ମତେ ଅନ୍ୟତ୍ର ବଦଳି ପାଇଁ ପ୍ରସ୍ତାବ ଦେଇଥିଲେ। ମୁଁ ବଦଳି ପାଇଁ ମନା କରିଦେଇଥିଲି ବୋଲି କହନ୍ତି ପୁଷ୍ପା। ତାଙ୍କ ବଦଳିକୁ ଅଞ୍ଚଳବାସୀ ବିରୋଧ କରିଥିଲେ ବୋଲି କହନ୍ତି ସୁପରଭାଇଜର ସୋହନ କଶ୍ୟପ । ସେ କହିନ୍ତି ପୁଷ୍ପା ଙ୍କ ସେବା ମନୋବୃତ୍ତି ଅନ୍ୟ ସ୍ବାସ୍ଥ୍ୟକର୍ମୀଙ୍କ ପାଇଁ ଉଦାହରଣ ପାଲଟିଛି।
