ପୁରୀ ଅଫିସ,୨୭ା୨: ପରିବର୍ତ୍ତିତ ସମାଜରେ ସମୟାନୁସାରେ ସବୁ କିଛି ବଦଳିଥାଏ। କିଏ ନିଜର ସ୍ବାର୍ଥ ଲାଗି ତ ଆଉ କିଏ ପରିବାର ଏବଂ କିଏ ସାମୂହିକ ଦୃଷ୍ଟିରୁ ପରିବର୍ତ୍ତିତ ହୋଇଥାନ୍ତି। ବିଭିନ୍ନ ସମୟରେ ମନୁଷ୍ୟ ନିଜର ରଙ୍ଗ ବଦଳାଇଥାଏ। ବୁଧବାର ଅନ୍ନପୂର୍ଣ୍ଣା ରଙ୍ଗମଞ୍ଚ ପରିସରରେ ଅନ୍ନପୂର୍ଣ୍ଣ ଥିଏଟର ଏ ଗ୍ରୁପର କଳାକାରମାନଙ୍କ ଦ୍ୱାରା ପରିବେଷିତ ନାଟକ ଥିଲା ରଙ୍ଗ ବଦଳେ। ଦୀର୍ଘଦିନର ନୀରବତା ପରେ ଏ ଗ୍ରୁପର ବର୍ଷୀୟାନ କଳାକାରଙ୍କୁ ନେଇ ପରିବେଷିତ ଏହି ନାଟକରେ ସମାଜର ବାସ୍ତବତା ପ୍ରତିଫଳନ ହୋଇଥିଲା। ଜୀବନରେ ପ୍ରତ୍ୟେକ ବ୍ୟକ୍ତିଙ୍କ ଆଶା ଥାଏ, ଦିନେ ନା ଦିନେ ସେମାନଙ୍କ ଭାଗ୍ୟ ପରିବର୍ତ୍ତନ ହେବ। ଦାରିଦ୍ର୍ୟ ତଳେ ନିଷ୍ପେଶିତ, ଅବହେଳିତ, ଲାଞ୍ଚତ୍ତ ପରିବାର ମଧ୍ୟ ଉପରକୁ ଉଠିବାକୁ ଚେଷ୍ଟା କରନ୍ତି। ବ୍ୟସ୍ତବହୁଳ ଜୀବନରେ ପ୍ରତ୍ୟେକ ମଣିଷ ନିଜ କାର୍ଯ୍ୟରେ ବ୍ୟସ୍ତ ରହିଥାଏ। ସମାଜରେ କିଏ ଗରିବ, ତ କିଏ ଧନୀ ବ୍ୟକ୍ତି ରହିଛନ୍ତି। ତ ପୁଣି କିଏ ରାସ୍ତାକଡ଼ରେ ନିଜର ଭାଗ୍ୟକୁ ଆଦରି ପଡ଼ିରହିଛନ୍ତି। ତେବେ ସମସ୍ତେ ସମୟାନୁସାରେ କିପରି ନିଜ ରଙ୍ଗ ପରିବର୍ତ୍ତନ କରିଥାନ୍ତି କଳାକାରମାନେ ଅତି ନିଖୁଣ ଭାବେ ପରିବେଷଣ କରିଥିଲେ। ବିଭିନ୍ନ ଭୂମିକାରେ ଲକ୍ଷ୍ମୀଧର ମଲ୍ଲିକ, ଲକ୍ଷ୍ମୀପ୍ରିୟା ମିଶ୍ର, ମନୋରମା ମହାନ୍ତି, ରାନି ମଲ୍ଲିକ, କାଳୁଚରଣ ଦାଶ, ନିରଞ୍ଜନ ସାମନ୍ତରାଏ, ବିକାଶ ଦତ୍ତ, ସ୍ନେହଲତା ସାମଲ, ରାମକୃଷ୍ଣ ମହାପାତ୍ର, ବିରଞ୍ଚତ୍ ଜଗଦ୍ଦେବ, ଅହଲ୍ୟା ପଟ୍ଟନାୟକ, ରୁପଲତା ମହାନ୍ତି, କାମେଶ୍ୱର ମିଶ୍ର, ସ୍ବପ୍ନା ମହାନ୍ତି ପ୍ରମୁଖ ଅଂଶଗ୍ରହଣ କରିଛନ୍ତି। ଏହି ନାଟକରେ ପୂର୍ବତନ ମନ୍ତ୍ରୀ ମହେଶ୍ୱର ମହାନ୍ତି ଉଦ୍ଘାଟକ, ପୌର କାର୍ଯ୍ୟନିର୍ବାହୀ ଅଧିକାରୀ ବିଜୟ କୁମାର ଦାଶ ମୁଖ୍ୟଅତିଥି, ସଂସ୍କୃତି ଅଧିକାରୀ ଚୌଧୁରୀ ଅରବିନ୍ଦ ଦାସ, ଅନୁଷ୍ଠାନର କାର୍ଯ୍ୟକାରୀ ଅଧ୍ୟକ୍ଷ ଚକ୍ରଧର ମହାପାତ୍ର, ସାଧାରଣ ସମ୍ପାଦକ ପ୍ରସନ୍ନ ମିଶ୍ର, ଗୋବିନ୍ଦ ଚନ୍ଦ୍ର ମହାନ୍ତି ପ୍ରମୁଖ ଉପସ୍ଥିତ ଥିଲେ। ମଞ୍ଚ ନାଟକ ତଥା ଚଳଚ୍ଚିତ୍ର ଅଭିନେତା ସମୀର ଶତପଥୀ ଓ ଅନ୍ୟମାନେ ପରିଚାଳନାରେ ସହଯୋଗ କରିଥିଲେ।
