ଭୁବନେଶ୍ୱର,୨୭।୫(ବ୍ୟୁରୋ): ଅନ୍ଲାଇନ ଜରିଆରେ ମଦ ବିକ୍ରି ସମୟରେ ଗ୍ରାହକ ଠକାମିର ଶିକାର ହେଉଥିବା ଖବର ପ୍ରକାଶ ପାଇବାପରେ ରାଜ୍ୟ ଅବକାରୀ ବିଭାଗ ପକ୍ଷରୁ ଏକ ଚିଠି ମଙ୍ଗଳବାର ପ୍ରକାଶ କରାଯାଇଛି। ବିଭିନ୍ନ ସାମାଜିକ ଗଣମାଧ୍ୟମ ଏବଂ ପୋର୍ଟାଲ ଆଦିରେ ମଦ ବିକ୍ରି ନାଁରେ ଠକମାନେ ପ୍ରୟାସ ଚଳାଇଛନ୍ତି। ତେଣୁ ସେମାନେ ଯେପରି ଠକାମିର ଶିକାର ନ ହେବେ ସେଥିଲାଗି ସରକାରଙ୍କ ତରଫରୁ ନୂତନ ନିୟମକୁ ମାନି ମଦ କିଣିବା ଲାଗି ପରାମର୍ଶ ଦିଆଯାଇଛି। ଯେକୌଣସି ଠିପି ଖୋଲା ବା ଠିପି ବନ୍ଦ ରିଟେଲ ଦୋକାନ ବାହାରେ ସେମାନଙ୍କ ମୋବାଇଲ ନମ୍ବର ଲଗାଯାଇଥିବ। ଏହାଦ୍ୱାରା ସିଧାସଳଖ ଦୋକାନୀମାନେ ଲୋକଙ୍କ ଅର୍ଡର ରଖିପାରିବେ। ଏହାସହ ସେହି ନମ୍ବର ଓଏସ୍ବିସି ଓ୍ବେବ୍ସାଇଟ୍ରେ ସାମିଲ ଅଛି। ଗ୍ରାହକ ଚାହିଁଲେ ସେହି ନମ୍ବର କିମ୍ବା ହ୍ବାଟ୍ସଆପ୍ ଜରିଆରେ ମଗାଇପାରିବେ। ଠକାମି ରୋକିବା ଲାଗି କେବଳ ଯେଉଁ ଏଜେନ୍ସିଗୁଡିକ ଅବକାରୀ କମିଶନରଙ୍କଠାରୁ ଏନ୍ଓସି ନେଇଥିବେ ସେମାନଙ୍କ ଡେଲିଭରି ବୟ ମଦ ପହଞ୍ଚାଇବାକୁ ଅନୁମତି ମିଳିବ। ଉକ୍ତ ଏଜେନ୍ସିଗୁଡିକର ତାଲିକା ମଧ୍ୟ ଓଏସ୍ବିସି ଓ୍ବେବ୍ସାଇଟ୍ରେ ଉଲ୍ଲେଖ ରହିଛି। କେବଳ ଜମାଟୋ ଏବଂ ସ୍ବିଗିକୁ ଏଥିଲାଗି ଅନୁମତି ମିଳିଛି। ଗ୍ରାହକମାନେ ଅନ୍ଲାଇନରେ ମଗାଇବା ପୂର୍ବରୁ ଏଜେନ୍ସିକୁ ଅନୁମତି ମିଳିଛି ନା ନାହିଁ ଦେଖି ତା’ପରେ ମଗାଇବେ। ସୋସିଆଲ୍ ମିଡିଆରେ ମଦ ଯୋଗାଇବାକୁ କହି କୌଣସି ଅଫର ମିଳିବ ବୋଲି କହୁଥିବା ମାଧ୍ୟମରୁ କିଣିବେ ନାହିଁ। ଅବକାରୀ ଅଧୀକ୍ଷକ ପରାମର୍ଶ ଦେଇଛନ୍ତି ଯେ, ଯଦି କୌଣସି ଅଣସ୍ବୀକୃତିପ୍ରାପ୍ତ ବ୍ୟକ୍ତି, ଏଜେନ୍ସି ନିଜ ଓ୍ବେବ୍ସାଇଟ୍ କିମ୍ବା ପୋର୍ଟାଲ ବା ଆପ୍ଲିକେଶନ ଜରିଆରେ ମଦ ଘରେ ଯୋଗାଇବାକୁ କହୁଥାଏ, ସେମାନଙ୍କ ବିରୋଧରେ ଏତଲା ଦାୟର କରିହେବ ବୋଲି ଉଲ୍ଲେଖ ରହିଛି।
