ସିନାପାଲି, ୧୬।୧୦ (ଡି.ଏନ୍.ଏ.)-ନୂଆପଡ଼ା ଜିଲା ସିନାପାଲି ବ୍ଲକ ସିଙ୍ଗଝର-ଦେଭୋଗ ରାସ୍ତା ପୂର୍ତ୍ତ ବିଭାଗ ଅଧୀନରେ ରହିଛେ। ହେଲେ ରାସ୍ତାଟା ଠିକ୍ ହିସାବେ ତିଆର ନାଇଁ ହେଇ। ଯେନ୍ଥିରଲାଗି ରାସ୍ତା ମଝିରେ ପୁଚ୍କୁନା ପାଏନ୍ ଜମି ଗୁଟେ ବଁଧ୍ର ଭରମ୍ ସୁରୁଷ୍ଟି କରୁଛେ। ରାସ୍ତାର ଏନ୍ତା ଅବସ୍ତା ଲାଗି ସିଙ୍ଗଝର ଗଁାବାସୀ ବଡ଼ଭାରି ସମସିଆର ସାମନା କରୁଛନ୍।
ସୂଚନା ହିସାବେ ଇ ରାସ୍ତାଟା ସିନାପାଲି ବ୍ଲକରୁ ଛତିଶଗଡ଼ ରାଏଜ୍ର ଦେଭୋଗ ବ୍ଲକ ସଂଗେ ଯୁଡ଼ି ହେଇଛେ। ଇତାର ବାହାରେ ରାସ୍ତାଟା କଳାହାଣ୍ଡି ଜିଲା ଧର୍ମଗଡ଼ ଭାୟା ଭବାନୀପାଟଣା ସଂଗେ ଯୁଡ଼ି ହେଇଛେ। ହେଲେ ଇ ରାସ୍ତାରେ ହରମେଶା ମଏଲା ପାଏନ୍ ଜମା ହେବାର ଲାଗି ମଶା, ମାଛି ଆର ଦୁରଗଁଧ୍ରେ ଥାନୀଅ ଲୋକ୍ ଉନ୍ମୁଦା ହେଇଯାଉଛନ୍। ଇ ସମସିଆର ସମାଧାନ ଲାଗି ଗଁାବାସୀ ଅନେକ ଥର ପରଶାସନକେ ଗୁହାରି କରି ନିରାଶ ହେଇଥିବାର ଅଭିଯୋଗ କରିଛନ୍। ସିଙ୍ଗଝର ଗଁାଟା ସିନାପାଲି ବ୍ଲକର ଗୁଟେ ପୁରାତନ ଗଁା। ଇ ଗଁାରେ ସବୁ ଜାତିର ପାଖାପାଖି ୭ ଶହ ଲୋକ୍ ବାସ କରୁଛନ୍। ବହୁତ୍ ବଛର ହେଲା ଇଠାନେ ଗୁଟେ ସାପ୍ତାହିକ ବଜାର ବସୁଛେ। ହେଲେ ରାସ୍ତାରେ ପୁଚ୍କୁନା ପାଏନ୍ ଜମା ହେବାର ଲାଗି ରାସ୍ତାରେ ଗଲାଆଏଲା ଲୋକ୍ ବଡ଼ଭାରି ସମସିଆର ସାମନା କରୁଛନ୍। ଇ ବାବ୍ଦେ ଖଡ଼ିଆଳ ପୂର୍ତ୍ତ ବିଭାଗ ଡିଭିଜନ ନିର୍ବାହୀ ଯନ୍ତ୍ରୀ କିଶୋର କୁମାରକୁଁ ପଚରାଲାରୁ ଦାଇତିଅରେ ଥିବାର ସିନାପାଲି ଯନ୍ତ୍ରୀକୁଁ ପଚାରି ବୁଝୁଛେଁ, ବହୁତ୍ ଜଲ୍ଦି ସମସିଆର ସମାଧାନ କରାଯିବା ବଲି ସେ କହିଥିଲେ।
