ଓ୍ବେଲିଂଟନ,୨୪ା୨- ଦିନିକିଆ ସିରିଜ୍ରେ ଖାତା ଖୋଲିପାରି ନ ଥିବା ବିରାଟ କୋହଲିଙ୍କ ନେତୃତ୍ୱାଧୀନ ଭାରତୀୟ ଦଳ ନ୍ୟୁଜିଲାଣ୍ଡ ବିପକ୍ଷ ପ୍ରଥମ ଟେଷ୍ଟରେ ଲଜ୍ଜାଜନକ ପରାଜୟ ବରଣ କରିଛି। ନ୍ୟୁଜିଲାଣ୍ଡ ୧୦ ଉଇକେଟରେ ଭାରତକୁ ପରାସ୍ତ କରି ଦେଇଛି। ପ୍ରଥମ ଇନିଂସରେ ଭାରତୀୟ ଦଳ ୧୬୫ ରନ୍ କରିଥିବାବେଳେ ନ୍ୟୁଜିଲାଣ୍ଡ ୩୪୮ ରନ୍ କରିଥିଲା। ପରେ ୧୮୩ ରନ୍ ପଛରେ ଥିବା ଟିମ୍ ଇଣ୍ଡିଆ ତା’ର ଅସମାପ୍ତ ଦ୍ୱିତୀୟ ଇନିଂସ ସ୍କୋର (୧୪୪/୪)ରୁ ବ୍ୟାଟିଂ ଆରମ୍ଭ କରି ବଳକା ୬ ଉଇକେଟରେ କେବଳ ୪୭ ରନ୍ ଯୋଡ଼ି ପାରିଥିଲା। ପୂର୍ବଦିନ ଅପରାଜିତ ଥିବା ଉପଅଧିନାୟକ ଅଜିଙ୍କ୍ୟ ରାହାନେ ୨୯ ଓ ହନୁମା ବିହାରୀ ୧୫ ରନ୍ କରି ଆଉଟ୍ ହୋଇଥିଲେ। ନିମ୍ନକ୍ରମରେ ରିଷଭ ପନ୍ତ ୨୫ ଓ ଈଶାନ୍ତ ଶର୍ମା ୧୨ ରନ୍ କରିଥିଲେ। ଫଳରେ ଦଳ ୧୯୧ ରନ୍ରେ ସୀମିତ ରହିଥିଲା। ଘରୋଇ ଦଳ ପାଇଁ ଟିମ୍ ସୌଦି ସର୍ବାଧିକ ୫ ଉଇକେଟ ନେଇଥିଲେ। ତାଙ୍କ ଛଡ଼ା ଟ୍ରେଣ୍ଟ ବୋଲ୍ଟ ୪ ଓ କଲିନ ଡିଗ୍ରାଣ୍ଡହୋମ ଗୋଟିଏ ଉଇକେଟ ହାତେଇଥିଲେ। ଫଳରେ ଘରୋଇ ଦଳ ଆଗରେ ମାତ୍ର ୯ରନ୍ର ବିଜୟଲକ୍ଷ୍ୟ ଧାର୍ଯ୍ୟ ହୋଇଥିଲା। ମାମୁଲି ଟାଗେର୍ଟକୁ ନ୍ୟୁଜିଲାଣ୍ଡ ୧.୪ ଓଭରରେ ବିନା କ୍ଷତିରେ ହାସଲ କରି ନେଇଥିଲା। ପୂରା ମ୍ୟାଚ୍ରେ ୯ ଉଇକେଟ ନେଇଥିବା ସୌଦିଙ୍କୁ ମ୍ୟାନ୍ ଅଫ୍ ଦି ମ୍ୟାଚ୍ ବିବେଚିତ କରାଯାଇଛି। ସିରିଜ୍ର ଦ୍ୱିତୀୟ ତଥା ଅନ୍ତିମ ଟେଷ୍ଟ ଖ୍ରୀଷ୍ଟଚର୍ଚ୍ଚଠାରେ ୨୯ରୁ ଖେଳାଯିବ।
