ଛତ୍ରପୁର,୨୩ା୧୦(ଡି.ଏନ.ଏ.)- ବ୍ରହ୍ମପୁର ସହର ପାଇଁ ରିଂ ରୋଡ୍ର ପରିକଳ୍ପନା ଦୀର୍ଘ ବର୍ଷ ହେଲା ହୋଇଛି। ମାତ୍ର ତାହା କାର୍ଯ୍ୟକ୍ଷମ ହେବାରେ ଅହେତୁକ ବିଳମ୍ବ ହେଉଛି। ଘରୋଇ ଜମି ଅଧିଗ୍ରହଣରେ ସମସ୍ୟା ଦେଖାଦେଇଥିବାରୁ ଏପରି ବିଳମ୍ବ ହେଉଥିବା ଜଣାପଡିଛି। ମଙ୍ଗଳବାର ସନ୍ଧ୍ୟାରେ ଛତ୍ରପୁରସ୍ଥିତ ଜିଲାପାଳଙ୍କ ସମ୍ମିଳନୀ ଗୃହରେ ଏନେଇ ଏକ ଆଲୋଚନା ବୈଠକ ଅନୁଷ୍ଠିତ ହୋଇଥିଲା। ଏଥିରେ ଜିଲାପାଳ ବିଜୟ ଅମୃତା କୁଲାଙ୍ଗେ ଅଧ୍ୟକ୍ଷତା କରିଥିଲେ। ବୈଠକକୁ ରିଂ ରୋଡ୍ ଯୋଗୁ କ୍ଷତିଗ୍ରସ୍ତ ହେବାକୁ ଥିବା ଘରୋଇ ଜମି ଓ ଘର ମାଲିକଙ୍କୁ ଡକାଯାଇଥିଲା। ତେବେ ଅଳ୍ପ କେତେଜଣ ଲୋକ ଆସିଥିଲେ। ବ୍ରହ୍ମପୁର ରିଂ ରୋଡ୍ ପାଇଁ ମନହରା, ବେନ୍ଦାଳିଆ, କୁସୁମି, ମହୁଡା, କୁମାରପୁର, ମଦନ ମୋହନପୁର, ଦକ୍ଷିଣପୁର ଗଁା ଲୋକେ କ୍ଷତିଗ୍ରସ୍ତ ହେବେ। ରିଂ ରୋଡ୍ ପାଇଁ ଜମି ଦେବାକୁ ଲୋକେ ରାଜି ଥିବା କହିଥିଲେ। ମାତ୍ର ସରକାରୀ ଓ ଘରୋଇ ଦରର ମଧ୍ୟବର୍ତ୍ତୀ ଦର ଧାର୍ଯ୍ୟ କରିବାକୁ ଜିଲାପାଳଙ୍କୁ ଏମାନେ ଅନୁରୋଧ କରିଥିଲେ। ଏ ସମ୍ପର୍କରେ ପରବର୍ତ୍ତୀ ପର୍ଯ୍ୟାୟରେ ଜଣାଇ ଦିଆଯିବ ବୋଲି ଜିଲାପାଳ କହିଥିଲେ। ସରକାରୀ ନିୟମ ଅନୁସାରେ ଜମି ଅଧିଗ୍ରହଣରେ ବିଳମ୍ବ ହେବ ବୋଲି ଲୋକଙ୍କଠାରୁ କିଛି ଦର ଧାର୍ଯ୍ୟ କରି ପ୍ରଶାସନ ଜମି କିଣିବାକୁ ସ୍ଥିର କରିଛି। ଏଥିରେ ଅତିରିକ୍ତ ଜିଲାପାଳ (ରାଜସ୍ବ) ଲକ୍ଷ୍ମୀକାନ୍ତ ସେଠୀ, ବ୍ରହ୍ମପୁର ଉପଜିଲାପାଳ ସିନ୍ଦେ ଦାତ୍ତାତ୍ରେୟ ଭାଉସାହେବ, ଡେପୁଟି କଲେକ୍ଟର (ରାଜସ୍ବ) ଦିବ୍ୟଲୋଚନ ମହନ୍ତଙ୍କ ସମେତ ବିଭିନ୍ନ ବିଭାଗର ଅଧିକାରୀମାନେ ଉପସ୍ଥିତ ଥିଲେ।
