ବ୍ରହ୍ମପୁର ଅଫିସ,୨୪ା୫- ବ୍ରହ୍ମପୁର ବଡ଼ ମେଡିକାଲରେ ଶିଶୁ ବିକ୍ରି ନେଇ ଚାଇଲ୍ଡ ଲାଇନ୍ ପକ୍ଷରୁ ଶନିବାର ଅଭିଯୋଗ ହୋଇଛି। ଚାଇଲ୍ଡ ଲାଇନ ଏନେଇ ଶିଶୁ ମଙ୍ଗଳ କମିଟି (ସିଡବ୍ଲ୍ୟୁସି)କୁ ଜଣାଇବା ପରେ ୭ଦିନ ମଧ୍ୟରେ ଏହାର ତଦନ୍ତ କରି ରିପୋର୍ଟ ଦେବାକୁ ସିଡବ୍ଲ୍ୟୁସି ଚାଇଲ୍ଡ ଲାଇନ୍ କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦେଇଛି। ନିର୍ଦ୍ଦେଶ ପାଇବା ପରେ ଚାଇଲ୍ଡ ଲାଇନ ପକ୍ଷରୁ କୋଦଳା ଥାନାରେ ଅଭିଯୋଗ ହୋଇଛି।
ପ୍ରକାଶ ଯେ, ଗଞ୍ଜାମ ଜିଲା କୋଦଳା ଥାନା ଅଞ୍ଚଳର ଜଣେ ୩୨ ବର୍ଷୀୟା ଆସନ୍ନ ପ୍ରସବା ଗତ ୧୮ ତାରିଖରେ ବ୍ରହ୍ମପୁର ବଡ ମେଡିକାଲରେ ଭର୍ତ୍ତି ହୋଇଥିଲେ। ସେଠାରେ ତାଙ୍କର ଏକ ଶିଶୁପୁତ୍ର ଜନ୍ମ ହୋଇଥିଲା। ପ୍ରସୂତି ବିଭାଗର ଜଣେ ବ୍ୟକ୍ତି ଶିଶୁ ପୁତ୍ରଟିକୁ ବିକ୍ରି କରିବାକୁ ମହିଳାଙ୍କୁ ଲୋଭ ଦେଖାଇଥିଲେ। ସେଥିପାଇଁ ମୋଟା ଅଙ୍କର ଟଙ୍କା ଦେବାକୁ ମଧ୍ୟ କହିଥିଲେ। ଏହି ଖବର ଚାଇଲ୍ଡ ଲାଇନ ପାଖରେ ପହଞ୍ଚତ୍ଥିଲା। ଚାଇଲ୍ଡ ଲାଇନ୍ ନିର୍ଦ୍ଦେଶକ ସୁଧୀର ସାବତଙ୍କ ନିର୍ଦ୍ଦେଶ କ୍ରମେ ସଂଯୋଜକ ସାଇପ୍ରସାଦ ସାମଲ ଓ ସଦସ୍ୟା ପ୍ରଣତୀ କୌର ମେଡିକାଲକୁ ଯାଇ ଶିଶୁପୁତ୍ରଙ୍କ ମା’ଙ୍କୁ ପଚରାଉଚରା କରିଥିଲେ। ତେବେ ମହିଳା ଜଣକ ଶିଶୁପୁତ୍ର ବିକ୍ରି ଘଟଣାକୁ ଖଣ୍ଡନ କରିଥିଲେ। ମାତ୍ର ସନ୍ଦେହ ହେବାରୁ ଚାଇଲ୍ଡ ଲାଇନ ଏନେଇ ନଜର ରଖିବାକୁ ପ୍ରସୂତି ବିଭାଗ କର୍ମକର୍ତ୍ତାଙ୍କୁ ସୂଚନା ଦେଇଥିଲେ।
ଏନେଇ କୋଦଳା ଥାନା ଅଧିକାରୀ ଦେବାଶିଷ ମହାପାତ୍ରଙ୍କ ସହ ଯୋଗାଯୋଗ ବେଳେ ସେ କହିଛନ୍ତି, ଘଟଣାଟି ଯଦିଓ ବୈଦ୍ୟନାଥପୁର ଥାନା ଅଞ୍ଚଳରେ ଘଟିଛି, ଚାଇଲ୍ଡ ଲାଇନ ପକ୍ଷରୁ ଅଭିଯୋଗ ପରେ ଆମେ ତଦନ୍ତ ଜାରି ରଖିଛୁ।
