ଭବାନୀପାଟଣା,୧୬।୯(ସ୍ବ.ପ୍ର.) କଳାହାଣ୍ଡି ଜିଲା ଲାଞ୍ଜିଗଡ ବ୍ଲକ ପେନସୁର ଗ୍ରାମର ଦଶମିନା ମାଝି (୪୫) ଗତ ୨୦୧୪ ଅଗଷ୍ଟ ୧୩ ତାରିଖରେ ବିଦ୍ୟୁତ୍ ଆଘାତରେ ମୃତ୍ୟୁ ବରଣ କରିଥିଲେ। ଅଙ୍ଗନୱାଡି କର୍ମୀ ଥିବା ଦଶମିନା କେନ୍ଦ୍ର ନିକଟରେ ଥିବା ନଳକୂପରୁ ପାଣି ନେଉଥିବା ବେଳେ ହଠାତ୍ ୧୧ କେଭି ବିଦ୍ୟୁତ ତାର ତାଙ୍କ ଉପରେ ଛିଣ୍ଡିପଡିଥିଲା। ଫଳରେ ସେଠାରେ ଦଶମିନା ଜଳିଯାଇଥିଲେ। ଏପରି ଘଟଣା ସମ୍ପର୍କରେ ସାମାଜିକ କର୍ମୀ ଦିଲୀପ କୁମାର ଦାସ ଜାତୀୟ ମାନବିଧିକାର କମିଶନ (ଏନଏଚଆରସି)ରେ ଏକ ମାମଲା ରୁଜୁ କରିଥିଲେ। ଏନଏଚ୍ଆରସିଙ୍କ ନିର୍ଦ୍ଦେଶକ୍ରମେ ରାଜ୍ୟ ସରକାର ମୃତା ଦଶମିନାଙ୍କ ସ୍ବାମୀ ଧନପତି ମାଝିଙ୍କୁ ୨ ଲକ୍ଷ ଟଙ୍କାର ଚେକ୍ ପ୍ରଦାନ କରିଛନ୍ତି। ପ୍ରଥମେ ରାଜ୍ୟ ସରକାର ଏହି ଘଟଣାରେ ଅବହେଳା କରୁଥିଲେ। କିନ୍ତୁ ମାନବିଧିକାର କମିଶନ ୨୨ ଫେବୃୟାରୀ ୨୦୧୯ରେ ମୁଖ୍ୟ ଶାସନ ସଚିବଙ୍କୁ ସମନ ଜାରି କରିବା ପରେ ସରକାର ଏହି ଅର୍ଥ ପ୍ରଦାନ କରିବା ସହ ବିଦ୍ୟୁତ୍ ବିଭାଗର ଲଲିତ ମେହେର ଓ ମନୋରଞ୍ଜନ ନାଏକଙ୍କ ବିରୋଧରେ ଚାର୍ଟସିଟ ଦାଖଲ କରିଛନ୍ତି।
