ଓଡ଼ଗାଁ,୧୦ା୧୦(ସ୍ବ.ପ୍ର.): ଓଡ଼ଗାଁରେ ବିଜେ ଶ୍ରୀରଘୁନାଥଜୀଉଙ୍କ ମନ୍ଦିରରେ ସୋମବାର ବିଜୟା ଦଶମୀ ପାଳିତ ହୋଇଯାଇଛି। ଏହି ତିଥିରେ ପ୍ରଭୁ, ମା’ ସୀତା ଓ ଅନୁଜ ଲକ୍ଷ୍ମଣ ସୁନା ବେଶରେ ଶ୍ରଦ୍ଧାଳୁଙ୍କୁ ଦର୍ଶନ ଦେଇଥିଲେ। ରାମାୟଣ ଅନୁସାରେ ଏହି ଦିନ ପ୍ରଭୁ ମା ଦୁର୍ଗାଙ୍କୁ ୧୦୮ ପଦ୍ମ ଅର୍ପଣ କରିବା ସହିତ ଲଙ୍କାଧୀଶ ରାବଣକୁ ବଧକରି ମା’ସୀତାଙ୍କୁ ଉଦ୍ଧାର କରି ଅଯୋଧ୍ୟା ପ୍ରତ୍ୟାବର୍ତ୍ତନ କରିଥିଲେ। ଏହି ଅବସରରେ ରାତି ୮ଟାରେ ଶ୍ରୀଜୀଉଙ୍କ ଆଜ୍ଞାମାଳ ପାଇ ବିଜେ ପ୍ରତିମା ମଣି ବିମାନରେ ବିଜେ କରି ପଟୁଆରରେ ନଗର ଭ୍ରମଣ କରିଥିଲେ। ଶ୍ରୀଜୀଉଙ୍କ ପଟୁଆରରେ ଛତ୍ରୀ, ତ୍ରାସ, ଘୋଡା, ବାଘ ନାଚ ସହିତ ବାଣ ରୋଶଣି ସ୍ଥାନ ପାଇଥିଲା। ବିଜୟ ମଣ୍ଡପ ସାହି ମୁଣ୍ଡରେ ଥିବା ଦଶହରା ମଣ୍ଡପରେ ଶ୍ରୀଜୀଉଙ୍କୁ ସ୍ବତନ୍ତ୍ର ପୂଜାର୍ଚ୍ଚନା କରାଯାଇଥିଲା । ପୁନଶ୍ଚ ଶ୍ରୀଜୀଉ ପଟୁଆରରେ ନଗର ଭ୍ରମଣ ସାରି ରାତି ପ୍ରାୟ ୧୦ଟାରେ ମନ୍ଦିରକୁ ପ୍ରତ୍ୟାବର୍ତ୍ତନ କରିଥିଲେ । ରାତ୍ରଧୂପ ଓ ବଡ ସିଂହାର ନୀତି ପରେ ରାତି ୧୧ଟାରେ ମନ୍ଦିର ପହୁଡ ହୋଇଥିଲା । ପାଳିଆ ପଣ୍ଡା ସଞ୍ଜୀବ ନନ୍ଦ, ମନ୍ଦିର ପରିଚ୍ଛା ହରିବନ୍ଧୁ ଷଡଙ୍ଗୀ, ମନ୍ଦିର ପରିଚାଳକ ଜିତେନ୍ଦ୍ର କୁମାର ମିଶ୍ର, ପୂଜକ ପରିଷଦ କର୍ମକର୍ତ୍ତା କାର୍ଯ୍ୟକ୍ରମ ପରିଚାଳନା କରିଥିଲେ। ଶ୍ରୀରଘୁନାଥଜୀଉଙ୍କ ପାର୍ଶ୍ୱ ଦେବଦେବୀ ଭାବେ ପୂଜିତ ମା’ ଦୁର୍ଗାଙ୍କ ପୀଠରେ ମହା ସପ୍ତମୀ, ମହା ଅଷ୍ଟମୀ, ନବମୀ ଓ ଦଶମୀରେ ଷୋଡଶ ଉପଚାରରେ ପୂଜାର୍ଚ୍ଚନା କରାଯାଇଥିଲା।
