ବିଜେପୁର, ୫।୬(ଡି.ଏନ୍.ଏ.): ବରଗଡ଼ ଜିଲା ବିଜେପୁର ବ୍ଲକରେ କ୍ରମଶଃ କରୋନା ଆକ୍ରାନ୍ତ ସଂଖ୍ୟା ବୃଦ୍ଧି ପାଇବାରେ ଲାଗିଛି। ଶୁକ୍ରବାର ସୁଦ୍ଧା ଜିଲାରେ ୧୬ଜଣ ଆକ୍ରାନ୍ତ ଚିହ୍ନଟ ହୋଇଥିବାବେଳେ ବିଜେପୁର ବ୍ଲକର ୮ଜଣ ଅଛନ୍ତି। ଫଳରେ ଏହା ପ୍ରଶାସନ ପାଇଁ ଚିନ୍ତାର ବିଷୟ ହୋଇଛି। ସମ୍ପୃକ୍ତ ସଂକ୍ରମିତ ବ୍ୟକ୍ତିମାନେ ତାମିଲନାଡୁ ଫେରନ୍ତା। ଏବେ ବି ବିଭିନ୍ନ କ୍ବାରାଣ୍ଟାଇନ ସେଣ୍ଟରରେ ବହୁ ତାମିଲନାଡୁ ଫେରନ୍ତା ରହିଛନ୍ତି। ତେଣୁ ସଂକ୍ରମିତ ସଂଖ୍ୟା ବଢ଼ିବାର ଆଶଙ୍କା ରହିଥିବାରୁ ଅଞ୍ଚଳବାସୀ ଭୟଭୀତ ହୋଇଛନ୍ତି। ତେବେ ସଂକ୍ରମିତଙ୍କ ସଂଖ୍ୟାକୁ ଦୃଷ୍ଟିରେ ରଖି ଶୁକ୍ରବାର ଜାରିଂ, ସାତବନ୍ଧ, ବାନ୍ଦୁପାଲି, କନପୁରୀ, ବେନିଆଁଚାଲ, ଦର୍ଲିପାଲି, ପୁଟୁକା, କନଡିହି, ଆଇମାଳ, ମସନାବାହାଲ ଆଦିକୁ ପ୍ରଶାସନ ପକ୍ଷରୁ କନ୍ଟେନ୍ମେଣ୍ଟ ଜୋନ୍ ଭାବେ ଘୋଷଣା କରାଯାଇ ରାସ୍ତାକୁ ସିଲ୍ କରାଯାଇଛି। ନୂତନ ସଂକ୍ରମିତଙ୍କ ସଂସ୍ପର୍ଶରେ ଆସିଥିବା ଲୋକଙ୍କୁ ଟ୍ରେସିଂ କରାଯାଉଥିବା ଜଣାପଡିଛି। ମାଜିଷ୍ଟ୍ରେଟ ଦାୟିତ୍ୱରେ ଥିବା ତହସିଲଦାର କୁଳମଣି ରଣବିଡା, ବିଡିଓ ପଦ୍ମନାଭ ସାମନ୍ତ ରାୟ ବିଭିନ୍ନ କନ୍ଣ୍ଟେନ୍ମେଣ୍ଟ ଅଞ୍ଚଳ ପରିଦର୍ଶନ କରି ସ୍ଥିତି ନିରୀକ୍ଷଣ କରିଥିବା ଜଣାପଡିଛି।
