ଭୁବନେଶ୍ୱର, ୩।୫(ବ୍ୟୁରୋ): ଗତବର୍ଷ ମେ’ ୩ତାରିଖରେ ହୋଇଥିବା ପ୍ରଳୟଙ୍କରୀ ବାତ୍ୟା ‘ଫନୀ’ର ବିଶେଷ ପ୍ରଭାବ ଭୁବନେଶ୍ୱରରେ ପଡ଼ିଥିଲା। ଏହାଦ୍ୱାରା ବ୍ୟାପକ କ୍ଷୟକ୍ଷତି ମଧ୍ୟ ଘଟିଥିଲା। ଉଜୁଡ଼ି ଯାଇଥିଲା ରାଜଧାନୀର ଚିତ୍ର। ଲୋକେ ପାନୀୟ ଜଳଠାରୁ ଆରମ୍ଭ କରି ଗମନାଗମନ, ବିଦ୍ୟୁତ୍ ଓ ଟେଲି ଯୋଗାଯୋଗ ସେବା ନ ପାଇ ଛଟପଟ ହୋଇଥିଲେ। ଭୁବନେଶ୍ୱରରେ ଥିବା ସରକାରୀ ଓ ଘରୋଇ କାର୍ଯ୍ୟାଳୟଠାରୁ ଆରମ୍ଭ କରି ଶିକ୍ଷାନୁଷ୍ଠାନ, ଶପିଂ ମଲ୍, ରେଳଷ୍ଟେଶନ ଫନୀ ପ୍ରକୋପରୁ ବର୍ତ୍ତିପାରି ନ ଥିଲା। କାହାଉପରେ ଗଛ ଭାଙ୍ଗି ପଡ଼ିଥିଲା ତ’ କାହାର କାଚ ଭାଙ୍ଗି ଯାଇଥିଲା ଆଉ କାହାର ନାମ ଫଳକ ଉଭାନ ହୋଇଯାଇଥିଲା। ଫନୀର ୩ଘଣ୍ଟାର ତାଣ୍ଡବ ପାଇଁ ଭୁବନେଶ୍ୱରବାସୀ ୩୦ଦିନ ଛଟପଟ ହୋଇଥିଲେ। ବିଶେଷ କରି ବସ୍ତିବାସିନ୍ଦା ଓ ଦିନ ମଜୁରିଆଙ୍କ ପରିବାରର ଗୁଜୁରାଣ ମେଣ୍ଟାଇବା ଏକ ଆହ୍ବାନ ପାଲଟିଥିଲା। ଯେଉଁ ଆହ୍ବାନ ଆଜି ପର୍ଯ୍ୟନ୍ତ ବଜାୟ ରହିଛି। ଫନୀ ସମୟରେ ସମ୍ପୃକ୍ତ ବସ୍ତିବାସିନ୍ଦା, ଦିନ ମଜୁରିଆ ଖାଇବାକୁ ନ ପାଇ ଉପାସ ରହୁଥିଲେ, ଆଉ ବର୍ତ୍ତମାନ କରୋନା ମହାମାରୀ ପାଇଁ ନିଜର ସଂଘର୍ଷ ଜାରି ରଖିଛନ୍ତି।
ରାଶନ ପାଇଁ ଲାଗିଥିଲା ୩୦ଦିନ
ଫନୀ ପରେ ସମସ୍ତ ବସ୍ତିବାସିନ୍ଦାଙ୍କୁ ରାଶନ ବଣ୍ଟନ ଓ ସହାୟତା ପ୍ରଦାନରେ ବିଏମ୍ସି ଅହେତୁକ ବିଳମ୍ବ କରିଥିଲା। ଫନୀକୁ ସପ୍ତାହ ବିତିବା ପରେ ବିଏମ୍ସି ଲୋକଙ୍କୁ ରାଶନ ବାଣ୍ଟିବା ଆରମ୍ଭ କରିଥିଲା। ଏପରି କି ଲୋକଙ୍କ ମୁଣ୍ଡ ଗୁଞ୍ଜିବା ପାଇଁ ଆବଶ୍ୟକ ପାଲ ଖଣ୍ଡେ ଯୋଗାଇବାକୁ ବିଏମ୍ସିକୁ ମାସେ ସମୟ ଲାଗିଥିଲା। ଫଳରେ ଫନୀ ପରେ ଦୀର୍ଘ ମାସେ କାଳ ଗରିବ ଓ ଦିନ ମଜୁରିଆ ଭୋକ ଉପାସରେ ରହିବା ସହ ଖୋଲା ଆକାଶ ତଳେ ଶୋଇଥିଲେ।
ଉଠାଦୋକାନୀଙ୍କ ସହାୟତା ପାଣିରେ ଗାର
ଫନୀରେ ଭୁବନେଶ୍ୱରରେ ଥିବା ଉଠାଦୋକାନୀ ବିଶେଷ ଭାବେ କ୍ଷତିଗ୍ରସ୍ତ ହୋଇଥିଲେ। ଏଥିପାଇଁ ରାଜ୍ୟ ସରକାର ପଞ୍ଜୀକୃତ ଉଠାଦୋକାନୀଙ୍କୁ ୧୦ହଜାର ଟଙ୍କାର ସହାୟତା ପ୍ରଦାନ ପାଇଁ ଘୋଷଣା କରିଥିଲେ। ବର୍ଷେ ପୂରିଲାଣି, ହେଲେ ଏଯାବତ୍ ଉଠାଦୋକାନୀଙ୍କୁ ଫନୀ ସହାୟତା ମିଳିପାରି ନାହିଁ। ପଞ୍ଜୀକୃତ ୨୨ହଜାର ଉଠାଦୋକାନୀଙ୍କ ମଧ୍ୟରୁ ୩୦ପ୍ରତିଶତ ବ୍ୟବସାୟୀ ଏଯାବତ୍ ସହାୟତା ପାଇ ନ ଥିବା ଅଭିଯୋଗ ହେଉଛି। ବାରମ୍ବାର ଏନେଇ ବିଏମ୍ସି କାର୍ଯ୍ୟାଳୟ ମଧ୍ୟ ସମ୍ପୃକ୍ତ ବ୍ୟବସାୟୀ ଘେରାଉ କରୁଥିବା ନଜିର ରହିଛି।
ଥୁଣ୍ଟା ହୋଇଯାଇଥିଲା ସବୁଜ ରାଜଧାନୀ
୧୭୦ କି.ମି. ବେଗରେ ପବନ ସହ ବର୍ଷା ସାଙ୍ଗକୁ ୩ ଘଣ୍ଟାର ତାଣ୍ଡବ। ଏଥିରେ ବିଶେଷ ଭାବେ କ୍ଷତିଗ୍ରସ୍ତ ହୋଇଥିଲା ରାଜଧାନୀ ଭୁବନେଶ୍ୱରର ସବୁଜ ଭରା ପରିବେଶ। ରାସ୍ତା ଘାଟ ଭଙ୍ଗା ଗଛରେ ଭର୍ତ୍ତି ହୋଇଥିଲା। ଯାହାକୁ କାଟି ଉଠାଇବା ପାଇଁ ବିଏମ୍ସିକୁ ୬ମାସ ସମୟ ଲାଗିଥିଲା। ଏବେ ବର୍ଷେ ପରେ ରାଜଧାନୀର ସବୁଜିମା ପୁଣି ଫେରିଥିବା ଦେଖିବାକୁ ମିଳିଛି।
ଖାଦ୍ୟ, ପାନୀୟ ପାଇଁ ବିକଳ
୩ଘଣ୍ଟାର ତାଣ୍ଡବ ପରେ ୩ଦିନ ଯାଏ ଘର ଆଗରେ ଗଛ ପଡ଼ି ରହିଥିଲା। ବଜାରକୁ ଆସିବା ତ ଦୂରର କଥା ଲୋକଙ୍କୁ ଘରୁ ବାହାରକୁ ବାହାରିବା କଷ୍ଟସାଧ୍ୟ ହୋଇପଡ଼ିଥିଲା। ରାସ୍ତାରେ ଗଛ ପଡ଼ିଥିବାରୁ ଅତ୍ୟାବଶ୍ୟକ ସାମାଗ୍ରୀ ଭୁବନେଶ୍ୱରକୁ ଆସିପାରୁ ନ ଥିଲା। ହାଟ ବଜାର ବନ୍ଦ ଥିବାରୁ ଲୋକେ ଖାଦ୍ୟ ପାନୀୟ ପାଇଁ ନାନା ସମସ୍ୟା ଅନୁଭବ କରିଥିଲେ। ସେହି ସମୟରେ ବିଏମ୍ସି ପକ୍ଷରୁ ପାଖାପାଖି ୫୩ହଜାର ବସ୍ତିବାସିନ୍ଦାଙ୍କୁ ସ୍ଥାନାନ୍ତରିତ କରାଯାଇ ରନ୍ଧ୍ୟା ଖାଦ୍ୟଯୋଗାଇ ଦିଆଯାଇଥିଲା।
