ଭୁବନେଶ୍ୱର,୩।୫(ବ୍ୟୁରୋ): ଭୁବନେଶ୍ୱର ବମିଖାଲ ଅଞ୍ଚଳରେ ସର୍ବାଧିକ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି। ଏବେ ମଧ୍ୟ ଲୋକେ ଏହି ଅଞ୍ଚଳ ନଁା ଶୁଣିଲେ ଭୟ କରୁଛନ୍ତି। ଏପରିକି ହସ୍ପିଟାଲ, ଡାକ୍ତରମାନଙ୍କ ମନରେ ମଧ୍ୟ ଛନକା ପଶୁଛି। ସୋମବାର ଏହି ଅଞ୍ଚଳରୁ ଆସିଥିବା ଜଣେ ରୋଗୀଙ୍କୁ ଏକ ଘରୋଇ ହସ୍ପିଟାଲ ଚିକିତ୍ସା ନ କରି ଫେରାଇ ଦେଇଥିବାରୁ ଅଧାବାଟରେ ଜୀବନ ଚାଲିଯାଇଛି। ଅନ୍ୟପଟେ ପୁଅ ମଧ୍ୟ ଲକଡାଉନ ଯୋଗୁ ନ ଆସିପାରିବାରୁ ଶେଷରେ ଝିଅ ବାପାର ମୁଖାଗ୍ନି ଦେଇ ଅନ୍ତିମ ସଂସ୍କାର କରିଛି। ଏପରିକି ଘର ମାଲିକ କି ସ୍ଥାନୀୟ ଲୋକେ ବି ସହଯୋଗ କରି ନ ଥିଲେ।
ସୂଚନା ଅନୁଯାୟୀ, ଯାଜପୁର ଅଞ୍ଚଳର ରବୀନ୍ଦ୍ର ନାୟକ(୬୦) ଝିଅ ଓ ସ୍ତ୍ରୀଙ୍କ ସହ ବମିଖାଲ ନିକଟ ବାସୁଦେବ ନଗରରେ ଭଡ଼ାରେ ରୁହନ୍ତି। ସେ ଜଣେ ଅବସରପ୍ରାପ୍ତ ସରକାରୀ କର୍ମଚାରୀ। ଗତ ୨୭ତାରିଖ ରାତିରେ ରବୀନ୍ଦ୍ରଙ୍କ ଛାତିରେ ଭୀଷଣ ଯନ୍ତ୍ରଣା ହୋଇଥିଲା। ଏହାଦେଖି ଝିଅ ସୌଦାମିନୀ ୧୦୮କୁ ଫୋନ୍ କରିଥିଲେ ମଧ୍ୟ ସହାୟତା ମିଳି ନ ଥିଲା। ପରେ ସେ ୧୦୪ ଏବଂ ୧୦୦କୁ ଫୋନ୍ କରିଥିଲେ ସେଠାରୁ ନିରାଶ ହେବା ପରେ ଓଲା ଭଡ଼ା କରି ଏକ ଘରୋଇ ହସ୍ପିଟାଲକୁ ନେଇଥିଲେ। ହେଲେ ବମିଖାଲ ରହୁଥିବା ଜାଣିବା ପରେ ଉକ୍ତ ହସ୍ପିଟାଲ ଫେରାଇ ଦେଇଥିଲେ। ଏହାପରେ ବିଳମ୍ବିତ ରାତିରେ ଝିଅ ଅନ୍ୟ ଏକ ଘରୋଇ ହସ୍ପିଟାଲ ନେଇଥିଲେ। ହେଲେ ସେଠାରେ ଡାକ୍ତର ଚିକିତ୍ସା କରିବାରେ ବିଳମ୍ବ କରିଥିଲେ। ଏପରି କି ଇସିଜି ରିପୋର୍ଟରେ ବ୍ୟତିକ୍ରମ ଦେଖାଯିବା ପରେ ଅନ୍ୟ ହସ୍ପିଟାଲ ନେବାକୁ ଡାକ୍ତର କହିଥିଲେ। ହେଲେ ବାଟରେ ନେବା ସମୟରେ ରବୀନ୍ଦ୍ରଙ୍କ ମୃତ୍ୟୁ ଘଟିଥିଲା। ଝିଅ ମୃତଦେହ ଘରକୁ ନେଇଥିଲେ ମଧ୍ୟ ଘର ମାଲିକ ମନା କରିଥିଲେ। ଏପରିକି ଗ୍ୟାରେଜରେ ମଧ୍ୟ ରଖିବାକୁ ଦେଇ ନ ଥିଲେ। ସ୍ଥାନୀୟ ଲୋକେ ମଧ୍ୟ ସହଯୋଗ ନ କରିବାରୁ କିଛି ବାଟ ନ ପାଇ ସୌଦାମିନୀ ବାପାଙ୍କ ମୃତଦେହ ନେଇ ସତ୍ୟନଗର ମଶାଣିକୁ ଯାଇଥିଲେ। ସେଠାରେ ରାସ୍ତାକଡ଼ରେ ରଖି ପାରଳାଖେମୁଣ୍ଡିରେ ରହୁଥିବା ଭାଇଙ୍କ ଆସିବାକୁ ଅପେକ୍ଷା କରିଥିଲେ। ହେଲେ ଲକଡାଉନ ପାଇଁ ସ୍ଥାନୀୟ ପ୍ରଶାସନ ଭାଇକୁ ନ ଛାଡିବାରୁ ଝିଅ ବାପାଙ୍କୁ ମୁଖାଗ୍ନି ଦେଇଥିଲେ। ଏହାପରେ ମା ଓ ଝିଅ ଯାଜପୁର ଯାଇଥିବା ଜଣାପଡିଛି। ଏହି ଘଟଣା ଗଣମାଧ୍ୟମରେ ପ୍ରଚାର ହେବା ପରେ ସରକାରଙ୍କ ଚେତା ପଶିଥିଲା। ଘରୋଇ ହସ୍ପିଟାଲ ପାଇଁ ଏକ ଗାଇଡଲାଇନ୍ ଜାରି କଲେ। ସମସ୍ତ ଘରୋଇ ହସ୍ପିଟାଲ ଜରୁରୀ ସେବା ଯୋଗାଇ ଦେବେ। ବିଭିନ୍ନ ଆଳ କରି ବିଦା କରିଦେବେ ନାହିଁ ବୋଲି ସରକାର କହିଛନ୍ତି।
