ବାଲେଶ୍ୱର ଅଫିସ, ୧୮।୫-ବାଲେଶ୍ୱର-ଭଦ୍ରକ ଜିଲାର ବିଏସ୍ଏନ୍ଏଲ୍ (ଭାରତ ସଞ୍ଚାର ନିଗମ)ରେ କାଜୁଆଲ ଭାବେ କାର୍ଯ୍ୟ କରୁଥିବା କର୍ମଚାରୀ ସଂଘ ପକ୍ଷରୁ ଶୁକ୍ରବାର ବାଲେଶ୍ୱର ବିଏସ୍ଏନ୍ଏଲ୍ ଅଫିସ୍ ସମ୍ମୁଖରେ ଧାରଣା ଦିଆଯାଇଥିଲା। ୭ମାସର ବକେୟା ଦରମା ମିଳି ନ ଥିବାରୁ କର୍ମଚାରୀମାନେ ବାଧ୍ୟ ହୋଇ ଧାରଣାରେ ବସିଥିବା ଜଣାପଡ଼ିଛି।
ବାଲେଶ୍ୱର-ଭଦ୍ରକ ଜିଲାର ବିଏସ୍ଏନ୍ଏଲ୍ରେ ୨ଶହରୁ ଉର୍ଦ୍ଧ୍ୱ କାଜୁଆଲ କର୍ମଚାରୀ ଭାବରେ କାର୍ଯ୍ୟ କରି ସମସ୍ତଙ୍କୁ ଟେଲିଫୋନ୍ ଏବଂ ଇଣ୍ଟରନେଟ୍ ସେବା ଯୋଗାଇ ଆସୁଛନ୍ତି। ଡାଟା ଏଣ୍ଟ୍ରି, ବିଲ୍ ପେମେଣ୍ଟ, କେବୁଲ୍ ଜଏଣ୍ଟ, ଏମ୍ବିଏଫ୍ ୱାର୍କ ପରି ବିଭିନ୍ନ ବିଭାଗୀୟ କାର୍ଯ୍ୟ ସମ୍ପାଦନ କରୁଛନ୍ତି। ଦକ୍ଷ କୁଶଳୀ କର୍ମଚାରୀଙ୍କ କାମ ମଧ୍ୟ ଅଣକୁଶଳୀ ଭାବରେ ଯୋଗଦାନ କରିଥିବା କାଜୁଆଲ କର୍ମଚାରୀମାନଙ୍କୁ ମଧ୍ୟ ବିଭାଗୀୟ ଅଧିକାରୀମାନେ କରାଉଛନ୍ତି। ସରକାରଙ୍କ ପକ୍ଷରୁ ମାସିକ ୭ହଜାର ୫ଶହ ଟଙ୍କା ବେତନ ନିର୍ଦ୍ଧାରିତ ହୋଇଥିବା ବେଳେ ପ୍ରତିମାସ ଏହା ମିଳିବା କଷ୍ଟ ହୋଇପଡ଼ିଛି। ବିଭାଗୀୟ ଅଧିକାରୀମାନଙ୍କୁ ବାରମ୍ବାର ଲିଖିତ ଜଣାଇବା ପରେ ମଧ୍ୟ ସେ କର୍ଣ୍ଣପାତ କରୁ ନ ଥିବା ସଂଘର ବରିଷ୍ଠ ସଦସ୍ୟ ପୁରୁଷୋତ୍ତମ ଜେନା ଅଭିଯୋଗ କରିଛନ୍ତି। ଉଭୟ ଜିଲାର କର୍ମଚାରୀମାନେ ଶୁକ୍ରବାର ବାଲେଶ୍ୱର ବିଏସ୍ଏନ୍ଏଲ୍ ଅଫିସ୍ର କୌଣସି କର୍ମଚାରୀଙ୍କୁ ଅଫିସ୍ ଭିତରକୁ ଛାଡ଼ି ନ ଥିବାବେଳେ ଦରମା ନ ମିଳିବା ଯାଏ ଅଫିସ୍ ଖୋଲିବାକୁ ଦେଇ ନ ଥିଲେ। ଘଟଣାସ୍ଥଳରେ ଡିଜିଏମ୍ ପ୍ରଶାନ୍ତ କୁମାର ନାୟକ ପହଞ୍ଚତ୍ ୭ ଦିନ ଭିତରେ ୨ମାସର ବକେୟା ଦରମା ଏବଂ ଅନ୍ୟ ବକେୟା ଦରମା ଅତିଶୀଘ୍ର ପଇଠ କରିବାର ପ୍ରତିଶ୍ରୁତି ଦେବା ପରେ ଆନ୍ଦୋଳନକାରୀମାନେ ଆନ୍ଦୋଳନରୁ ଓହରିଥିଲେ। ପ୍ରଦୀପ କୁମାର ନାୟକ, ମନୋଜ ଶତପଥୀ ଓ ଲମ୍ବୋଧର ଦାସ ପ୍ରମୁଖଙ୍କ ନେତୃତ୍ୱରେ କର୍ମଚାରୀମାନେ ଆନ୍ଦୋଳନରେ ବସିଥିଲେ।
