ଜଗତ୍ସିଂହପୁର ଅଫିସ,୨୩ା୧୨: ଜଗତ୍ସିଂହପୁର ଜିଲା କୁଜଙ୍ଗ ଥାନା ଅଧୀନ ବାଲିତୁଠ ପ୍ରାଥମିକ ବିଦ୍ୟାଳୟ ଭାରପ୍ରାପ୍ତ ପ୍ରଧାନଶିକ୍ଷୟିତ୍ରୀ ଲିନା ନନ୍ଦ ଜଣେ ୩ୟ ଶ୍ରେଣୀ ଛାତ୍ରୀଙ୍କୁ ମାଡ଼ ମାରିଥିବା ଅଭିଯୋଗରେ ଗିରଫ ହୋଇଛନ୍ତି। ସେ ଶନିବାର ଛାତ୍ରୀ ବାଲିତୁଠର ଜନ୍ ସ୍ବାଇଁଙ୍କ ଝିଅ ବର୍ଷା ସ୍ବାଇଁ(୯)ଙ୍କୁ ମାଡ଼ ମାରିଥିଲେ। ଏନେଇ ଛାତ୍ରୀଙ୍କ ବାପା କୁଜଙ୍ଗ ଥାନାରେ ଅଭିଯୋଗ କରିଥିଲେ। ପୋଲିସ ଅଭିଯୋଗକୁ ଭିତ୍ତିକରି ଆଇପିସି ଦଫା ୩୪୧/୩୦୭/୩୨୩ ଏବଂ ଜୁଭେନାଇଲ ଜଷ୍ଟିସ୍ ଆକ୍ଟର ଦଫା ୭୫ରେ ଏକ ମାମଲା (୨୯୧/୧୯) ରୁଜୁ କରିବା ସହ ଶିକ୍ଷୟିତ୍ରୀ ନନ୍ଦଙ୍କୁ ଗିରଫ ପରେ କୋର୍ଟଚାଲାଣ କରିଛି।
ଆଇଆଇସି ଦିଲୀପ କୁମାର ସାହୁ ସୂଚନା ଦେଇ କହିଛନ୍ତି, ପିଲାଟି ବିଦ୍ୟାଳୟକୁ ଯାଇଥିବା ବେଳେ ପୂର୍ବାହ୍ନ ପ୍ରାୟ ୧୧ଟା ବେଳେ ଶିକ୍ଷୟିତ୍ରୀ ନନ୍ଦ ତାଙ୍କୁ ନିଷ୍ଠୁର ଭାବରେ ପିଟିଥିଲେ। ଯଦ୍ଦ୍ବାରା ଛାତ୍ରୀଙ୍କ କାନ ମୁଣ୍ଡ, ଗାଲ, ପିଠି, ଗୋଡ ଆଦି ଶରୀରର ଏକାଧିକ ସ୍ଥାନରେ କ୍ଷତ ସୃଷ୍ଟି ହୋଇଥିଲା। ଅତୀତରେ ମଧ୍ୟ ଶିକ୍ଷୟିତ୍ରୀ ପିଲାଙ୍କୁ ମାରଧର କରିଥିବା ଅଭିଯୋଗ ରହିଛି। କିନ୍ତୁ ଛାତ୍ରୀଙ୍କୁ ଶିକ୍ଷୟିତ୍ରୀ କାହିଁକି ଓ କେଉଁଥିପାଇଁ ଏଭଳି ଭାବରେ ପିଟିଥିଲେ ତା’ର କୌଣସି ସନ୍ତୋଷଜନକ ଉତ୍ତର ଆଇଆଇସି ଦେଇପାରି ନ ଥିଲେ। ଛାତ୍ରୀଙ୍କ ବାପା ଅଭିଯୋଗରେ ଦର୍ଶାଇଛନ୍ତି, ଶିକ୍ଷୟିତ୍ରୀ ତାଙ୍କ ଘର ପାଖରେ ଭଡାରେ ରୁହନ୍ତି। ବିଭିନ୍ନ ସମୟରେ ବିଦ୍ୟାଳୟରେ ପିଲାଙ୍କୁ ତାଙ୍କ ଥାଳି ଧୁଆଠାରୁ ଆରମ୍ଭ କରି ଅନ୍ୟ କାମରେ ଲଗାନ୍ତି। ପାଖାପାଖି ୧ ମାସ ହେବ ତାଙ୍କ ଝିଅକୁ ବିଭିନ୍ନ କାମରେ ଲଗାଉଥିଲେ। ଶନିବାର ଝିଅ ବିଦ୍ୟାଳୟ ଯାଇଥିବା ବେଳେ କୌଣସି କାରଣରୁ ତାଙ୍କୁ ଆକ୍ରମଣ କରିଥିଲେ। ଝିଅ କାକୁତି ମିନତି ହୋଇ ଯେତେ ନେହୁରା ହୋଇଥିଲେ ସୁଦ୍ଧା ତାଙ୍କ ହୃଦୟ ତରଳି ନ ଥିଲା। ଝିଅର କୁଜଙ୍ଗ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଚିକିତ୍ସା କରାଯାଇଥିଲେ ସୁଦ୍ଧା ସ୍ବାସ୍ଥ୍ୟାବସ୍ଥା ଆଶାଜନକ ଭାବେ ସୁଧୁରିନି।
