ବଇଣ୍ଡା, ୫ା୪(ଡି.ଏନ.ଏ.)- ଆଠମଲ୍ଲିକ ବ୍ଲକ ଠାକୁରଗଡ ଥାନା ବନମାଳୀପୁର ଗ୍ରାମର ଦୁଷ୍ମନ୍ତ ବେହେରା ଓ ତାଙ୍କ ବାପା ସଞ୍ଜୟ ବେହେରାଙ୍କୁ ସେହି ଗ୍ରାମର ସହଦେବ ଦେହୁରୀ ଶନିବାର ଏକ ଠେଙ୍ଗାରେ ଆକ୍ରମଣ କରିଥିବା ଥାନାରେ ଅଭିଯୋଗ ହୋଇଛି । ପୋଲିସ ଏ ସଂକ୍ରାନ୍ତରେ ୩୭/୨୦ରେ ମାମଲା ରୁଜୁ କରି ତଦନ୍ତ ଚଳାଇଛି । ପୋଲିସ କହିଛି, ଦୁଷ୍ମନ୍ତ ନିକଟସ୍ଥ ଜଙ୍ଗଲରୁ ଛେଳି ଚରାଇ ଘରକୁ ଫେରୁଥିଲେ । ବାଟରେ ସହଦେବ ତାଙ୍କର ଏକ ଛେଳି ନେଇଯାଇଥିଲେ । ସଞ୍ଜୟ ଓ ଦୁଷ୍ମନ୍ତ ପ୍ରତିବାଦ କରିବାରୁ ସହଦେବ ଉଭୟଙ୍କୁ ଏକ ଠେଙ୍ଗାରେ ଆକ୍ରମଣ କରିଥିବା ଅଭିଯୋଗରେ ଦର୍ଶାଯାଇଛି । ସେହିପରି ଠାକୁରଗଡ ଥାନା କରଡାବାହାଳିମଧୁ ଗ୍ରାମର ଚପଳା ସାହୁ ଓ ତାଙ୍କ ସ୍ୱାମୀ କୀର୍ତ୍ତନ ସାହୁଙ୍କୁ ପଡୋଶୀ ବିକାଶ ସାହୁ ଏକ ଟାଙ୍ଗିଆରେ ଆକ୍ରମଣ କରିଥିବା ଥାନାରେ ଅଭିଯୋଗ ହୋଇଛି । ପୋଲିସ କହିଛି, କୀର୍ତ୍ତନ ଓ ବିକାଶଙ୍କ ପରିବାର ମଧ୍ୟରେ ପୂର୍ବରୁ ଶତ୍ରୁତା ଲାଗି ରହିଥିଲା । ଏହାକୁ କେନ୍ଦ୍ରକରି ଶନିବାର ଅପରାହ୍ନରେ ଦମ୍ପତ୍ତ ଘରେ ଥିବାବେଳେ ବିକାଶ ଏକ ଟାଙ୍ଗିଆରେ ସେମାନଙ୍କୁ ଆକ୍ରମଣ କରିଥିବା ଅଭିଯୋଗ ପତ୍ରରେ ଦର୍ଶାଯାଇଛି ।
