ତେଲକୋଇ, ୨୩।୨(ଡି.ଏନ.ଏ.)-ତେଲକୋଇ ବ୍ଲକ ଅଧୀନରେ ବିଭିନ୍ନ ଗ୍ରାମରେ ବାଉଁଶ ଦ୍ୱାରା ବିଭିନ୍ନ ସାମଗ୍ରୀ ତିଆରି କରି ପରିବାର ପୋଷଣ କରିଥାନ୍ତି। ବାଉଁଶରେ କୁଲା, ଟୋକେଇ, ଡଲା, ଚେୟାର, ଝୁଡ଼ି ଆଦି ବିଭିନ୍ନ ସାମଗ୍ରୀ ବିକ୍ରି କରି କୌଳିକ ବୃତ୍ତି ଯୋଗୁ ପରିବାର ପୋଷଣ କରିଥାନ୍ତି। ତେବେ ଏହି କୌଳିକ ବୃତ୍ତିଧାରୀଙ୍କୁ ସରକାରୀ ସହାୟତା ନ ଥିବା ଯୋଗୁ କେବଳ ନିଜ ବୃତ୍ତିକୁ ନେଇ ଦିଗହରା ହୋଇପଡିଛନ୍ତି। ପୁରୁଣା ବେଉସା ଧୀରେ ଧୀରେ ବୁଡ଼ିବାକୁ ବସିଲାଣି। ତେବେ ଯେଉଁମାନେ ଏହାକୁ ବଞ୍ଚାଇ ରଖିଛନ୍ତି ସେମାନେ କିନ୍ତୁ ସରକାରଙ୍କ କୌଣସି ସୁବିଧା ପାଇପାରୁନାହାନ୍ତି। ଅବହେଳିତ ହୋଇ ରହିଯାଉଛନ୍ତି। ଏପରିକି ଭଙ୍ଗା କୁଡିଆରେ ଜୀବନ ଯାପନ କରି ବୃତ୍ତିର କାର୍ଯ୍ୟ କରୁଥିବା ଦେଖିବାକୁ ମିଳିଛି। ଆଜିକା ଦିନରେ ମଧ୍ୟ ସେହି ବାଉଁଶ ତିଆରି ସାମଗ୍ରୀର ଚାହିଦା ବେଶ୍ ଅଧିକା ରହିଛି।
ଓରିଆ ପଞ୍ଚାୟତ କତରାପାଲି ଗ୍ରାମରେ ୩୦ରୁ ଊର୍ଦ୍ଧ୍ୱ ପରିବାର ଏହି ବୃତ୍ତିକୁ ଆପଣେଇ ଅଦ୍ୟାବଧି ବିଭିନ୍ନ ଗ୍ରାମରେ ବାଉଁଶ ତିଆରି କାମକୁ ଘରେ ଘରେ ପହଞ୍ଚାଇ ରୋଜଗାର କରିଥାନ୍ତି । ହେଲେ ସରକାରଙ୍କ ବିଭିନ୍ନ ଯୋଜନାରେ ପ୍ରଧାନମନ୍ତ୍ରୀ ଆବାସ, ବିଜୁ ପକ୍କା ଘର, ଭତ୍ତା ଆଦି ଏମାନଙ୍କ ପାଖରେ ଅପହଞ୍ଚ ହୋଇପଡିଛି । ଉକ୍ତ ଗ୍ରାମରେ ପ୍ରତି ଘରେ ଏହି କୌଳିକ ବୃତ୍ତିକୁ ଆପଣେଇଛନ୍ତି । ବିଭିନ୍ନ ଗ୍ରାମରୁ ବାଉଁଶ ଗଛ ସଂଗ୍ରହ କରି ଏବଂ ଅର୍ଥ ଦେଇ ଖରିଦ କରିଥାନ୍ତି। ଏହା ପରେ ଘରେ ବସି ଏହି ବାଉଁଶରୁ ବିଭିନ୍ନ ସାମଗ୍ରୀ କରି ବିକ୍ରି କରିବାର ମାଧ୍ୟମ କରିଥାନ୍ତି। ଏହି ଗ୍ରାମର କ୍ଷେତ୍ରବାସୀ ବେହେରା ଭଙ୍ଗା କୁଡିଆରେ ରହିବା ସହିତ ପରିବାର ସହିତ କୌଳିକ ବୃତ୍ତିକୁ ପୂର୍ବପୁରୁଷର କାର୍ଯ୍ୟକୁ ଦୋହରାଇଛନ୍ତି । ଏହି ଗ୍ରାମରେ ୩୦ରୁ ଊର୍ଦ୍ଧ୍ୱ ପରିବାର କାର୍ଯ୍ୟ କରୁଥିଲେ ହେଁ ଗ୍ରାମର ସମସ୍ତେ ଝୁମ୍ପୁଡ଼ି ଘରେ ରହୁଥିବା ଗ୍ରାମବାସୀଙ୍କ ପକ୍ଷରୁ ଅଭିଯୋଗ ହୋଇଛି। ଏସମ୍ପର୍କରେ ସ୍ଥାନୀୟ ସରପଞ୍ଚ ଜଗବନ୍ଧୁ କିଷାନଙ୍କୁ ପଚାରିବାରୁ ଚଳିତ ବର୍ଷ ସମସ୍ତ ଗରିବ ପରିବାର ପାଇଁ ଗୃହ ଯୋଜନା ହୋଇଛି । ଏଥିରେ ସେମାନେ ସାମିଲ ହୋଇପାରିବେ। ସ୍ଥାନୀୟ ବିଡିଓ ଦିଲୀପ କୁମାର ବାରା କହିଛନ୍ତି ଯେ, ଏହି ବାଉଁଶ କାରିଗରଙ୍କ ପାଇଁ ଜିଲା କ୍ଷୁଦ୍ର ଶିଳ୍ପ ବିଭାଗକୁ ଜଣାଇବା ସହିତ ତାଙ୍କୁ ପ୍ରୋତ୍ସାହନ ପାଇଁ ବ୍ୟବସ୍ଥା ଦିଗରେ ଧ୍ୟାନ ଦେବେ।
