କର୍ଲାମୁଣ୍ଡା,୨୩।୯(ଡି.ଏନ୍.ଏ.) : କଳାହାଣ୍ଡି ଜଲା କର୍ଲାମୁଣ୍ଡା ବ୍ଲକ ଅଞ୍ଚଳରେ ଗତ ଅଗଷ୍ଟ ମାସରେ ପ୍ରବଳ ବର୍ଷା ଯୋଗୁ ରେଗେଡ଼ା ପଞ୍ଚାୟତ ଯୋଗୀପିଲା ଗ୍ରାମର ସୁମନ୍ତ କୁମାରଙ୍କ ଘର ଭାଙ୍ଗିଯାଇଥିଲା। ସେ ସ୍ଥାନୀୟ ସରପଞ୍ଚ, ରାଜସ୍ବ ନିରୀକ୍ଷକଙ୍କୁ ପଲିଥିନଟିଏ ପାଇଁ ବାରମ୍ବାର ଆବେଦନ କରିଥିଲେ ସୁଦ୍ଧା ତାଙ୍କୁ ସରକାରୀ ସହାୟତା ମିଳିପାରି ନ ଥିବା କହିଛନ୍ତି। ସୁମନ୍ତ ସ୍ତ୍ରୀ ଏବଂ ତିନି ସନ୍ତାନଙ୍କ ସହ ପଡ଼ୋଶୀଙ୍କ ଘରେ ଆଶ୍ରୟ ନେଇଥିବା ଦେଖିବାକୁ ମିଳିଛି। ଏନେଇ ରେଗେଡ଼ା ସରପଞ୍ଚ ସୁଶାନ୍ତ ପରିଡ଼ାଙ୍କୁ ପଚାରିବାରୁ ଦରଖାସ୍ତ ପାଇବା ପରେ ମୁଁ ତଦନ୍ତ କରିଥିଲି। ପ୍ରକୃତରେ ଘର ଭାଙ୍ଗି ଯାଇଛି। ଏଣୁ ପଲିଥିନ ଯୋଗାଇ ଦେବାକୁ ଯୋରାଡବ୍ରା ଆରଆଇଙ୍କୁ କହିଥିଲେ। ସେ କେମିତି ତୁରନ୍ତ ଘର ପାଇପାରିବେ ଏଦିଗରେ ଚେଷ୍ଟା କରାଯାଉଛି ବୋଲି କହିଛନ୍ତି। ଅନ୍ୟପଟେ ଆରଆଇଙ୍କୁ ଯୋଗାଯୋଗ କରାଯାଇଥିଲେ ହେଁ ମୋବାଇଲ ସୁଇଚ୍ ଅଫ୍ ଥିବାରୁ ତାଙ୍କ ମତାମତ ମିଳିପାରିନାହିଁ।
