ନୂଆଦିଲ୍ଲୀ,୧।୧: ପଶ୍ଚିମବଙ୍ଗରେ ବିଧାନସଭା ନିର୍ବାଚନ ପାଇଁ ଆହୁରି ବର୍ଷେ ବାକି ରହିଛି। ହେଲେ ଭାରତୀୟ ଜନତା ପାର୍ଟି (ଭାଜପା)ର ଅଧ୍ୟକ୍ଷ ଅମିତ ଶାହା ଏବେ ଠାରୁ ନିର୍ବାଚନର ପ୍ରସ୍ତୁତି ଆରମ୍ଭ କରିଦେଇଛନ୍ତି। ସୂଚନାଯୋଗ୍ୟ, ଭାଜପା ମିଶନ ୨୫୦କୁ ନେଇ ପଶ୍ଚିମବଙ୍ଗରେ ନିର୍ବାଚନ ପ୍ରଚାର କରିବାକୁ ଯାଉଛି। ଆଉ ନିର୍ବାଚନ ରଣନୀତିରେ ଯେପରି କୌଣସି ପ୍ରକାରର ତ୍ରୁଟି ରହି ନ ଯାଏ ଏବଂ ଭାଷା ବାଧକ ନ ହୁଏ, ସେନେଇ ଭାଜପା ଅଧ୍ୟକ୍ଷ ପ୍ରସ୍ତୁତି ଚଳାଇଛନ୍ତି। ଶୁଣିବାକୁ ମିଳିଛି ଅମିତ ଶାହା ବଙ୍ଗଳା ଭାଷା ଶିଖୁଛନ୍ତି। ଏଥିପାଇଁ ସେ ଜଣେ ଶିକ୍ଷକଙ୍କୁ ମଧ୍ୟ ରଖିଛନ୍ତି। ଏହାଦ୍ୱାରା ସେ ଏହି ଭାଷାକୁ ସହଜରେ ବୁଝିପାରିବେ ଏବଂ ନିର୍ବାଚନ ସଭାରେ ନିଜର ଅଭିଭାଷଣ ବଙ୍ଗଳାରେ ରଖିପାରିବେ। ଯେପରି ତାଙ୍କ ଭାଷଣ ଲୋକଙ୍କ ଉପରେ ପ୍ରଭାବ ବିସ୍ତାର କରିପାରିବ। ସୂଚନାଯୋଗ୍ୟ, ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ, ‘ମାଆ, ମାଟି ଓ ମାନୁଷ’ ସ୍ଲୋଗାନ ଦେଇ ନିଜ ସ୍ଥିତିକୁ ସୁଦୃଢ କରିପାରିଛନ୍ତି। ଏବେ ଭାଜପା ମଧ୍ୟ ଏହାକୁ ଅସ୍ତ୍ର କରି ନିଜର ସ୍ଥାନ ତିଆରି କରିବାକୁ ପ୍ରଚେଷ୍ଟା ଚଳାଇଛି। ଶାହାଙ୍କୁ ଭାଜପାର ନିର୍ବାଚନ ରାଣନୀତିର ଚାଣକ୍ୟ ବୋଲି କୁହାଯାଏ। ପ୍ରତିଟି ନିର୍ବାଚନରେ ଶାହା ନିଜର ଭିନ୍ନ-ଭିନ୍ନ ରଣନୀତି ଆପଣଇଥାନ୍ତି। କିନ୍ତୁ ଚଳିତ ବିଧାନସଭା ନିର୍ବାଚନରେ ପ୍ରଥମେ ମହାରାଷ୍ଟ୍ର, ହରିୟାଣା ଓ ଝାଡଖଣ୍ଡରେ ଶୋଚନୀୟ ପରାଜୟ ପରେ ଶାହା ପଶ୍ଚିମବଙ୍ଗ ନିର୍ବାଚନର ନେତୃତ୍ୱ ନିଜ ହାତକୁ ନେଇଛନ୍ତି। ଏଥିପାଇଁ କର୍ମକର୍ତ୍ତାଙ୍କ ମଧ୍ୟରେ ସମନ୍ବୟ ଠିକ୍ ରହିବା ଆବଶ୍ୟକ ବୋଲି ସେ କହିଛନ୍ତି। ଏଥିପାଇଁ ଭାଷା ଯେପରି ରଣନୀତିରେ ବାଧା ସୃଷ୍ଟି ନକରେ, ସେଥିପାଇଁ ବଙ୍ଗଳା ଶିଖୁଛନ୍ତି ଅମିତ ଶାହା ।
