ଆନନ୍ଦପୁର,୨୩ା୬(ସ୍ବ.ପ୍ର.) : କେନ୍ଦୁଝର ଜିଲା ଦେଇ ପ୍ରବାହିତ ବୈତରଣୀ ଦିନକୁ ଦିନ ପ୍ରଦୂଷିତ ହେବାରେ ଲାଗିଛି। ଏଥିପ୍ରତି ଆନନ୍ଦପୁର ପୌରପାଳିକାର ନଜର ପଡୁନି। ବିପର୍ଯ୍ୟସ୍ତ ପରିମଳ ନେଇ ବାରମ୍ବାର ଗଣମାଧ୍ୟମରେ ଖବର ପ୍ରକାଶ ସତ୍ତ୍ୱେ ପୌରପାଳିକା ପକ୍ଷରୁ କୌଣସି ପଦକ୍ଷେପ ଗ୍ରହଣ କରା ନ ଯିବା ଉଦ୍ବେଗର କାରଣ ପାଲଟିଛି। ନିକଟରେ ପୌରପାଳିକାର ୧୩ ନଂ ଓ୍ବାର୍ଡ ବାଉଁଶନାଳି ସେତୁ ନିକଟରେ ମାଛମାଂସର ଅବଶିଷ୍ଟାଂଶ ପକାଯାଇ ପରିବେଶ ପ୍ରଦୂଷିତ କରାଯାଉଛି। ଏନେଇ ଖବର ପ୍ରକାଶ ପାଇବା ପରେ ପୌରପାଳିକା ପକ୍ଷରୁ ପଦକ୍ଷେପ ଗ୍ରହଣ କରାଯିବ ବୋଲି ଲୋକଙ୍କ ମଧ୍ୟରେ ଆଶା ସଂଚାର ହୋଇଥିଲା। ଏହି ଆବର୍ଜନା ବୈତରଣୀ ନଦୀଜଳରେ ମିଶିବା ଆରମ୍ଭ କଲାଣି। ଦୁଇଦିନ ତଳେ ହୋଇଥିବା ଲଘୁଚାପ ବର୍ଷାରେ ବାଉଁଶନାଳିରେ ହୋଇଥିବା ପାଣି ନଦୀକୁ ନିଷ୍କାସିତ ହେଉଥିବାବେଳେ ସେଠାରେ ଦୀର୍ଘବର୍ଷ ଧରି ପଡ଼ିରହିଥିବା ମାଛ ମାଂସର ବର୍ଜ୍ୟବସ୍ତୁ ସବୁ ବୈତରଣୀ ନଦୀ ଜଳରେ ସିଧାସଳଖ ମିଶୁଛି। ଯାହାକି ଜଳକୁ ପ୍ରଦୂଷିତ କରିବା ସହିତ ବିଭିନ୍ନ ରୋଗର ଆଶଙ୍କା ପ୍ରକାଶ ପାଇଛି। ଏଥିପ୍ରତି ପୌରପାଳିକା ଦୃଷ୍ଟି ଦେଇ ପଦକ୍ଷେପ ଗ୍ରହଣ କରିବା ଜରୁରୀ ହୋଇପଡ଼ିଛି।
