ପଦ୍ମପୁର, ୧।୧(ଡି.ଏନ୍.ଏ.)-ପେଟ୍ରୋଲ ଚାଳିତ ସାଇକେଲ ତିଆରି କରି ଚର୍ଚ୍ଚାକୁ ଆସିଛନ୍ତି ୫ମ ଶ୍ରେଣୀ ଛାତ୍ର ଶୁଭମ୍ ସୌଭାଗ୍ୟ ଓ ତାଙ୍କ ବଡଭାଇ ଜଗବନ୍ଧୁ। ଦୁଇ ମାସ ମଧ୍ୟରେ ଦୁଇ ଭାଇ ମିଶି ଏହି ସାଇକେଲ ତିଆରି କରିଛନ୍ତି। ଏକ ରେସିଂ ସାଇକେଲରେ ଏକ ୮୦ ସିସିର ଇଞ୍ଜିନ୍, ସାଇଲେନ୍ସର୍, ତେଲଟାଙ୍କି, କ୍ଲଚ୍ ଓ ଏକ୍ସିଲେଟର୍ ସଂଯୋଗ କରାଯାଇଛି। ପେଟ୍ରୋଲ ଟାଙ୍କି ୨ଲିଟର କ୍ଷମତା ବିଶିଷ୍ଟ ହୋଇଥିବା ବେଳେ ଏହାର ଟପ୍ ସ୍ପିଡ ରହିଛି। ଘଣ୍ଟାକୁ ୪୫ କି.ମି. ବେଗରେ ଗଲେ ୧ ଲିଟର ପେଟ୍ରୋଲରେ ସାଇକେଲ ୪୦ରୁ ୪୫ କି.ମି. ଯାଇପାରୁଛି। ଏହାବ୍ୟତୀତ ୨୦ରୁ ୨୫ କି.ମି. ବେଗରେ ଗଲେ ୧ଲିଟର ପେଟ୍ରୋଲରେ ୬୦ କି.ମି. ପର୍ଯ୍ୟନ୍ତ ଯାଇପାରୁଛି। ଏହି ସାଇକେଲ ପେଡାଲ୍କୁ ମାରି କ୍ଲଚ ଛାଡ଼ି ଦେଲେ ଇଞ୍ଜିନ ଷ୍ଟାର୍ଟ ହୋଇଯାଉଛି। ଏହାପରେ ଆଉ ପେଡେଲ୍ ମାରିବାର ଆବଶ୍ୟକତା ନାହିଁ। ଟାଙ୍କିରୁ ତେଲ ସରିଗଲେ ସାଧାରଣ ସାଇକେଲ ପରି ପେଡାଲ ମାରି ଯାଇହେବ। ଏହି ଇଞ୍ଜିନ ୨ ଷ୍ଟୋକ୍ ହୋଇଥିବା ବେଳେ ଏଥିରେ ପେଟ୍ରୋଲ ସାଙ୍ଗରେ ଅଏଲ ମିଶାଇବାକୁ ପଡ଼ୁଛି। ଏହି ସାଇକେଲ ପାଇଁ ଖର୍ଚ୍ଚ ହୋଇଛି ୨୦ ହଜାର ଟଙ୍କା।
ଶୁଭମ୍ ସୌଭାଗ୍ୟଙ୍କ ଘର ଭଦ୍ରକ ଜିଲା ବାସୁଦେବପୁର ବ୍ଲକ ଅଧୀନ କମାର ଗାଁ ଗ୍ରାମରେ। ସେ ଭଦ୍ରକ ମଇତାପୁରସ୍ଥିତ ରୟାଲ ପବ୍ଲିକ ସ୍କୁଲରେ ପାଠ ପଢନ୍ତି। ପିଲାବେଳୁ ବିଭିନ୍ନ ଯନ୍ତ୍ରଚାଳିତ ଖେଳନା ପ୍ରତି ଥିଲା ତାଙ୍କର ଅହେତୁକ ଦୁର୍ବଳତା। ପାଠପଢ଼ା ସହ ବିଭିନ୍ନ ଯାନ୍ତ୍ରିକ ଖେଳନା କିଣିବା ଓ ତାକୁ ସଜାଡ଼ିବାରେ ତାଙ୍କର ସମୟ କାଟୁଥିଲେ। ଏବେ ନାବାଳକ ଛାତୀଛାତ୍ରମାନେ ଗାଡି ଚଳାଇ ପାରିବେ ନାହିଁ ଟ୍ରାଫିକ ନିୟମ କଡ଼ାକଡ଼ି ହେବା ପରେ ସେ ପେଟ୍ରୋଲ ଚାଳିତ ସାଇକେଲ ତିଆରି କରିବାକୁ ଚିନ୍ତା କଲେ। ସେ ଏ ବିଷୟରେ ତାଙ୍କର ବଡ଼ଭାଇ ଜଗବନ୍ଧୁ ଅଗସ୍ତି ଜଣାଇଲେ। ତାଙ୍କ ବଡ ଭାଇ ଜଣେ ବିଟେକ୍ ଇଲେକ୍ଟ୍ରିକାଲ ଇଞ୍ଜିନିୟର। ସାନଭାଇର ଇଚ୍ଛାକୁ ସଫଳ ରୂପାୟନ ଦେବା ପାଇଁ ବର୍ଷେ ପୂର୍ବରୁ ଆରମ୍ଭ ହୋଇଥିଲା ପ୍ରସ୍ତୁତି। ଦୁଇଭାଇ ପ୍ରଥମେ ଇଣ୍ଟରନେଟ୍ରେ ବିଭିନ୍ନ ବିଭିନ୍ନ ଯନ୍ତ୍ରାଂଶ କିଣି ସାଇକେଲରେ ଲଗାଇଛନ୍ତି। ଏହି ବାଇକ୍କୁ ଛାତ୍ରୀଛାତ୍ରଙ୍କଠାରୁ ଆରମ୍ଭ କରି ସବୁବର୍ଗର ଲୋକେ ଚଲାଇପାରିବେ। ଏହି ସାଇକେଲ ଚଳାଇବା ପାଇଁ ଡ୍ରାଇଭିଂ ଲାଇସେନ୍ସ, ପଲ୍ୟୁଶନ ବା ଇନ୍ସୁରାନ୍ସର ଆବଶ୍ୟକତା ନାହିଁ। କେବଳ ସୁରକ୍ଷା ପାଇଁ ହେଲ୍ମେଟ ପିନ୍ଧା ଯାଇପାରିବ। ରାସ୍ତାରେ ସାଇକେଲ ଚାଲୁଥିବା ବେଳେ କ୍ଲଚ୍ ଓ ଆଗ ବ୍ରେକକୁ ବ୍ୟବହାର କରି ଚାଳକ ନିଜ ଇଚ୍ଛା ଅନୁସାରେ ଏହାକୁ ରୋକିପାରିବ। ଏଥିରେ ଷ୍ଟାର୍ଟ ପାଇଁ କିକ୍ କି ସେଲ୍ଫଷ୍ଟାର୍ଟର ଆବଶ୍ୟକତା ନାହିଁ। ଶୁଭମ୍ଙ୍କର ବାପା ନରହରି ଅଗସ୍ତି ଓ ମା ଗୀତାଞ୍ଜଳି ପଣ୍ଡା ଶିକ୍ଷକତା କରୁଥିବା ବେଳେ ଦୁଇପୁଅଙ୍କର ଏଭଳି ଉଦ୍ୟମରେ ଖୁସିବ୍ୟକ୍ତ କରିଛନ୍ତି।
