ପର୍ଲା, ୨୩।୧ (ଡି.ଏନ୍.ଏ.)- କଳାହାଣ୍ଡି ଜିଲା ଧର୍ମଗଡ଼ ବ୍ଲକ ଦଣ୍ଡପାଟ ଅଂଚଲ ଛଞ୍ଚାଣବାହାଲି ପଁଚେତ୍ ବେହେରାଗୁଡ଼ା ଗଁାର ସୁବାସ ଦୋରୁଆନ(୫୦) ଅନେକ ଦିନ୍ ହେଲା କୁଷ୍ଠ ରୋଗ୍ରେ ପୀଡ଼ିତ ଥିଲେ। ଗଲା ୧୭ ତାରିଖ୍ ତାକର ମୁର୍ତୁ ହେଇଥିଲା। ହେଲେ ଜାତିଭାଇ କେହି ତାକର ଶବକେ ଖଁଦ୍ ନାଇଁଦେଲେ। ଇ ଘଟନାଟା ଅଂଚଲରେ ତଥା ଜିଲାରେ ଚରଚାର ବିଷେ ହେଇଥିଲା। ଏହେଦେ ସୁବାସକଁର ମା’ ସୁଲୋଚନା(୬୫) ଅଭାବ୍ ଅନାଟନ ଲାଗି ପୁଓର ସୁଧି କାଯ୍ କରି ନାଇଁ ପାରୁଥିବାର କହିଛନ୍।
ସୂଚନା ଅନ୍ସାରେ ବେହେରାଗୁଡ଼ା ଗଁାର ସୁଲୋଚନା ଦୋରୁଆନ ପୁଓବହ, ନାତିନାତେନକୁଁ ନେଇ ଖୁସିରେ ଥିଲେ। ପୁଓ ବି ଦୁଖ୍ସୁଖ୍ କରି ଦୁଇପଏସା ରୁଜଗାର କରୁଥିଲେ। ହେଲେ ଆଏଜ୍କେ ୪ ବଛର ତଲେ ସେ କୁଷ୍ଠ ରୋଗ୍ରେ ଆକ୍ରଁାତ ଥିବାର ଜାନ୍ବାକେ ପାଇଥିଲେ। ଅନେକ ଚିକିଛା କଲା ଉତାରୁ ବି ସେ ସବୁବେଲେ ମାନ୍ସିକ୍ ଚାପରେ ରହୁଥିଲେ। ଶେଷେ କାମ୍ଧଁଦା କରବାର ଛାଡ଼ି ଦେଇଥିଲେ। ରୋଗ୍କେ ଅସ୍କଟେଇ ମାଏକିନା ବି ବଛ୍ରେ ତଲେ ଝି’ ଦିବ୍ୟାଭାରତୀ(୭), ପୁଓ ମାନସ(୪)କେ ଶାଶ୍ ପାସେ ଛାଡ଼ି ସାନ୍ଛୁଆ ବାହୁବଳୀ(୨)କେ ଧରି ଘରଛାଡ଼ି ପଲେଇ ଗଲେ। ସେଦିନ୍ଠାନୁ ଆଇବୁଢ଼ୀ ସୁଲୋଚନା ନାତିନାତେନକଁୁ ପାଲ୍ପୋଷ କରୁଛନ୍। ଏନ୍ତା ପରିସ୍ଥିତିରେ ଗଲା ୧୭ ତାରିଖ ସୁବାସ ବି ଆରପାରକେ ଚାଲିଗଲେ। ହେଲେ ପାଖ୍ପଡ଼ିଶା, ଜାତିଭାଇ କେହି ଖଁଦ୍ ନାଇଁଦେଲାରୁ ନିଜର କକା ପୁତୁରା ସାଇକେଲରେ ଶବ ନେଇ ସତ୍କାର କରିଥିଲେ। ଇଆଡ଼େ ସୁବାସ କୁଷ୍ଠ ରୋଗ୍ରେ ମରିଥିବାର ଘଟନାକେ ନେଇ ସମାଜ ଲୋକ୍ ପରିବାରକେ ଆଜେତ୍ କରିଛନ୍। ଜାତି ହେବାର ଲାଗି ଭୁଜିଭାତ ସଂଗେ ଛେଲମେଢ଼ି ଦେବାକେ ଜାତିଭାଇ କହୁଥିବାର ସୁଲୋଚନା କହିଛନ୍। ଏନ୍ତାଥି ଉପେ ଶୂଇନ୍ ସୁଲୋଚନା ନିଜର ରାଶନକାର୍ଡକେ ଗହନା ପକେଇଥିବାର କହିଛନ୍। ଇଆଡ଼େ ପରିବାରଟା ନିହାତି ଗରିବ୍, ଜମିବାଡ଼ି, ସଁପତି ବଲି କିଛି ନାଇଁ। ସୁଲୋଚନା ଇ ବୁଢ଼ୀ ବଏସେ ପରହର କାମ୍ବୁତା କରି ନାତିନାତେନର ପେଟ୍ ପାଲୁଛନ୍। ରାଶନକାର୍ଡ ଖଁଡ଼କ ପରିବାରର ସାହାଭରସା, ସଁପତି ବଲି ଥିଲା। ହେଲେ ସେଟା ବି ପୁଓର ସୁଧିକାଯ୍ରେ ଗହନା ପକେଇଛନ୍। ଏନ୍ତାଥି ଆଗ୍କେ ମୋତେ ସବୁ ଅଁଧାର ଦିଶୁଛେ ବଲି ସେ କଁାଦି କଁାଦି କହିଛନ୍। ଇ ଘଟନା ବାବ୍ଦେ ସୂଚନା ପାଇ ମୂଳ ନିବାସୀ ଯୁବ ଫେଡେରେଶନ ସୁବାସକଁର ଘରେ ପୁହୁଁଚି ସୁଲୋଚନାକୁଁ ଭେଟିଛନ୍। ସେନ୍ତା ସେମାନେ ସୁଲୋଚନାକଁର ସଂଗେ ଆଲୋଚନା କରବାର ସଂଗେ ଦିବ୍ୟାଭାରତୀ ଆର ମାନସକେ ଭବାନୀପାଟଣା ଶିଶୁ ସୁରକ୍ଷା ୟୁନିଟରେ ଥଇଥାନ କରବାକେ ଫେଡେରେଶନର ନିରଦେଶକ ଯୁଗେଶ ତାଣ୍ଡି, ସମାଜିକ କରମୀ ଢଗମାଳିଆ ନାଏକ, ଶ୍ୟାମସୁନ୍ଦର ମାଝି, ଭକତରାମ ସୁନାନୀ ସୂଚନା ଦେଇଛନ୍। ଇ ଦିଗେ ଜିଲା ଆର ଥାନୀଅ ପରଶାସନ ଦୁରୁଷ୍ଟି ଦେଇ ସୁଲୋଚନାକୁଁ ପୁଓର ସୁଧିକାଯ୍ ଲାଗି ଟଁକା ପଏସା ସଂଗେ ଗହନା ପଡ଼ିଥିବାର ରାଶନକାର୍ଡ ମୁକ୍ଲାବାର ଦିଗେ ପଦକ୍ଷେପ ନେବାକେ ବୁଧିଜୀବୀ ମହଲରେ ଦାବି ହେଉଛେ।
