ଛତ୍ରପୁର,୧୧ା୬(ଡି.ଏନ.ଏ)-ବଲାଙ୍ଗୀର ଜିଲା ପାଟଣାଗଡ ବିଧାୟକ ସରୋଜ ମେହେରଙ୍କୁ ତୁରନ୍ତ ଗିରଫ କରିବାକୁ ଓଡିଶା ଡିପ୍ଲୋମା ଇଞ୍ଜିନିୟର ସେବା ସଂଘ ଗଞ୍ଜାମ ଡିଭିଜନାଲ କମିଟି ପକ୍ଷରୁ ଦାବି ହୋଇଛି। ଏ ନେଇ ସୋମବାର ମୁଖ୍ୟ ଶାସନ ସଚିବଙ୍କ ଉଦ୍ଦେଶ୍ୟରେ ଏକ ସ୍ମାରକପତ୍ର ଛତ୍ରପୁରଠାରେ ଜିଲାପାଳ ବିଜୟ ଅମୃତା କୁଲାଙ୍ଗେଙ୍କୁ ପ୍ରଦାନ କରାଯାଇଛି। ପ୍ରକାଶ ଯେ, ସଂଘ ସଦସ୍ୟ ଇଂ. ଜୟକାନ୍ତ ଶବରଙ୍କୁ ରାସ୍ତା ମଝିରେ ସର୍ବ ସମ୍ମୁଖରେ ବିଧାୟକ ମେହେର କାନଧରି ଶହେ ଥର ବସ୍ଉଠ କରାଇବା ସହ ଜାତିଆଣ ଆକ୍ଷେପ କରି ଗାଳିଦେବା ଓ ଘଟଣାସ୍ଥଳରେ ଉପସ୍ଥିତ ଥିବା ନିର୍ବାହୀଯନ୍ତ୍ରୀଙ୍କୁୂ ଯନ୍ତ୍ରୀ ଶବରଙ୍କୁ ଚାପୁଡା ମାରିବାକୁ ନିର୍ଦ୍ଦେଶ ଦେବା ଭଳି କାର୍ଯ୍ୟ କରି ଆଇନ୍କୁ ହାତକୁ ନେଇଛନ୍ତି। ଗଞ୍ଜାମ ଶାଖା ଇଞ୍ଜିନିୟର ସଂଘ ଏହାର ଦୃଢ ନିନ୍ଦା କରିଛି। ଆଇନ୍ ଅନୁଯାୟୀ ପଦକ୍ଷେପ ନେଇ ବିଧାୟକଙ୍କୁ ତୁରନ୍ତ ଗିରଫ କରାଯାଉ ବୋଲି ସଂଘ ଦାବି କରିଛି। ସରକାର କାର୍ଯ୍ୟାନୁଷ୍ଠାନ ଗ୍ରହଣରେ ବିଳମ୍ବ କଲେ ସାରା ରାଜ୍ୟରେ ସଂଘ ବାଧ୍ୟ ହୋଇ ବିକଳ୍ପ ପନ୍ଥା ଗ୍ରହଣ କରିବ ଓ ଏଥିପାଇଁ ସରକାର ଦାୟୀ ରହିବେ ବୋଲି ସତର୍କ କରିଦିଆଯାଇଛି। ସ୍ମାରକପତ୍ର ପ୍ରଦାନ ବେଳେ ସଂଘର ଦକ୍ଷିଣାଞ୍ଚଳ ମହାମଣ୍ଡଳ ସଂପାଦକ ବନ ବିହାରୀ ପଣ୍ଡା, ଜିଲା ସଂଘର ସଭାପତି ଇଂ ସୁବାସ ଚନ୍ଦ୍ର ପାତ୍ର, ଉପସଭାପତି ଇଂ ଭଗବାନ ରଥ, ସାଧାରଣ ସମ୍ପାଦକ ଇଂ ସୁଦର୍ଶନ ଶତପଥୀ, ପରାମର୍ଶଦାତା ବିଜୟ କୁମାର ପଣ୍ଡା, ଅଡିଟର ଇଂ ଶଶାଙ୍କ ଶେଖର ପାଢୀ, ଇଂ ବିନ୍ଦୁ ସାଗର ପଣ୍ଡା, ବାବୁ ମଲ୍ଲିକ ପ୍ରମୁଖ ଉପସ୍ଥିତ ଥିଲେ।
