ଭୁବନେଶ୍ୱର, ୨୩ା୧(ବ୍ୟୁରୋ): କଟକଣା ଓ ନିଷେଧ ସତ୍ତ୍ୱେ ଖୁଲମ୍ଖୁଲା ତିଆରି ଓ ବ୍ୟବହାର ହେଉଛି ୫୦ ମାଇକ୍ରୋନ୍ରୁ କମ୍ ଓଜନର ପଲିଥିନ। ଏପଟେ ଭୁବନେଶ୍ୱର ମହାନଗର ନିଗମ (ବିଏମ୍ସି) ପଲିଥିନମୁକ୍ତ ଭୁବନେଶ୍ୱର ଅଭିଯାନ ଜାରି ରଖିଛି। ଏହି ଅଭିଯାନର ଆଉ ଏକ ପଦକ୍ଷେପ ସ୍ବରୂପ ବୁଧବାର ଦୁଇଟି ସ୍ଥାନରେ ଚଢ଼ାଉ କରାଯାଇ ବିପୁଳ ପଲିଥିନ ଜବତ କରାଯାଇଛି। ଏକ ବଡ଼ ଘଟଣାକ୍ରମରେ ବିଏମ୍ସିର ସେଣ୍ଟ୍ରାଲ ସ୍କ୍ବାଡ୍ ଖଣ୍ଡଗିରି ଥାନା ଅନ୍ତର୍ଗତ ଭଗବାନପୁର ଇଣ୍ଡଷ୍ଟ୍ରିଆଲ୍ ଇଷ୍ଟେଟ୍ର ପ୍ଲଟ ନଂ.୨/ବିରେ ଥିବା ତାରାତାରିଣୀ ପ୍ୟାକେଜିଂ ଶିଳ୍ପ ସଂସ୍ଥା ଉପରେ ଚଢ଼ାଉ କରିଛି। ସେଠାରେ ବେଆଇନ ପଲିଥିନ ତିଆରି କାରଖାନା ଚାଲିଥିଲା। ଯାଞ୍ଚ ପରେ ସେଠାରୁ ବିପୁଳ ପଲିଥିନ, ବ୍ୟବହୃତ ମେଶିନ ଓ କଞ୍ଚାମାଲ ଜବତ କରାଯାଇଛି। ସେହିଭଳି ଚାଲାଣ ବେଳେ ଏକ ପଲିଥିନ ବୋଝେଇ ଟ୍ରକ୍ ଧରାପଡିଛି।
ବିଏମ୍ସିର ସୂଚନାନୁଯାୟୀ, ୫୦ ମାଇକ୍ରୋନ୍ରୁ ଅଧିକ ଓଜନର ପଲିଥିନ ତିଆରି ପାଇଁ ଉକ୍ତ ସଂସ୍ଥା ଲାଇସେନ୍ସ ନେଇଥିଲା। ମାତ୍ର ୨୦୧୮ରେ ଏହି ଲାଇସେନ୍ସର ଅବଧି ଶେଷ ହୋଇଯାଇଥିଲେ ମଧ୍ୟ ବେଆଇନଭାବେ ପଲିଥିନ ତିଆରି ଚାଲିଥିଲା। ଏଥିସହ ନିଷେଧ ପଲିଥିନ ମଧ୍ୟ ତିଆରି କରାଯାଉଥିଲା। ଆବଶ୍ୟକ ଯାଞ୍ଚରୁ ଏହା ଜଣାପଡିବା ପରେ ପଦକ୍ଷେପ ନିଆଯାଇଛି। ସମ୍ପୃକ୍ତ ସଂସ୍ଥା ଉପରେ ବିଏମ୍ସି ପକ୍ଷରୁ ୧ ଲକ୍ଷ ଟଙ୍କା ଜରିମାନା କରାଯାଇଛି। ବିଏମ୍ସିର ଜୋନାଲ ଡେପୁଟି କମିଶନର ରବି ନାରାୟଣ ଜେଠୀଙ୍କ ନେତୃତ୍ୱରେ ଚଢ଼ାଉ କରିଥିବା ଉକ୍ତ ସ୍କ୍ବାଡ୍ରେ ବିଏମସିର ଏନ୍ଫୋର୍ସମେଣ୍ଟ ଟିମ୍, ସ୍ବଚ୍ଛ ଭୁବନେଶ୍ୱର ଅଭିଯାନ ଏକ୍ସପର୍ଟ, ପ୍ରଦୂଷଣ ନିୟନ୍ତ୍ରଣ ବୋର୍ଡର ଯନ୍ତ୍ରୀ ସାମିଲ ଥିଲେ। ପୋଲିସ ଟିମ୍ ଉପସ୍ଥିତିରେ ଅପରାହ୍ନରୁ ସନ୍ଧ୍ୟା ପର୍ଯ୍ୟନ୍ତ ଚଢ଼ାଉ ଚାଲିଥିଲା।
ଅନ୍ୟପକ୍ଷରେ ଖଣ୍ଡଗିରି ନିକଟ ଜାତୀୟ ରାଜପଥରୁ ଏକ ପଲିଥିନ ବୋଝେଇ ଟ୍ରକ୍କୁ ବିଏମ୍ସିର ଅଧିକାରୀମାନେ ଧରିଛନ୍ତି। ତଦନ୍ତବେଳେ ଉକ୍ତ ପଲିଥିନ ଟ୍ରକ୍ କଟକରୁ ଆସିଥିବାବେଳେ ତାହା ସୁନାଖଳା ଅଭିମୁଖେ ଯାଉଥିଲା। ଟ୍ରକରୁ ସମସ୍ତ ପଲିଥିନ ଜବତ କରିବା ସହ ୫୦ ହଜାର ଟଙ୍କା ଜରିମାନା କରାଯାଇଛି। ତେବେ ଉକ୍ତ ପଲିଥିନ କେଉଁଠି ତିଆରି ହୋଇଛି ଓ କିଏ, କାହା ନିକଟକୁ ପଠାଉଥିଲେ ତାହାର ଖୋଳତାଡ଼ ଚାଲିଛି। ଆଗକୁ ଏପରି ଚଢ଼ାଉ ଓ ଯାଞ୍ଚ ଜାରି ରହିବ ବୋଲି ବିଏମ୍ସି ଅତିରିକ୍ତ କମିଶନର ଅବନୀ କୁମାର ପଟ୍ଟନାୟକ କହିଛନ୍ତି।
