ବାରିପଦା ଅଫିସ, ୧୯ା୨- ଉତ୍ତର ଓଡ଼ିଶା ବିଶ୍ୱ ବିଦ୍ୟାଳୟ କର୍ତ୍ତୃପକ୍ଷଙ୍କ ମନୋମୁଖୀ ପରୀକ୍ଷା ଫି’ ବୁଦ୍ଧିକୁ ମଙ୍ଗଳବାର ଛାତ୍ରୀଛାତ୍ରମାନେ ବିରୋଧ କରିଛନ୍ତି। ଦୁଇ ଦିନ ଭିତରେ ଏହାର ସମାଧାନ କରା ନ ଗଲେ ଗୁରୁବାର ବିଶ୍ୱ ବିଦ୍ୟାଳୟ ଆଗରେ ଧାରଣା ଦେବେ ବୋଲି ଛାତ୍ରୀଛାତ୍ରମାନେ ଚେତାବନୀ ଦେଇଛନ୍ତି। ଛାତ୍ର ନେତା ସୁନିଲ କୁମାର ନାୟକ ଓ ଶଙ୍କର୍ଷଣ ପଣ୍ଡାଙ୍କ ନେତୃତ୍ୱରେ ଜିଲାର ବିଭିନ୍ନ ମହାବିଦ୍ୟାଳୟରୁ ଛାତ୍ରୀଛାତ୍ରମାନେ ବିଶ୍ୱବିଦ୍ୟାଳୟକୁ ଆସି ପରୀକ୍ଷା ନିୟନ୍ତ୍ରକ ଅଧିକାରୀଙ୍କୁ ଦାବିପତ୍ର ପ୍ରଦାନ କରିଥିଲେ। ଛାତ୍ରୀଛାତ୍ରମାନେ ଦର୍ଶାଇଛନ୍ତି ଯେ, ଗତବର୍ଷ ସମ୍ମାନ ପରୀକ୍ଷା ଫି’ ୯୧୦ ଓ ପାସ୍ ପରୀକ୍ଷା ଫି’ ୮୧୦ ଟଙ୍କା ଥିଲା। ମାତ୍ର ଚଳିତ ବର୍ଷ ସମ୍ମାନ ଫି’ ୧୫୧୦ ଓ ଓ ପାସ୍ ପରୀକ୍ଷା ଫି’ ୧୨୫୦ଟଙ୍କାକୁ ବୁଦ୍ଧି କରାଯାଇଛି। ଏହି ଜିଲା ଆଦିବାସୀ ବହୁଳ ହୋଇଥିବାରୁ ଛାତ୍ରୀଛାତ୍ରମାନେ ଏତେ ଟଙ୍କା ଦେବାରେ ଅସମର୍ଥ ହେବେ। ଫଳରେ ବର୍ଦ୍ଧିତ ଫି ହଟାଇବାକୁ ସେମାନେ ଦାବି କରିଛନ୍ତି। ପବିତ୍ର ଗିରି, ଆଶୁତୋଷ ସେଠୀ, ସୁମନ୍ତ ଜେନା, ରାଜେଶ କୁମାର ସେଠୀ, ସୌରବ ଗିରି, ସ୍ବସ୍ତିକ ଗିରି, ରଶ୍ମୀରେଖା ମଣ୍ଡଳ, ଦେବଶ୍ରୀ ମହାନ୍ତଙ୍କ ସମେତ ଏକାଧିକ ଛାତ୍ରୀଛାତ୍ର ଦାବିପତ୍ର ପ୍ରଦାନ ବେଳେ ଉପସ୍ଥିତ ଥିଲେ।
