ଭବାନୀପାଟଣା,୧୨।୨(ଡି.ଏନ୍.ଏ.): କଳାହାଣ୍ଡି ଜିଲା କଲମପୁର ବ୍ଲକ ପଣ୍ଡିଗାଁ ପଞ୍ଚାୟତ ମଦମୁକ୍ତି ଲାଗି ଦାବି ହୋଇଛି। ଏ ନେଇ ସରପଞ୍ଚ ବନଜା ବାସିନୀ ମହାପାତ୍ରଙ୍କ ନେତୃତ୍ୱରେ ଶତାଧିକ ମହିଳା ଏକ ଶୋଭାଯାତ୍ରାରେ ଯାଇ ଜିଲାପାଳଙ୍କ ଅଭିଯୋଗ ପ୍ରକୋଷ୍ଠ ସମ୍ମୁଖରେ ସ୍ଲୋଗାନ ଦେବା ସହ ଧାରଣାରେ ବସିଥିଲେ। ସରପଞ୍ଚଙ୍କ ସମେତ କେତେକ ମହିଳା ଜିଲାପାଳ ଗାଭାଲି ପରାଗ ହର୍ଷଦଙ୍କୁ ଭେଟି ପଞ୍ଚାୟତକୁ ମଦମୁକ୍ତ କରିବାକୁ ଦାବି ଜଣାଇଥିଲେ। ଦେଶୀମଦ ଶାଖା ଦୋକାନ ଲାଇସେନ୍ସକୁ ନବୀକରଣ ପାଇଁ ବିଜ୍ଞାପନ ଦିଆଯାଇଛି । ଏହି ବିଜ୍ଞାପନକୁ ପଞ୍ଚାୟତବାସୀ ବିରୋଧ କରିବା ସହ ମଦ ଦୋକାନ ଉଠାଇବାକୁ ଦାବି କରିଥିଲେ। ଏ ନେଇ ଜିଲାପାଳ ଅବକାରୀ ବିଭାଗୀୟ ଅଧିକାରୀ ଉମାଶଙ୍କର ପ୍ରଧାନଙ୍କୁ ପଦକ୍ଷେପ ନେବାକୁ ପରାମର୍ଶ ଦେଇଥିଲେ । ମାତ୍ର ଅପରାହ୍ନ ୫ଟା ସୁଦ୍ଧା କୌଣସି ଅଧିକାରୀ ଗାଁରେ ନ ପହଞ୍ଚିବାରୁ ଉତ୍ତ୍ୟକ୍ତ ମହିଳା ମଦ ଦୋକାନରୁ ମଦ ଜବତ କରିବା ସହ ପୋଲିସକୁ ଖବର ଦେଇଥିଲେ । ପରେ କଲମପୁର ଫାଣ୍ଡି ଅଧିକାରୀ ମନୋରଞ୍ଜନ ଆଚାର୍ଯ୍ୟ, ଅବକାରୀ କର୍ମଚାରୀ ଘଟଣାସ୍ଥଳରେ ପହଞ୍ଚି ମଦ ବ୍ୟବସାୟୀଙ୍କ ସହ ଆଲୋଚନା କରିଥିଲେ ।
