ହାଇଦ୍ରାବାଦ,୨୧।୨(ପି.ଟି.)- ରାଜ୍ୟ ତଥା ଦେଶ ପାଇଁ ବହୁ ସଫଳତା ଆଣିଥିବା ଓଡ଼ିଆ ସ୍ପିନର ପ୍ରଜ୍ଞାନ ଓଝା ଶୁକ୍ରବାର କ୍ରିକେଟର ସମସ୍ତ ଫର୍ମାଟରୁ ଅବସର ଘୋଷଣା କରିଛନ୍ତି। ୩୩ ବର୍ଷୀୟ ବାମହାତୀ ସ୍ପିନର ହାଇଦ୍ରାବାଦ୍ ପାଇଁ ଖେଳି ସୁନାମ ଅର୍ଜନ କରିବା ପରେ ଜାତୀୟ ଦଳରେ ସ୍ଥାନ ପାଇଥିଲେ। ସେ ୨୦୦୫ରେ ରେଲ୍ଓ୍ବେ ବିପକ୍ଷରେ ରଣଜୀ ପଦାର୍ପଣ କରିଥିଲେ। ପରେ ସେ ହାଇଦ୍ରାବାଦ ଛାଡ଼ି ବେଙ୍ଗଲ ଓ ବିହାର ପକ୍ଷରୁ ମଧ୍ୟ ଖେଳିଥିଲେ। ସେ ୧୦୮ ପ୍ରଥମ ଶ୍ରେଣୀ ମ୍ୟାଚ୍ ଖେଳି ୪୨୪ ଉଇକେଟ ନେଇଛନ୍ତି। ଭୁବନେଶ୍ୱରରେ ଜନ୍ମିତ ଓଝା ୨୦୦୯ରେ ଶ୍ରୀଲଙ୍କା ବିପକ୍ଷରେ ଅନ୍ତର୍ଜାତୀୟ ଟେଷ୍ଟ ପଦାର୍ପଣ ମ୍ୟାଚ୍ ଖେଳିଥିଲେ। ମୋଟ ୨୪ ଟେଷ୍ଟ ଖେଳିଥିବା ଓଝା ୧୧୩ ଉଇକେଟ ନେଇଥିଲେ। ୭ ଥର ଇନିଂସରେ ୫ ଉଇକେଟ ସଫଳତା ପାଇଥିଲେ। ଟେଷ୍ଟ ବ୍ୟତୀତ ଭାରତ ପାଇଁ ୧୮ ଦିନିକିଆ ଓ ୬ ଟି୨୦ ମ୍ୟାଚ୍ ଖେଳିଛନ୍ତି। ସେ ବିଶ୍ୱ ର଼୍ୟାଙ୍କିଙ୍ଗ୍ରେ ଏକଦା ପଞ୍ଚମ ସ୍ଥାନ ଅକ୍ତିଆର କରିଥିଲେ। ଆଉ ଆଇପିଏଲରେ ପର୍ପଲ କ୍ୟାପ ଜିତିବାରେ ସେ ପ୍ରଥମ ବୋଲର। ଏହା ଥିଲା ତାଙ୍କ କ୍ୟାରିୟରର ଉଲ୍ଲେଖନୀୟ ଘଟଣା। ମୁଁ ଏବେ କମେଣ୍ଟ୍ରି କରିବାକୁ ଚାହୁଁଛି। ସବୁଠୁ ଗୁରୁତ୍ୱପୂର୍ଣ୍ଣ କଥା ମୋ ପୁଅ ୟୋହାନ ସହ ସମୟ ବିତାଇବି ବୋଲି ଓଝା କହିଛନ୍ତି। ସମୟ ଆସିଯାଇଛି ଜୀବନର ଏକ ପର୍ଯ୍ୟାୟ ଶେଷ କରିବାର। ଯେଉଁ ଭଲପାଇବା ଓ ସମର୍ଥନ ପାଇଛି, ତାହା ମନେ ରହିବ ଓ ମୋତେ ଅନୁପ୍ରାଣିତ କରିବ ବୋଲି ଓଝା ଟୁଇଟ୍ କରି ଲେଖ୍ତ୍ଛନ୍ତି। ଦଶ ପାଇଁ ଅନ୍ତର୍ଜାତୀୟ ସ୍ତରରେ ଖେଳିବା ମୋ ସ୍ବପ୍ନ ଥିଲା। ମୁଁ କେତେ ଭାଗ୍ୟବାନ, ତାହା ବାଖ୍ୟା କରିବା ଲାଗି ମୋ ପାଖରେ ଶଦ୍ଧ ନାହିଁ। ମୋ ସ୍ବପ୍ନ ପୂରା କରିଛି। ଦେଶ ବାସୀଙ୍କଠାରୁ ଭଲ ପାଇବା ଓ ସମ୍ମାନ ପାଇଛି। ଜଣେ କ୍ରୀଡ଼ାବିତ ପାଇଁ ଏହାଠାରୁ ଆଉ କ’ଣ ବଡ଼ ସଫଳତା। କ୍ୟାରିୟରରେ ବହୁ ଉତ୍ଥାନ ଓ ପତନ ଦେଇ ଗତି କରିଛି। ଜଣେ କ୍ରୀଡ଼ାବିତ ପାଇଁ କଠିନ ପରିଶ୍ରମ ଓ ନିଷ୍ଠାର ଫଳାଫଳ ହିଁ ସବୁକିଛି ନୁହେଁ। ଟିମ୍ ମ୍ୟାନେଜମେଣ୍ଟ, ଦଳୀୟ ସଦସ୍ୟ, କୋଚ୍, ଟ୍ରେନର ଓ ପ୍ରଶଂସକଙ୍କ ବିଶ୍ୱାସ ମଧ୍ୟ ଦରକାର। ପ୍ରଜ୍ଞାନ ବିସିସିଆଇ, ଏଚ୍ସିଏ, ସିଏବି, ବିହାର ସିଏ ଓ ଆଇପିଏଲ ଦଳ ଡେକାନ ଚାଜର୍ସ ଓ ମୁମ୍ବାଇ ଇଣ୍ଡିଆନ୍ସ ଦଳ ପ୍ରତି ଧନ୍ୟବାଦ୍ ଦେଇଛନ୍ତି। ଏହା ବ୍ୟତୀତ ଓଝା ସିନିୟର ଓ ସାଥି ଖେଳାଳିଙ୍କୁ କୃତଜ୍ଞତା ଜଣାଇଛନ୍ତି। ଭିଭିଏସ୍ ଲକ୍ଷ୍ମଣ ମୋତେ ସାନ ଭାଇ ଭଳି ଭଲ କ୍ରୀଡ଼ାବିତ ହେବାରେ ସାହାଯ୍ୟ କରିଥିଲେ। ହରଭଜନ ସିଂ ମୋତେ ସବର୍ଦା ପରାମର୍ଶ ଦିଅନ୍ତି ଓ ମହେନ୍ଦ୍ର ସିଂ ଧୋନୀ ମୋତେ ଟିମ୍ ଇଣ୍ଡିଆର କ୍ୟାପ ପିନ୍ଧିବାକୁ ସୁଯୋଗ ଦେଇଥିଲେ। ରୋହିତ ଶର୍ମା ଓ ମନୋଜ ତିଓ୍ବାରୀଙ୍କ ସହ ମୋର ବହୁ ସ୍ମୃତି ରହିଛି, ଯାହା ଆଜୀବନ ମନେ ରହିବ। ଶେଷରେ ସଚିନ ତେନ୍ଦୁଲକରଙ୍କଠାରୁ ଟେଷ୍ଟ କ୍ୟାପ ପାଇବା ଓ ୧୦୦ ଉଇକେଟ ଅଧିକାରୀ ହେବା ମୋ ପାଇଁ ସବୁଠୁ ବଡ଼ ସଫଳତା। ଦେଶରେ କ୍ରିକେଟର ଉନ୍ନତି ଲାଗି ନିଜ ଦକ୍ଷତା ଅନୁଯାୟୀ କାର୍ଯ୍ୟ କରିବି ବୋଲି ବିସିସିଆଇକୁ ପଠାଇଥିବା ଇସ୍ତଫା ପତ୍ରରେ ଓଝା ଲେଖିଛନ୍ତି।
